Владимир Бесерминї народзени 8. мая 1946. року у Шидзе, дзе закончел и основну школу и ґимназию. Дипломовал на Филозофским факултету у Новим Садзе, на ґрупи за югославянски литератури. Обявел збирки поезиї „Очи и морю" (1969) и „Раз повем" (2003).

Писац почал як школяр закончуюцих класох ґимназиї и такой од 1964. року обявйовал у „Литературним слове", зоз котрим предлужел сотруднїцтво и кед пошол на студиї югославянских литературох 1966. року. Тото сотруднїцтво резултовало зоз видаваньом першей кнїжки поезиї у едициї „Жридла" (1969), под назву „Очи у морю". Познєйше, Бесерминї нє обявює вельо, алє з часу на час його поезию мож найсц и у „Шветлосци".

По закончених студийох, 1970. року почина робиц у Основней школи „Петро Кузмяк” у Руским Керестуре, же би од 1977. по 1982. бул заняти як лектор у Прекладательней служби Скупштини и Вивершней ради САП Войводини, а потим од 1982. по 1987. рок окончує функцию секретара Културно-просвитней заєднїци општини Кула. По виходзеню мандата, 1987. року знова ше враца до просвити, до Основней школи и ґимназиї „Петро Кузмяк’’ у Руским Керестуре, дзе и нєшка роби.

Бесерминї ше надосц занїмал зоз прекладаньом, рецензованьом кнїжкох од фахових по уметнїцки, писаньом критикох и огляднуцох. Найвирнєйши, медзитим, остал поезиї, окреме як фаховец у рецитаторским руху.