РУСКИ КЕРЕСТУР – ЕКОЛОҐИЯ

Анґажовани водопривредни инспектор

РУСКИ КЕРЕСТУР, 3. септембер 2008. (Рутенпрес) - Нєшка Републични водопривредни инспектор Йосип Куч зоз Зомбора нащиви одводни беґель КЦ3 у Руским Керестуре же би утвердзел причини загинуца векшого количества риби – виявел Стефан Ґелевайчук, шеф Оддзелєня за инспекцийни роботи Општинскей управи у Кули.

"Зоглядом же слово о водопривредним обєкту анґажовали зме водопривредного инспектора понеже, по прияви секретара керестурскей Месней заєднїци Йоакима Надя нє мож заключиц же вода затрована зоз даякима гемийнима отровами, гварел Ґелевайчук

У водопривредней инспекциї гваря же то нє єдини случай угинуца риби и же до того приходзи пре вельки горучави и нєдостаток кисеонику.

Ґелевайчук наглашел же кед ше нєшка утвердзи процивне, будзе анґажовани Републични инспектор за еколоґию понеже кулска општина, после одходу инспектора за еколоґию до пензиї, ище вше нє пополнєла тото роботне место.

У одводним каналу КЦ3 хтори ше улїва до Малого Бачкого каналу рускокерестурски рибаре предходних дньох замерковали вецей поздихани риби до чого по словог Янка Джуджра, предсидателя Здруженя спортсих рибарох "Коляк", найвироятнєйше пришло пре заґадзованє води.

Джуджар гвари же поздихали досц риби, а у опасносци и риба у беґелю та цали случай приявени секретарови керестурскей Месней заєднїци.

Йоаким Надь, секретар керестурскей Месней заєднїци случай приявел Стефанови Ґелевайчукови, шефови оддзелєня за инспекцийни роботи понеже у кулскей општини нєт инспектор за еколоґою.

Др Леона Доротич Ґутеша гвари же у Руским Керестуре таки еколоґийни интиденти ше случую скоро каждого року, алє по тераз ище вше нє утвердзена права причина гоч ю, по словог Доротичовей, мож нагаднуц.

(конєц) мик

КУЛА – ПОЛИТИКА

Нєшка штварта схадзка Скупштини општини

КУЛА, 3. септембер 2008. (Рутенпрес) - За нєшка заказана штварта схадзка Скупштини општини Кула на хторей будзе розпатрени предлог рочней Програми защити, ушореня и хаснованя польопривредней жеми у державней власносци на териториї кулскей општини на хтори согласносц достата од Министерства польопривреди, лєсарства и водопривреди Републики Сербиї.

Одборнїки Скупштини општини Кула нєшка розпатра и предлог Одлуки о одредзованю компетентного орґана за запровадзованє поступка видаваня до закупу державней польопривредней жеми и предлог Ришеня о менованю Комисиї за запровадзованє поступка явней лицитациї.

Того року прейґ лицитациї у кулскей општини до закупу буду дати 9.877 гектари жеми у державней власносци.

Схадзка Скупштини општини Кула заказана за 10 годзин.

(конєц) мик

НОВИ САД-ТРАНСПОРТ

За нєшка наявена блокада Моста шлєбоди

НОВИ САД,3. септембер 2008. (Рутенпрес)- Коло 40 новосадски аутопревознїки наявели же нєшка зоз камионами блокираю Мост шлєбоди у Новим Садзе, прето же су нєзадовольни зоз одлуку спрам котрей зоз камионами по тим Мосце можу преходзиц лєм вноци.

Милан Вуйович, власнїк фирми "Архитектон" новинаром гварел же городска власц нє ма порозуменє за проблеми новосадских автопревознїкох та наютре на 7 годзин рано будзе блокада моста з обидвох бокох Дунаю.

Спрам його словох аутопревознїки зоз Нового Саду бетон вожа на сримски бок прейг моста у Бешки цо цалком нєрационално, а гордска власц нє ма слуха за тот проблем.

Тиж так Вуйович гварел же камиони Мост шлєбоди можу преходзиц у чаше од 21.00 по 7. 00 годзин рано а кед жадаю то робиц през дзень муша плациц додатну таксу.

Спрам наявох , блокада будзе тирвац кажди дзень и по годзину длужей догод ше нє вименї одлука о забрани транспорта камионом у цеку роботного часу.

(конєц) єп

ЧЕРВИНКА – ПРИВРЕДА

Почало резанє цукровей цвикли

ЧЕРВИНКА, 3. септембер 2008. (Рутенпрес)-У Фабрики цукру у Червинки вчера почало резанє цукровей цвикли, зоз чим и практично почала тогорочна кампаня хтора будзе тирвац 85 роботни днї, а перши количества нововипродукованого цукру сцигню на штварток – сообщели у Фабрики цукру у Червинки.

У Фабрики цукру у Червинки обчекую успишну кампаню понеже ше им поспишело законтрачиц продукцию найвекшу од шицких сербских цукровньох та так зоз 12.000 гектарох за преробок буду мац од 550 до 600 тисячи тони цукровей цвикли цо на уровню прешлорочних количествох.

ВЕРБАС - ШКОЛЯРЕ

Општина Вербас помага штредньошколцом

ВЕРБАС, 3. септембер 2008. (Рутенпрес) - Општина Вербас у тим школским року будзе партициповац трошки путованя и биваня штредньошколцох зоз пребуваньом у општини Вербас.

Предсидатель Општини Вербас Желько Лаинович подписал вчера заключенє о партиципованю трошкох автобусного транспорта, трошкох змесценя у домох школярох и викенд карти, як и часци трошкох биваня под кирию у висини домского змесценя и викенд карти за школски 2008/2009. рок.

Тоти трошки буду партициповани од 1. октобра 2008. року по конєц школского року у юнию 2009. року.

Право на тоту файту помоци маю школяре хтори доставаю дзецински додаток, вец дзеци з фамелийох хтори маю заробок зоз польопривреди од 11.200 по гольту, дзеци погинутих борцох и воєних инвалидох, дзеци зоз вибеженских фамелийох, дзеци хтори маю лєм єдно з родичох и одлични школяре.

Процент учасци општини у трошкох будзе спрам числа приявених школярох, з оглядом на огранїченосц предвидзених средствох.

Прияви ше подноши по 24. септембер, а информациї о потребней документациї мож достац на телефони 703-306, локал 188 и 7954-088.

(конєц)там

КУЛА – ДРУЖТВО

Конкурс за реґресованє трошкох превозу школярох отворени ище нєшка

КУЛА, 3. септембер 2008. (Рутенпрес) - Конкурс за реґресованє трошкох превозу школярох штреднїх школох Оддзелєня за дружтвени дїялносци Општинскей управи у Кули отворени ище нєшка.

Зоз вимогу заинтересовани за конкурованє на часточне реґресованє трошкох путованя треба же би доручели и потвердзенє же подношитель порядни школяр, фотокопию особней карточки, потвердзенє роботодавца у хторого робя родичи же нє примаю пенєжне надопольнєнє за дзецко и фотокопию школярскей кнїжочки.

Документацию ше подноши у Услужним центру у будинку Скупштини општини Кула, Ленїнова 11.

Як дознаваме у Оддзелєню за дружтвени дїялносци Општинскей управи у Кули на Конкурс за реґресованє мешачних школярских картох ше по тераз приявели коло 700 штредньошколци, док их прешлого року було вецей од 900.

Школяром "Кулатранс" мешачни карти будзе реґресовац 25 одсто од цени коштаня мешачней автобускей карти, а локална самоуправа 20 одсто.

Реґресовани мешачни карти буду коштац од Кули до Вербасу 4.224 динари, як и од Керестура до Кули. Од Червинки до Кули 3.696, а до Вербасу 4.752 динари. Од Сивцу до Кули треба плациц 4.752, а до Вербасу 6.336 динари. Зоз нову мешачну карту потребне купиц и нови рамики хтори коштаю 80 динари.

Од того року школяре зоз "Кулатрансовима" мешачнима картами можу хасновац и автобуси "Севертрансу" и "Тополятрансу".

(конєц) мик

НОВИ САД-КУЛТУРА

Фестивал сучасней тамбуровей музики

НОВИ САД, 3. септембер 2008. (Рутенпрес)- Од 5. по 7. септембер у Новим Садзе будзе отримани Перши медзинародни фестивал сучасней тамбуровей музики.

На конференциї за новинарох гварене же Фестивал будзе тродньови спектакл на котрим бузе представена "визия тамбури за будучносц и нова форма тамбуровей писнї".

На фестивалу котри ма знагательни гарактер, буду участвовац попри домашнїх уметнїкох на тим инструменту, и госци зоз Горватскей, БиХ, Македониї и Словениї.

Покровитель Першого медзинародного фестивала сучасней тамбуровей музики город Нови Сад а генерални медийски спонзор Явни медийни сервиз Войводини.

(конєц) єп

16

17