РУСКИ КЕРЕСТУР - НАЦИОНАЛНИ СОВИТ

Означованє Националного швета Руснацох по наших местох

РУСКИ КЕРЕСТУР, 13. януар 2010. (Рутенпрес) - Попри централней шветочносци означованя Националного швета Русанцох у Шидзе, воно будзе означене и по местох дзе жию Руснаци у Войводини.

Як Рутенпрес дизнава, наступного викенду 15. и 16. януара, Националне швето у векшини наших местох будзе означене з пригоднима програмами котри ґе буду одвивац у подружнїцох Националного совиту, односно Културно уметнїцких дружтвох.

Так на пияток, 15. януара, пригодни програми и приєми, на хтори буду поволани и представнїки локалней самоуправи, буду отримани у Коцуре, Кули, Руским Керестуре, Суботици, Сримскей Митровици, Новим Орахове и Вербаше.

Означованє Националного швета Руснацох 15. януара на поладнє будзе отримане у Коцуре у Месней заєднїци, у Кули, тиж од на поладнє у КУД “Др Гавриїл Костельник”, а у Руским Керестуре, истого дня од 14 г. у Хорскей сали Дома култури.

На пияток, Националне швето од 14 г. будзе отримане и у просторийох Дружтва Руснацох Суботици; од 18 г. у Сримскей Митровици, од 19 г. у Руским доме у Новим Орахове, а источасно и у Вербаше, у КПД "Карпати".

На соботу, 16. януара, Националне швето Руснацох од 12 г. будзе означене у Новим Садзе, у просторийох Руского културно-просвитного дружтва, а истого дня, лєбо на саме швето, на нєдзелю - и у Дюрдьове, од 11,30 годзин у просторийох КУД "Тарас Шевченко".

Тиж так, на пригодни способи и прилагодзено возросту, того и идуцого тижня, Националне швето Руснацох будзе означене и у предшколских установох и школох дзе ше порядно, лєбо факултативнои виучує руски язик.

(конєц) зам

СУБОТИЦА - ШВЕТО

Шветочносц з нагоди означованя дня Руснацох

СУБОТИЦА, 13. януар 2010. (Рутенпрес) – На пияток, 15. януара, зоз початком на 14,00 годзин у просторийох Дружтва Руснацох у Суботици будзе отримани шветочни коктел з нагоди означованя Националного швета Руснацох у Сербиї.

На коктел поволани представнїки городу, других здруженьох и члени дружтва. За госцох будзе пририхтана пригодна програма, як и закуска зоз руских нациналних єдлох.

(конєц)кп

РУСКИ КЕРЕСТУР – ПРИВРЕДА

Скупштина ремеселнїкох и приватних привреднїкох

РУСКИ КЕРЕСТУР, 13. януар 2010. (Рутенпрес) - Прешлей нєдзелї, 10. януара, у Майсторским доме, у Руским Керестуре отримана 176. порядна рочна скупштина Здруженя ремеселнїкох и приватних привреднїкох, котре найстарше таке здруженє у Сербиї.

Попри госцох зоз Кули и Коцура на Скупштини иприсуствовали предсидатель Националного совиту Руснацох Славко Орос, секретар керестурскей Месней заєднїци Йоаким Надь, як и власнїк Подприємства "Юарбис" Славко Рац.

Як у звиту о роботи у 2009. року гварел дотерашнї предсидатель Здруженя Дюра Надь, и попри велькей економскей кризи, влонї заш лєм удатно и достойно означени значни ювилей - 175-рочнїца од формованя Здруженя керестурских ремеселнїкох.

За оправянє будинку Дома ремесельнїкох з нагоди ювилею обезпечени 600 000 динари, котри обеспечела Месна заєднїца, општина Кула и велї други валалски структури.

Ґу тому, финансийно, лєбо на даяки други способ, тим найзначнєйшим активносцом у прешлим року допомогли и керестурски и привреднїки з других местох - гварене медзи иншим у Звиту о роботи.

Од Рочней скупштини, функцию предсидателя керестурского Здруженя ремеселнїкох и приватних привреднїкох превжал Владимир Емейди, а дотерашнї предсидатель Дюра Надь тераз окончує функцию подпредсидателя Здруженя

Як назначнєйши задатки роботи у тим року, нови предсидатель Владимир Емейди визначел преширенє членства Здруженя, презентованє його дїялносци прейґ веб-сайта и формованє цалосней бази податкох о керестурских привреднїкох.

Предлужованє сотруднїцства з керестурскима структурами, алє и зроднима институциями у жеми и иножемстве, тиж буду приоритети у роботи, наглашел Емейди.

Уж перша тогорочна значнєйша активносц Здруженя ремеселнїкох и привреднїкох Керестура будзе учасц його членох на Сайме рускей привреди, 16. и 17. януара у Шидзе, а у рамикох Централней програми означованя Националного швета Руснацох у Сербиї.

Од активносцох Здруженя на початку рока у першим планє будзе и орґанизованє традицийного Майсторского балу, найстаршого балу у Руским Керестуре, котри того року будзе отримани 23. януара на "Лонґове."

(конєц) зам

КУЛА - ПРИВРЕДА

Кредити за розвойни програми з Фонду за розвой АП Войводини

КУЛА, 13. януар 2010. (Рутенпрес) - На основи конкурса за длугорочне кредитованє финансованя розвойних програмох у обласци привреди, Фонд за розвой АП Войводини одобрел 20 милиони 750 000 динари за пейц превредни субєкти з кулскей општини.

Пондзелок, 11. януара, контракти о тих кредитох за розвойни програми, предсидатель општини Кула Светозар Буквич уручел представительом "Металопромету", "Есентики", "Боринґу", як и Зоранови Шапоньови, власнїкови польопривредного подприємства.

- Приватни сектор барз значни за кулску општину и у тим року ше потрудзиме витвориц ище лєпше сотруднїцтво з приватнїками. У тим напряме, намира нам формовац Совит за привредни розвой општини Кула, хтори бу ду твориц визначни привреднїки з нашей општини - гварел з тей нагоди Светозар Буквич, наглашуюци же отверанє нових роботних местох приоритет отримуюцого розвою кулскей општини.

Шицки привреднїки хтори достали кредити з Фонду за розвой АП Войводини наявели преширйованє своїх привредних капацитетох и отверанє нових роботних местох, а як поведзене, дзекуюци и општини Кула, пошвидко ше почнє з вибудову трафо-станїци медзи Кулу и Вербасом, цо оможлїви отверанє коло 30 нових роботних местох.

(конєц) зам

ВЕРБАС - ЯВНИ РОБОТИ

У Старим Вербаше закончени явни роботи

ВЕРБАС, 13. януар 2010. (Рутенпрес) - У Першей месней заєднїци у Вербаше, односно Старим Вербаше, закончени явни роботи за хтори Покраїнски секретарият за роботу и обезпечованє роботи видвоєл 891.000 динари.

За штири мешаци обновени дражки, поверхносци 850 квадратни метери, а на роботи анґажовани осмеро роботнїки.

У рамику явних роботох по 17. януар, як цо и предвидзене, будзе закончене ушоренє старого єврейского и нємецкого теметова, хтори ше находза при Желєзнїцкей станїци у Вербаше.

За тоту роботу Покраїна видвоєла 2.267.000 динари, а анґажовани 12 роботнїки.

По законченю тих роботох, як Рутенпрес дознава од помоцнїка предсидателя општини Вербас Вукашина Вуїчич, локална самоуправа планує оградзиц обидва теметови.

Вуїчич гварел и же ше у марцу закончую явни роботи у КПД "Карпати", за хтори оддобрене 496.000 динари. Ту тройо роботнїки анґажовани на проєкту очуваня културного идентитету Руснацох и Українцох.

(Конєц)там

ОДЖАК - ФОНД ЗА НОВИНАРОХ

Донаторе општини Кула, Оджак и Бач

ОДЖАК, 13. януар 2010. (Рутенпрес) - Чолнїки општинох Оджак, Кула и Бач 7.. януара у Оджаку подписали Спорозуменє о донациї 150 000 динари до Фонду новинарох Войводини.

Спорозуменє о потримовки Фонду новинарох Войводини з предсидательом Дружтва новинарох Войводини (ДНВ) Предраґом Чурчийом подписали предсидатель општини Кула Светозар Буквич, предсидатель општини Бач Томислав Богунович и предсидатель Дочасового орґану општини Оджак Веролюб Маркович.

Фонд новинарох Войводини формовани на инициятиву предсидателя ДНВ Предраґа Чурчиї, а назберани средства виключно буду хасновани за єднократну помоц новинаром хтори остали без роботи, самохраним мацером и фамелийом покойних новинарох.

- Очекуєме же по май того року, у тим Фонду будземе мац коло 2 милиони динари и вец зме годни поомогнуц найзагроженшим колеґом - гварел Предраґ Чурчия после подписованя Спорозуменя у Оджаку.

Потримовка Фонду новинарох Войводини наявена и зоз Зомбора, других войводянских општинох, алє и од Министерства култури и медийох.

(конєц) зам

ВЕРБАС – ПРОЄКТИ

Покраїна дала пенєж за ушоренє дильовох и одводньованє

ВЕРБАС, 13. януар 2010. (Рутенпрес) – Покраїнски секретарият за польопривреду оддобрел штири проєкти месних заєднїцох у вербаскей општини, хтори конкуровали за ушоренє дильовох у хотаре и одводньованє польопривредней жеми.

Другей месней заєднїци оддобрени 2.000.000 динари и з тим пенєжом буду вировнати и пооправяни драги у часци хотара ґу Коцуру.

- То у значней мири польопривреднїком олєгча преход зоз тракторами, машинами як и транспорт польопривредних продуктох, гварел член Општинскей ради Борис Биєлович.

Перша месна заєднїца, односно Стари Вербас за тоту намену зоз покраїнского буджету достала 1.800.000 динари, а Змаєво достанє 1.500.000 динари.

Месней заєднїци Равне Село, хтора конкуровала за одводньованє польопривредней жеми, Покраїна оддобрела 1.000.000 динари.

- Оддобрени средства муши ше наменски утрошиц по конєц 2010. року. Шицки месни заєднїци овласца Явне подприємство “Дирекция за вибудов” же би у їх мено запровадзела поступок явней набавки, гварел Биєлович.

(конєц)там

ЗОМБОР - БЕЗПЕЧНОСЦ У ТРАНСПОРТУ

Два особи погинули

ЗОМБОР, 13. януар 2010. (Рутенпрес) - Спрам сообщеня Полицийней управи Зомбор, од 4. по 11. януар на подручу општинох Зомбор, Апатин, Кула и Оджак, збули ше 17 транспортни нєщесца у хторих два особи погинули, два чежко, шейсц особи лєгчейше повредзени, а материялна чкода оценєта на коло 720 000 динари.

Живот у транспортних нєщесцох страцели особи на подручу општини Оджак и Кула, а у кулскей општини у тим периодзе були три транспортни нєщесца, дзе попри погинутей, єдна особа чежко, а три особи лєгчейше повредзени.

(конєц) зам

ЗОМБОР - СООБЩЕНЄ О БЕЗПЕЧНОСЦИ

Огньогасци мали 825 интерценциї

ЗОМБОР, 13. януар 2010. (Рутенпрес) - Огньогасно-ратовацка чета Оддзелєня за позарядово ситуациї у Зомборе, вєдно зоз своїма Оддзелєнями у Апатину, Оджаку и Кули, прешлого, 2009. року, мала 825 интервенциї у Зомборе и тих општинох.

Тото число представя пороснуце интервенцийох за прейґ 20 одсто у одношеню на предпрешли рок - сообщела Полицийна управа Зомбор Министерства нукашнїх дїлох.

Од початку сезони зогриваня, концом прешлого року зазначени три нещесца у хторих три особи погинули. Як сообщує Полицийна управа, спомнути нєщесца ше збули пре охабянє уключених кварцних зогривачкох през ноц, и то у блїзкосци даякого меблю, лєбо другого предмету.

Пре тоти збуваня и таке справованє, огньогасци окреме спозорюю шицких котри хасную таки и подобни зогривачки, же основна превенция насампредз же би вони були исправни; кед су уключени, потребне их тримац цо далєй од других предметох, а окреме виключовац през ноц - гвари ше у сообщеню Полицийней управи Зомбор, Огньогасней чети Оддзелєня за позарядово ситуациї.

(конєц) зам

НОВИ САД – ПОЛЬОПРИВРЕДА

Продуктна берза предала 73 370 тони вештаку

НОВИ САД, 13. януар 2010. року (Рутенпрес) – Продуктна берза у Новим Садзе предала од початку рока 73 370 тони реґресованого минералного вештаку, цо 24 одсто од вкупного количества хторе субвенционує Влада Сербиї.

Як гварел директор Берзи Жарко Ґалетин индивидуални польопривредни продукователє, задруґи, польопривредни институти и правни лїца можу по 13. фебруар купиц туньши вештак за 5 000 динари по тони.

Польопривреднїки можу купиц од 20-150 тони, задруґи и правни лїца до тони, а институти найвецей до 20 000 тони вештаку, а найвекши купци по тераз були правни лїца.

Предай хвильково окончую подприємства "Промист" и "МК Комерц" зоз Нового Саду и "Фестил" зоз Бачкей Паланки, а заинтересовани подприємства ше можу уключиц до берзанского предаваня ище нєшка.

(конєц) ад

НОВИ САД – ПОЛЬОПРИВРЕДА

Розвой овоцарства и винївцарства у Сриме

НОВИ САД, 13. януар 2010. року (Рутенпрес) – Влада Войводини потрима концепт розвою Сриму през проєкти овоцарскей и винїцарскей продукциї.

Як гварел предсидатель покраїнскей Влади Боян Пайтич, покраїнска власц потрима виробок фахових студийох о хвильковим стану у тей обласци у Сриме, як би ше дефиновали високо квалитетни продукти и сорти хтори буду пласовани на домашнє и тарґовище Европскей униї.

Заключене же сримски општини маю вельки потенцияли за розвой овоцарства и винїцарства, а Фрушка гора найвигоднєйша за таку продукцию.

Садзенє нових сортох виновей лози и овоци по европских стандардох допринєше розвою Сриму и унапердзи квалитет животу на тим подручу.

Ношитель проєкту будзе Департман за овоцарство и винїцарство Польопривредного факултету у Новим Садзе у сотруднїцтве зоз другима институциями, локалнима самоуправами и фаховима совитодавнима польопривреднїма службами.

(конєц) ад

НОВИ САД – ТРАНСПОРТ

Новосадски полицає достали приручнїки

НОВИ САД, 13. януар 2010. року (Рутенпрес) – Предсидатель Городскей скупштини Александар Йованович придал новосадскей транспортней полициї приручнїки нового Закону о безпечносци у транспорту.

Началнїк транспортней полициї Милован Ґлодньович гварел же 200 приручнїки буду подзелєни шицким полицайом у городзе хтори реґулую транспорт, як и тим хтори припадаю новосадскей полицийней управи.

Вон наглашел же од початку применьованя нового закону числа транспортних нєщесцох зменшани за 52 одсто у одношеню на исти период прешлого року.

(конєц) ад

НОВИ САД – ВИЛЇВИ

Уведзени мири охрани од поджемних водох

НОВИ САД, 13. януар 2010. року (Рутенпрес) – Вчера ЯП "Води Войводини" уведло порядни мири охрани од поджемних водох на подручох Зренянину и Бечею.

Источашнє на териториї цалей Войводини уведзене интензивне провадзенє ситуациї поджемних водох.

За тераз окрем на териториї Зренянину у Бечею, ситуация зложена и у Новим Садзе, Шабцу, Кикинди, и других зонох дзе ше звекшує уровень води на Сави, Тиси, Тамишу и Беґею.

"Води Войводини” провадза ситуацию, а польорпивреднїком совитовани дополнююца защита жеми, хтора подрозумює отверанє сезонских браздох як би вода швидше одцекла.

(конєц) ад

НОВИ САД – ВИЛЇВИ

Позарядова охрана на ище 14 километерох

НОВИ САД, 13. януар 2010. року (Рутенпрес) – Мири позарядовей охрани од вилївох уведзени вчера на ище 14 километерох на Сави, та зоз тим тераз єст 55,68 километери гацох на Сави.

На Сави утаргнута порядна, и преглашена позарядова охрана од вилївох, а порядна охрана од вилївох, на Тиси, Тамишу, Нери и Беґею. За тераз лєм Тиса рошнє, а други водоцеки у стаґнациї.

(конєц) ад

16

17