РУСКИ КЕРЕСТУР-НАЦИОНАЛНИ СОВИТ

Пред схадзку зоз министром образованя

РУСКИ КЕРЕСТУР, 19. януар 2010. (Рутенпрес) – Нєшка у Новим Садзе буду отримани два схадзки, Координациї националних совитох зоз Войводини, а потим и схадзка Координациї нациоанлних совитох Сербиї.

На войводянскей Координациї националних совитох котра ше отрима на 12,30 минути, на дньовим шоре заказованє Покраїнского совиту Националних заєднїцох и утвердзованє дньового шора.

На схадзки Координациї националних совитох Сербиї заказаней за 14 годзин, будзе ше утвердзовац заєднїцки становиска за наиходзацу схадзку зоз министром образованя котра ше ма отримац 21. януара у Беоґрадзе, а пришєше ше и предкладанє кандидатох за членох Националного совиту за културу.

Обидва схадзки Координациї националних совитох буду отримани у просторийох Националного совиту Румунскей националней меншини у Новим Садзе.

(конєц) маф

РУСКИ КЕРЕСТУР-ШКОЛА

Будзе жимованє у Медзилаборцох

РУСКИ КЕРЕСТУР, 19. януар 2010. (Рутенпрес) – Основна и штредня школа зоз домом школярох "Петро Кузмяк" зоз Руского Керестура и того року орґанизує одход своїх школярох на жимованє до Медзилаборцох до Словацкей.

И тото жимованє ше реализує дзекуюци длугорочному сотруднїцтву керестурскей Школи и Основней школи у улїци Коменского зоз Медзилаборцох, а за госцох и домашнїх под час жимованя будзе орґанизована и заєднїцка школа скияня.

На жимованє котре будзе тирвац од 7. по 13. фебруар, зоз керестурскей Школи ше можу приявиц школяре шестей, седмей и осмей класи основней и першей класи штреднєй школи.

Драгу за тото путованє будзе плациц керестурска школа, а школяре маю плациц пребуванє на жимованю за котре треба видзелїц коло 95 еври.

(конєц) маф

РУСКИ КЕРЕСТУР-ОБРАЗОВАНЄ

Збирки задаткох за национални меншини ище у друкованю

РУСКИ КЕРЕСТУР, 19. януар 2010. (Рутенпрес) – Збирки задаткох за закончуюци тести зоз математики и сербского язика за школярох котри того року закончую осму класу основней школи, од вчера у предаваню, а на язикох националних меншинох су ище у цеку друкованя.

То ше одноши и на збирки задаткох на руским язику, котри, як дознава Рутенпрес, буду готови початком фебруара, гоч у медийох обявене же збирки на язикох националних меншинох уж готови.

Комплет збирки у котрей ше находзи Збирка задаткох зоз математики, Збирка задаткох зоз сербского одн. мацеринского язика як и ришеня задаткох видава "Просвитни прегляд" зоз Беоґраду, а кошта 540 динари.

(конєц) маф

ВЕРБАС – ИСО СТАНДАРД

ИСО 9001 стандард уведзе ше у општини Вербас

ВЕРБАС, 19. януар 2010. (Рутенпрес) - Функционере и службенїки локалней самоуправи и директоре и роботнїки явних подприємствох, установох и школох у општини Вербас того викенду присуствовали на першим преподаваню о уводзеню ИСО стандардох до општинскей управи и явних подприємствох и установох.

Предносци дїлованя по ИСО стандардох представел им Йовица Стаїч, зоз беоґрадскей консултантскей хижи "ИСО систем плус".

По словох предсидателя општини Вербас др Желька Видовича, управянє и дїлованє по ИСО стандардох будзе мац двойнїсти ефект.

Зоз уводзеньом ИСО стандардох до општинскей управи и до явних подприємствох буду рационализовани трошки, зоз чим и локална самоуправа будзе туньша. Источасно, тоти стандарди ґарантую лєпшу и ефикаснейшу комуникацию зоз гражданами, гварел Видович.

Вон додал же уводзенє тих стандардох обсяжна робота, хтора може тирвац и вецей од рока, и же локална самоуправа пошвидко поруша тот процес.

Стандарди ИСО 9001 облапи шицки услуги хтори понукаю явни подприємства за информованє Вербас, Вербасґаз, "Стандард", Дирекция за вибудов и за превоз путнїкох "Вербас".

(конєц) там

ВЕРБАС – ШПИТАЛЬ

Почал робиц мамоґраф у вербаским шпиталю

ВЕРБАС, 19. януар 2010. (Рутенпрес) – У Радиолоґийней служби Опщого шпиталю у Вербаше почало ше хасновац мамоґраф, дияґностични апарат найновшей ґенерациї италиянского продукователя Металтроника, марки Лилиум.

Апарат обезпечени дзекуюци средством Покраїнского секретарията за здравство.

Препатрунки за тераз безплатни, а мож их заказац у предполадньових годзинох на телефон (021) 7954-555, або прейґ числох телефонскей централи (021) 7954-500, або 798-608.

(конєц) там

16

17