НОВИ САД - КУЛТУРА

Утвердзена програма за Националне швето

НОВИ САД, 12. януар 2010. (Рутенпрес) - Як Рутенпрес дознава у Заводу за културу войводянских Руснацох, пририхтованя за програму Шветочней академиї з нагоди Националного швета Руснацох при концу.

У програми з нагоди нашого Националного швета значна часц зверена Националней орхестри, визначним шпивачом и представительом домашнїх, Шидяньом. Ґу тому ґлумци и рецитаторе буду гуториц стихи наших, и других поетох, по руски и по сербски.

Режия цалей програми зверена Михайлови Зазулякови, за музичну часц програми задлужени Мирон Сивч, док поволанка, плакати и елементи сценоґрафиї виробени по задумки дизайнера Дарка Вуковича, професора за плакату на новосадскей Академиї уметносцох.

Централна програма означованя Националного швета Руснацох у Шидзе почнє зоз Архиєрейну Службу Божу у шидскей церкви од 16 годзин. Будзе ю предвидзиц наш владика кир Георгий, а од 18 годзин у Културним центре у Шидзе будзе отримана Шветочна академия з нагоди Националного швета Руснацох у Сербиї.

Попри културних змистох, 16. и 17. янура у Шидзе будзе отримани и Саям рускей привреди.

(конєц) зам

КОЦУР-ДЗЕНЬ РУСНАЦОХ

На пияток, 15. януара, означи ше Дзень рускей националней заєднїци

КОЦУР, 12, януар 2010. (Рутенпрес) – По препоруки Националного совиту Руснацох, у Коцуре ше Дзень рускей националней заєднїци означи на пияток 15. януара.

Дзень Руснацох ше у Коцуре означи зоз академию котру ше отрима пияток 15. януара на поладнє у просторийох Месней заєднїци у Коцуре.

Академию орґанизує коцурска Подручна канцелария Националного совиту Руснацох як и члени Националного совиту зоз Коцура.

У рамикох означованя Дня рускей националней заєднїци, у коцурскей школи ше истого дня, на пияток, у шицких одзелєньох, отримаю годзини пошвецени тому дню.

(конєц) цики

ВЕРБАС-ЗДРАВСТВО

Нови апарат за диягностику очного поля

ВЕРБАС, 12. януар 2010 (Рутенпрес)- Общи шпиталь у Вербаше достал од Покраїнского секретарията за здравство нови дигитални апарат за меранє видного поля.Таки апарат у велїм злєпшує диягностику пременкох на очох и провадзенє пациєнтох котри маю очни прицисок и очкодовани очни нерв.

Спрам словох о.д. началнїци др Мири Лаинович, офталмолошкинї, глауком барз озбильна хорота котра нє болї и кед же ше нє диягностикує на час, приводзи до траценя вида.

- Тот дигитални апарат за меранє очного поля , найновшей технологиї, пациєнтом вербаского шпиталю дава можлївосц барз добрей диягностики и то паралелно зоз обичним препатрунком при дохторови за очи. Пре таки файти здравственей услуги пациєнти нє буду мушиц, як то було по тераз, исц до других здравствени установох на препатрунки и пре тото трациц час и пенєж, гварела др Мира Лаинович.

(конєц) єп

ВЕРБАС – КАРПАТИ

На стреду вечар у "Карпатох" будзе Торба бал

ВЕРБАС, 12. януар 2010. (Рутенпрес) – У Културно-просвитним дружтве "Карпати" у Вербаше на ютре, 13. януара, з нагоди дочека Нового року по юлиянским календаре, отрима ше Торба бал.

Сход на 20 годзин, уходнїца виноши 200 динари, вечеру и напой принєше кажде себе, а напой ше годно купиц и у клубу дружтва.

На балу будзе грац оркестра "Карпатох" на чолє зоз Миколом Колетом Чижмаром.

(Конєц)там

КОЦУР-АКЦИЇ

У Коцуре, 1144 гражданє маю право на безплатни акциї

КОЦУР, 12. януар 2010. (Рутенпрес) – У Коцуре, 1144 гражданє витворели право на безплатни акциї и на 1700 динари зоз приватизационого фонду.

Коцурска пошта почала виплацовац спомнуту суму гражданом стреду 6. януара алє першого дня, пре вилїю, нє зазначена велька налога.

Коцурска пошта нє робела штварток 7. алє пияток 8 януара , а окреме вчера, вельке число Коцурцох сцело подзвигнуц свойо пенєжи и информовац ше о власносци 5 акцийох НИС-у так же тих дньох налоґа була велька.

По словох занятих у коцурскей пошти, вчера до 13 годзин, покля пошта роби, коло 600 Коцурци подзвигли пенєжово надоплнєнє од 1 700 динари.

(конєц) цики

КОЦУР-СПОРТ

СО Вербас финансийно помогла ФК Искру зоз Коцура

КОЦУР, 12. януар 2010. (Рутенпрес) – Тих дньох, на жиро рахунок ФК Искра зоз Коцура з боку буджедту СО Вербас, уплацени 360.000,00 динари за вибудов нових зоблєкальньох на стадиону у Коцуре.

Предсидатель Искри Михал Варґа виявел за Рутенпрес же скоро шицка спомнута сума потрошена на виплацованє длуствох за материял и роботи хтори по тераз поробени.

По словох Варґи, то перша часц обецаних пенєжох а пошвидко ше обчекує уплата другей часци так же ше роботи годни предлужиц.

Предсидатель општини Вербас др. Желько Видович визначел же здруженя гражданох хтори робя зоз младима буду финансийно потримани з боку општини, и же уплата пенєжу коцурскей "Искри" потвердзенє же тота општинска власц спольнює свойо обецунки.

(конєц) цики

16

17