БЕОҐРАД-ДРУЖТВО

Стретнуце двох министрох зоз представнїками Националних совитох

БЕОҐРАД, 21. януар 2010. (Рутенпрес) – Министрове Светозар Чиплич и Жарко Обрадович нєшка, 21. януара у Беоґрадзе, у Палати Сербиї отримаю стретнуце зоз представителями Националних совитох.

Министер за людски и меншински права, Светозар Чиплич и министер просвити Обрадович зоз представителями Националних совитох буду бешедовац о реализациї одреднїцох нового Закона о националних совитох котри ше одноша на надлєжносци у обласци образованя.

Як теми стретнуца предложени: пременка наставного програму зоз сербского як нємацеринского язика, пременка статута наставного предмета мацерински язик зоз елементами национален култури, преширенє лїстини странских язикох зоз язиками националних меншинох и други.

На схадзки зоз министрами будзе участвовац и Славко Орос, предсидатель Националного совиту Руснацох, а схадзка заказана за 11 годзин.

(конєц) маф

РУСКИ КЕРЕСТУР-НАЦИОНАЛНИ СОВИТ

Стретнуце зоз Покраїнским секретариятом за информованє

РУСКИ КЕРЕСТУР, 21. януар 2010. (Рутенпрес) – На ютре, 22. януара

у Руским Керестуре у дочасовим шедзиску Националного совиту отрима ше схадзку зоз представителями Покраїнского секретарияту за информованє.

Схадзка ше отрима на инициятиву Покраїнского секретарияту як континуитет схадзкох котри ше остатнїм чаше отримовали о акуалних питаньох.

Схадзку ше отрима з початком на 11 годзин.

(конєц) маф

РУСКИ КЕРЕСТУР-ДРУЖТВО

Трибина о уписованю до окремного виберанкового списку

РУСКИ КЕРЕСТУР, 21. януар 2010. (Рутенпрес) - Месни одбор Демократскей странки у Руским Керестуре, вовторок, 19. януара орґанизовал трибину на котрей бешедоване о уписованю до окремних виберанкових спискох за нєпоштредни виберанки за членох националних совитох.

Госци трибини Славко Орос предсидатель Националного совиту, як и Йоаким Рац Мими и Михайло Зазуляк котри координую тоту акцию, потолковали присутним прецо важне же би ше и Руснаци уписовали до окремних виберанкових спискох.

Госци трибини наглашели же би було нєодвичательно и нєозбильно нє вихасновац тото нове право достате зоз новим Законом о националних совитох.

А воно значи формовац окремну виборну лїстину зоз чим зме годни нєпоштредно, односно директно виберац свой Национални совит и на тот способ сами одлучовац о себе, и своїх виталних интересох.

Зоз уписованьом достаточного числа Руснацох до того списку укажеме и же зме одвичательна заєднїца та озбильни партнер держави, визначене на трибини.

Представителє Националного совиту як и члени Месного одбору ДС, тиж и народни посланїк др Дюра Мученски анимировали коло сто присутних членох и симпатизерох тей странки же би ше и сами анґажовали при збераню подписох у своїм околїску.

Тиж и Йоаким Надь, секретар Месней заєднїци поинформовал же ше и МЗ технїчно уключи до тей акциї.

Спрам нєурядових податкох, по тераз ше до окремного виберанкового списку уписали коло тисяч Керестурци.

Як наглашене на трибини, Месни одбор Демократскей странки сце допринєсц же би ше уписало голєм половка од 4100 жительох Керестура котри маю право гласа.

(конєц) маф

ВЕРБАС – ВАКЦИНА

У општини Вербас найвецей вакциновани од новей ґрипи

ВЕРБАС, 21. януар 2009. (Рутенпрес) - Вакцину процив новей ґрипи од 17. децембра, кед рушело вакцинованє процив вируса А Х1Н1, по тераз у општини Вербас достали 2,7 одсто жительох.

Директорка Дома здравя "Велько Влахових" у Вербаше, дохторка Браяна Николич, гвари же по тим општина Вербас найлєпша у Войводини и високо понад просека Сербиї.

Дньово вакцину у амбулантох у општини доставаю 90 до 100 хронїчно хори, а по тераз нє замерковани нєжадани ефекти вакцинованя.

Кед у питаню школски дзеци, дохторка Николич гвари же по тераз вакциновани, вкупно 50 дзеци и же шицки вони вакцину достали у здравственей установи.

Николичова гвари же постої можлївосц же би здравствени екипи пошли до школох, алє за тераз нє було таки вимаганя, а з другого боку родичи воля привесц дзеци до амбуланти, дзе лїкар препатри дзецко и дзе воно вакцину достанє у одвитуюцих условийох.

Родичи здравих дзецох углавним за тераз нє указовали векше интересованє за вакцину, а и имунитет при здравих дзецох добри и вони лєгко поднєшу кажди вирус ґрипи, гварела дохторка Николич.

По єй словох, у општини Вербас по тераз подзелєни коло 2.000 вакцини, а у планє подзелїц 4.000 тисячи, так же вакцину годни достац шицки заинтересовани.

(конєц) там

ВЕРБАС –СУД

Славко Салонтаї - Дробняк у Стразбуру достал суд процив Сербиї

ВЕРБАС, 21. януар 2009. (Рутенпрес) – После вецей деценийох судзеня на судох шицких уровньох у Сербиї, Славко Салонтаї Дробняк зоз Вербасу, од Европского суда за людски права у Стразбуру достал пресуду по хторей держава Сербия треба же би му виплацела 15.000 еври.

Процивогньови инжинєр Славко Салонтаї - Дробняк, тих дньох, после три и пол роки, шлєбодно вишол зоз свойого квартеля, до хторого ше сам завар же би го нє одведли на психиятрийне лїченє.

Европски суд за людски права у Стразбуру потвердзел же нє по закону одлуки судох у Сербиї, зоз хторима Салонтаї -Дробняк преглашени нєспособни за роботу и зоз хторима му виповедзена мира обовязного психиятрийного лїченя.

Салонтаї - Дробняк двараз, як гвари, нє по закону бул у притвору, и то 1996. и 2005. року, у вишлїдним гарешту на Клиси и на психиятрийним припатраню у Централним гарешту у Новим Садзе, после чого ушлїдзели два пробованя його завераня.

Таки мири суда ушлїдзели после того як Славко Салонтаї - Дробняк од 1973. року поднєсол коло сто тужби процив бувшого директора вербаскей цукровнї "Бачка" Бранка Обрадовича и других руководительох, судийох, адвокатох, тужительох, а на тото число треба доложиц и числени пригварки, поднєски и други правни ствари.

У доме Славка Салонтая – Дробняка находзи ше обсяжна судска документация назберана за три и пол децениї, поскладана до 13 реґистрох, чежка блїзко 50 кили.

За тот час суди нє були лєм засипани зоз тужбами Салонтая – Дробняка, алє и вони подношели тужби процив нього.

Рахуюци же ше правосудство Сербиї ґу ньому нє справує по закону, Славко Салонтаї - Дробняк ше за помоц обрацел Гелшинскому одбору за людски права у Беоґрадзе, хтори му оможлївел же би ше його предмет нашол на Европским суду за людски права у Старзбуру.

(конєц) там

ВЕРБАС – СТАРИ

Пошвидко добудов домского оддзелєня у Коцуре

ВЕРБАС, 21. януар 2010. (Рутенпрес) – Министерство роботи и социялней политики оддобрело вербаскому Ґеронтолоґийному центру шейсц милиони динари за добудов оддзелєня у Коцуре.

У рамику проєкта буду вибудовани два двопосцельово хижи зоз купальнями, два санитарни ґузли, канцелариї за занятих и велька закрита тераса за лєтни активносци хасновательох дома.

"За релативно крадки час ознова ше роби на злєпшаню условийох живота у домским оддзелєню у Коцуре", виявела за Рутенпрес директорка Ґеронтолоґийного центра у Вербаше Радмила Мусич.

Прешлого року обєкт реновировани и адаптовани зоз средствами зоз покраїнского буджету и теди до реконструкциї будинка старого коло 150 роки уложене вецей од седем милиони динари.

После тих обсяжних роботох капацитет обєкта звекшани за осем нови места, зоз 22 на 30, гварела Мусич.

(конєц) там

РУСКИ КЕРЕСТУР-ПАРОХИЯ

Закончене пошвецанє обисцох

РУСКИ КЕРЕСТУР, 21. януар 2010. (Рутенпрес) - Традицийне пошвецанє обисцох зоз богоявлєньску воду котре у парохиї у Руским Керестуре почало 8. януара, по швету Богоявлєня Господнього, закончене вчера, а пошвецени коло 700 доми.

Як обичай у тей нашей найвекшей парохиї, пре єй велькосц обисца ше пошвеца вименково, єден рок єдну, други другу половку валала, та на тот завод пошвецана часц од Торжи. Тота часц валала и дакус векша, бо по евиденциї єст коло 1200 грекокатолїцки доми.

Пошвецанє обисцох и членох фамелиї зоз богоявлєньску воду ма за вирних вельке значенє, а воно тиж було нагода за стретнуце зоз своїма священїками, за кратши розгварки чи поради.

Пошвецанє домох окончели троме керестурски паноцеве, парох о. Михайло Малацко и капеланє о. Тони Анґелов и о. Дарко Рац.

(конєц) маф

СУБОТИЦА – СКУПШТИНА

Городска рада Суботици ма двох членох менєй

СУБОТИЦА, 21. януар 2010. (Рутенпрес) – Скупштина городу Суботици одлучела же число членох Городскей ради зменша зоз 10 на 8.

Така одлука прилапена зоз гласами одборнїкох коалициї "За европску Суботицу", СПС, ДСС и Бунєвацкей странки Войводини.

Як гварел городоначалнїк Суботици Саша Вучинич, без мандатох у Городскей ради остали члени Союзу Войводянских Мадярох, а ресор култури и информованя злучени зоз ресором просвити, а ресор за социялни питаня здравству.

Предсидатель СВМ Иштван Пастор обвинєл Демократску странку же потупела коалицийне спорозуменє, док Вучинич неґира же то ма политичну конотацию.

На схадзки Скупштини принєшена и одлука о управяню зоз туристичним комплексом "Парк Палич", а у цилю реализациї Мастер плану Палич, цо ключни фактор за економски розвой Суботици.

(конєц) ад

НОВИ САД - ВОДОСТОЙ

Стан на водоцекох стабилни

НОВИ САД, 21. януар 2010. (Рутенпрес) – Мири порядней охрани од вилївох у Войводини на моци на Сави ище лєм на 6 километерох, гварене у сообщеню ЯП "Води Войводини".

На териториї Войводини мири охрани ище важа на 266 километерох, од чого на Тиси 123, на Беґею 72 и на Дунаю 11 километери.

Водостой на войводянских водоцекох опада, а лєм на Тиси стаґнує.

(конєц) ад

НОВИ САД – КОМУНАЛНИ ПОДПРИЄМСТВА

Штрайк занятих у явних подприємствох

НОВИ САД, 21. януар 2010. (Рутенпрес) – Заняти у новосадских явних и комуналних подприємствох штрайкую уж три днї, а штрайк будзе предлужени и нєшка.

Синдикати нєзадовольни зоз одлуку городкей власци о зменшаню плацох за 10 одсто у одношеню на прешли рок.

Штрайк предлужени и вчера на централней городскей площи, а прегварки зоз городску власци ище на початку.

Городоначалнїк Иґор Павличич гварел же нє одустанє од зменшаня плацох, а занятим наложене же би обезпечели минимум роботи, же би нє гражданє нє були очкодовани.

Синдикати наявели и утаргованє по єдного автобуса на каждей городскей линиї док ше нє випольня їх вимоги.

(конєц) ад

16

17