Спортиста
интернационалного уровня, атлетичар и спортски роботнїк
Владислав Няради зоз Вербасу нєдавно наполнєл 50 роки
анґажованя у спорту. Точно 26. априла 1956. року у Вербаше
формовани Атлетски клуб Вербас, а єден зоз сновательох того
клуба бул и седемнацрочни Владислав Няради, хтори праве же
рушел по драги найвисших спортских успихох. Того дня Няради
ше першираз реґистровал як активни спортиста, а уж у маю ше
вербаски атлетичаре змагали зоз АК "Гайдук" зоз Кули у
рамику Купа Войводини, на хторим вон бул перши у скоку до
далєка.
Владислав Няради народзени 16. марца
1939. року у Вербаше, дзе закончел основну школу и ґимназию.
У Беоґрадзе дипломовал на Правним факултету, а под час
студийох, од 1958. року по 1963. рок, у Беоґрадзе бул член
атлетского клубу "Партизан".
У своєй спортскей кариєри Няради
найуспишнєйши бул у троскоку и скоку до далєка, а у чаше у
хторим ше змагал, од 1956. року по 1973. рок освоєл 25
титули шампиона Войводини, дзешец раз бул шампион Сербиї,
шейсц раз шампион Югославиї, 17 роки бул член репрезентациї
Югославиї, бул рекордер Югославиї, шампион Балкану и
ношитель бронзаней медалї на Медитеранских бавискох. У тим
чаше достал и припознанє од Олимпийского комитету,
Спартакову награду, златни плакети атлетских союзох
Югославиї, Сербиї и Войводини, а Няради 1965. року бул перши
ношитель Октоберскей награди општини Вербас.
Двойнїсти рекорд Югославянскей народней
армиї ЮНА, хтори Владислав Няради освоєл 1965. року у
Заґребе, у скоку до далєка и троскоку, ище нєпревозидзени.
Найлєпши спортски резултати Няради
посцигнул 1963. року, кед зоз резултатом у троскоку од 15,73
метери поставел нови югославянски рекорд, а то було лєм 47
центиметри менєй од шветового рекорду. Дзекуюци тому
резултату преглашени є за найлєпшого спортисту у Югославиї и
постал кандидат за олимпияду. На олимпияду, медзитим, нє
пошол пре страх од путованя на авиону, а и познєйших рокох,
як член Олимпийского комитету, нїґда нє путовал кед же ше
мушело исц на авиону.
Заш лєм, дзекуюци спорту, Владислав
Няради препутовал цалу Европу и Азию, бул у Москви, Берлину,
Бечу, Братислави, Истамбулу, Софиї, Атини, Риму, Напулю,
Александриї, Анкари и велїх других городох. После рокох у
хторих ше активно змагал, Няради постал спортски роботнїк и
друштвено-политични роботнїк активни у спорту.
Бул член предсидательства Олимпийского
комитету Югославиї 8 роки, подпредсидатель СОФКИ Войводини,
предсидатель СОФКИ у Вербаше и Спортского дружтва Вербас.
Няради єден зоз сновательох нєшкайшого
Центра за физичну културу у Вербаше и як представитель
општинского СИЗ-у за физичну културу положел камень за
фундамент того центру. Робел як началнїк явного порядку у
Оддзелєню нукашнїх дїлох у Вербаше, бул секретар а потим и
предсидатель Општинскей орґанизациї Социялистичного союзу,
секретар у Радио-телевизиї Нови Сад, директор Информативного
центру у Вербаше, а вец секретар Спортского союзу як
професионалєц. По одходу до пензиї и далєй є секретар
Спортского союзу, тераз як волонтер и, як гвари, чека же
нови закон о спорту од того союзу направи нєзаобиходну
институцию у спорту.
Владиславово синове Ненад и Данило
нашлїдзели оцов талант за атлетику, так же маю числени
успихи и медалї у истих дисциплинох, у троскоку и скоку до
далєка. Ненад бул пейц раз шампион Югославиї и член
репрезентациї, а тераз є тренер и абсолвент на Академиї
физичней култури. Младши Данило бул член реперезентациї и
раз бул шампион Югославиї, а тераз є професор физичней
култури и тренер одбойки и плїваня.
Змист
