НОВИ САД - ЗАВОД ЗА КУЛТУРУ

Розправа о актох Закона о култури

НОВИ САД, 14. януар 2010. (Рутенпрес) - У Заводзе за културу войводянских Руснацох нєшка, 14. януара, буду отримани консултациї з нашима дїячами з обласци култури, о новопринєшеним Закону о култури.

У сотруднїцтве зоз Покраїнским секретариятом за културу, пондзелок, 11. януара, у Заводзе за културу Войводини отримана явна розправа о подзаконских актох хтори маю провадзиц нови Закон о култури, котри принєшени у септембру прешлого року.

То значи же Закон о култури будзе комплетовани з приношеньом 12 його подзаконских актох, о хторих праве тирва явна розпва.

З оглядом же дати кратки термини за даванє думаня о подзаконских актох, явна розправа о тих подзаконских актох у Заводзе за културу ВР будзе отримана нєшка, з початком на 16 годзин.

(конєц) зам

РУСКИ КЕРЕСТУР/КУЛА - НАЦИОНАЛНЕ ШВЕТО

Ютре пригодни приєм з нагоди 17. януара

РУСКИ КЕРЕСТУР/КУЛА, 14. януар 2010. (Рутенпрес) - З нагоди 17. януара, Националного швета Руснацох у Сербиї, на ютре, 15, януара, у Руским Керестуре и Кули буду отримани пригодни приєми у орґанизациї Националного совиту, односно його Подружнїци у Кули.

Приєм зоз коктелом у Руским Керестуре на ютре будзе отримани з початком на 14 годзин у Хорскей сали Дома култури.

З тей нагоди поволани представителє месних дружтвених и привредних орґанизацийох, представителє кулскей општини, як и поєдинци з котрима сотрудзує Национални совит Русанцох.

Приєм з културно-уметнїцку програму за представительох кулскей општини будзе отримани и у Кули, на ютре, 15. януара, у просторийох КУД "Др Гавриїл Костельник", з початком на 12 годзин.

(конєц) зам

РУСКИ КЕРЕСТУР – ШКОЛА

Почало означованє Националного швета Руснацох

РУСКИ КЕРЕСТУР, 14. януар 2010. (Рутенпрес) – По препорукох Националного совиту, Националне швето Руснацох ше почало означовац у Основней школи и Штреднєй школи "Петро Кузмяк" у Руским Керестуре.

Швето котре пада 17. януара, у керестурскей школи ше означує од вовторку 12. по соботу 16. януара, а у шицких класох основней и у руских оддзелєньох штреднєй школи, а у меншим обсягу и у сербских оддзелєньох.

Националне швето ше означує на годзинох руского язика, историї, музичней култури и годзинох оддзелєньского старшини на котрих ше бешедує на рижни теми зоз прешлосци и терашньосци нашого руского народу.

(конєц) маф

СРИМСКА МИТРОВИЦА - НАЦИОНАЛНЕ ШВЕТО

Поетски вечар Славка Виная

СРИМСКА МИТРОВИЦА, 14. януар 2010. (Рутенпрес) - На ютре, 15. януара, з початком на 18 годзин, у барокней сали Музея Сриму у Сримскей Митровици, будзе отримана пригодни приєм и програма з нагоди означиваня Националного швета Русанцох у Сербиї.

Як Рутенпрес дознава од предсидателя Дружтва Руснацох Сримскей Митровици Владимира Балащака, у рамикох означованя Националного швета, у тим городу буду представени поетски твори Славка Виная зоз збирки "Триолоґия" и литературного зборнїка з конкурса "Сон о карпатских горох" отриманого у Польскей.

(конєц) зам

ШИД - НАЦИОНАЛНЕ ШВЕТО/САЯМ ПРИВРЕДИ

Ютре остатнї дзень за приявйованє

ШИД, 14. януар 2010. (Рутенпрес) - У рамикох тогорочней Централней програми означованя Националного швета Руснацох у Сербиї, 16. и 17. януара у Шидзе будзе отримани Саям рускей привреди.

Шицки руски привреднїки хтори заинтересовани за викладанє своїх продуктох на Сайме рускей привреди, най ше явя Юлиянови Ковачови на тел.:(022)714-331; моб.:064/124 24 99, лєбо на мейл: julijankovac@neobee.net , найпознєйше по ютре, 15. януар.

Саям, односно штанди привреднїкох буду поставени у просторийох Руского двору; Саям будзе отворени 16. и 17. януара, а на нєдзелю, 17. януара, у Шидзе будзе отримани и Округли стол з тему "Можлївосци привредного сотруднїцтва".

Як Рутенпрес дознава од предсидателя Здруженя керестурских ремеселнїкох и приватних привреднїкох Владимира Емейдия, вчера, 13. янура було познате же орґанизовано, прейґ Здруженя, на Сайме свойо продукти виложа коло 10 керестурски привреднїки.

Емейди нє виключує можлївосц и поєдинєчней, самостойней учасци дзепоєдних керестурских привреднїкох на тим Сайме, а спрам його спознаньох, привреднїки з Руского Керестура заинтересовани нащивиц Саям рускей привреди у Шидзе.

(конєц) зам

ВЕРБАС – ПОЛЬОПРИВРЕДА

Почина Жимска школа за польопривреднїкох

ВЕРБАС, 14. януар 2010. (Рутенпрес) - Польопривредна фахова служба Вербас и Польопривредна совитодавна служба Автономней покраїни Войводини орґанизую Жимску школу за польопривредних продуковательох.

Настава ше орґанизує у општинох Вербас, Србобран, Кула и Бечей, у хторих старосц о польопривредней продукциї водзи вербасака Польопривредна фахова служба.

На пияток 15. януара на 15 годзин у просторийох "Ю Арбиса" у Руским Керестуре, будзе отримане перше преподаванє у рамику Жимскей школи за польопривреднїкох, на теми:

1. Законска реґулатива у защити рошлїнох;

2. Презентация и можлївосц купованя пирскачкох фирми Вайт;

3. Регулаторе росту и антистресни субстанци у заградкарстве.

Преподаванє у Руским Керестуре орґанизую “Ю Арбис” и Польопривредна фахова служба Вербас, а вони буду орґанизовани каждого пиятку до конца жими.

У наиходзацим тижню преподаваня буду орґанизовани у Туриї на пондзелок, Србобрану на воворторок, на стреду у Бечею и на штварток у Надалю.

Преподаваня буду тримац фаховци Польопривредней фаховей служби Вербас и Покраїнскей совитодавней служби як и госци зоз Польопривредного факултета и Института за земльдїлство и заградарство зоз Нового Саду, Польопривредного факултета у Земуну и други.

(конєц)там

ЦЕРКВА-НЄШКА НОВИ РОК

По юлиянским календаре нєшка Нови рок

ЦЕРКВА, 14. януар 2010. (Рутенпрес) – По старим, Юлиянским календаре, нєшка 1. януар 2010. року, а того календара ше притримую и векшина парохийох у нашим Апостолским еґзархату, як и Сербска православна Церква.

У наших парохийох котри ше притримую Юлиянского календара нєшка, 1. януара и початок нового 2010. року, а источашнє и швето Обризаниє Господа Исуса Христа.

Швето ше у наших церквох означує зоз богослуженями, а кажда парохия звичайно на тот дзень оглашує и рочну статистику своїх матрикулних кнїжкох, односно податки о числу новопокресцених, повинчаних и похованих у прешлим року.

(конєц) маф

ВЕРБАС – КАРПАТИ

У "Карпатох" бул "Торба бал"

ВЕРБАС, 14. януар 2010. (Рутенпрес) – У Културно-просвитним дружтве "Карпати" у Вербаше вчера вечар, з нагоди дочека Нового року по юлиянским календаре, отримани "Торба бал".

На балу були вецей як 50 Вербащанє, алє и госци зоз Коцура и Кули, хтори любя таки способ друженя и забави.

Бал отворел предсидатель Карпатох Славко Микитишин, привитуюци шицких хтори пришли тот вечар препровадзиц у добрим росположеню, натанцовац и ше превешелїц ше зоз своїма найблїзшима и приятелями.

Микитишин апеловал на тих хтори ше нє уписали до окремного виберанкового списку, най то цо скорей зробя.

За добру атмосферу на балу остарала ше оркестра "Карпатох" на чолє зоз Миколом Колетом Чижмаром, а шицки учашнїки бала достали томболу, хтори були порихтани за франту, же би виволали шмих тих хтори их достали.

(Конєц)там

НОВИ САД – ВОДОСТОЙ

Мири порядней охрани од вилївох на Тиси

НОВИ САД, 14. януар 2010. (Рутенпрес) – На Тиси вчера уведзени мири порядней охрани од вилївох на ище 50 километерох, а по тераз ше охранює 335 километери водоцекох у Сербиї.

Мири охрани у Войводини уведзени на Тиси, Сави, Тамишу и Беґею, а на Сави найвекаша длужина охрани од ище 55 километери.

Тиса и Сава и далєй рошню, а други водоцеки у опаданю.

(конєц) ад

НОВИ САД – ШКОЛСТВО

Нєдостаточни капацитети у домох школярох

НОВИ САД, 14. януар 2010. (Рутенпрес) – Капацитети за змесценє школярох у домох за штредньошколцох нєдостаточни у векшини школских центрох у Войводини, гварене у сообщеню покраїнскей Влади.

Найвекши проблем у домох у Новим Садзе дзе конкуровало 2 924 школяре, а прияти лєм 2 435, цо 83 одсто.

(конєц) ад

16

17