КОЦУР-КРАЧУН

Коцурци святочно преславели крачунски швета

КОЦУР, 9. януар 2010. (Рутенпрес) – Коцурски грекокатолїки святочно преславели крачунски швета по юлиянским календаре. Швета почали зоз Крачунским саночним хторе служене на вилїю, стреду вечар, на 23 годзин.

На саму Вилїю, и попри дижджу, числени Коцурци, окреме млади, ходзели по шпиваню. У Коцуре було даскельо ґрупи хтори по шпиваню ходзели зоз бетлегемом.

После вецей рокох, по коцурских обисцох ходзела и ґрупа зоз характеристичну гвизду и зоз окремним маскираньом преношели вистку о народзеню спасителя. По шпиваню на вилїю вечар ходзели и гудаци и Мадярска шпивацка ґрупа КУД Жатва хтори домашнїм шпивали крачунски шпиванки.

Шицки три днї крачунских шветох у коцурскей грекокатолїцкей церкви служени по Ранша, Велька и Вечарша служба Божа, а другого дня Крачуна, у шицких службох було мированє.

(конєц) цики

На початок

2

КОЦУР-КРАЧУНСКИ КОНЦЕРТ

Нєшка вечар КУД Жатва отрима свой Крачунски концерт

КОЦУР, 9. януар 2010. (Рутенпрес) – Нєшка вечар, КУД Жатва зоз Коцура отрима свой традицийни Крачунски рочни концерт на котрим буду шпивани коляди и презентовани найудатнєйши точки дзецинских секцийох КУД Жатва.

Виводзацки фолклор ше представи зоз танцами зоз хторима у прешлим року наступал у нашей жеми и иножемстве а шпивацки ґрупи и солисти одшпиваю нови репертоар.

Концерт будзе закончени зоз обробками гитох Демиса Русоса, Бони М и Миши Ковача по руски, сербски и мадярски. Програму ше отрима у Доме култури а почнє на 19 годзин и 30 минути.

(конєц) цики

РУСКИ КЕРЕСТУР - БЕЗПЛАТНИ АКЦИЇ

Вчера достали коло 250 Керестурци

РУСКИ КЕРЕСТУР, 9. януар 2010. (Рутенпрес) - По 8. януар, на Пошти у Руским Керестуре по 1 700 динари за безплатни акциї подзелєне коло 370 Керестурцом котри за тоту намену ту мали отворени жиро-рахунки.

Виплацованє того пенєжового надополнєня од приватизованя явних подприємствох и у Руским Керестуре почало стреду, 6. януара, як на Пошти, так и у двох керестурских банкох.

Лєм на Пошти, мож достац и информативне Потвердзенє о власносци пейц акцийох НИС, медзитим, до тераз тоти Ппотвердзеня барз мало видати.

Пре винїманє пенєжу за безплатни акциї, на керестурскей Пошти тераз каждодньово векша гужва, док у банкох нє зазначени векши гужвиу пре тоту роботу.

(конєц) зам

РУСКИ КЕРЕСТУР - НАЦИОНАЛНИ СОВИТ

Нєшка схадзка Предсидательства

РУСКИ КЕРЕСТУР, 9. януара 2010. (Рутенпрес) - Нєшка, 9. януара, у Новим Садзе будзе отримана схадзка Предсидательства Националного совиту Руснацох.

Предсидательство Националного совиту будзе бешедовац о уписованю Руснацох до Окремного виберанкового списку, як и о означованю 17. януара - наступного Националного швета Руснацох у Сербиї.

Нєшкайша схадзка Предсидательства Националного совиту будзе отримана у просторийох Завода за културу войводянских Руснацох у Новим Садзе, з початком на 11 годзин.

(конєц) зам

НОВИ САД - КУЛТУРА

Национална орехестра почала прирхтованя за Шветочну академию

НОВИ САД, 9. януар 2010. (Рутенпрес) - Перша заєднїцка проба Националней орхестри будзе нєшка, а отримує ю ше у рамикох пририхтованя програми з нагоди Националного швета Руснацох.

Спрам одлукох Одбора за културу Националного совиту Руснацох и Управного одбору Завода за културу Войводянских Руснацох, ознова будзе ожита робота Националней орхестри, нє лєм за Швето, алє и за други нагоди през рок.

Националну орхестру творя нашо школовани и професийни музичаре, студенти музичней академиї и штредньошколци. Националну орхестру, котра хвильково ма 20 членох, водзи наш визначни дириґент Мирон Сивч зоз Руского Керестура.

Шветочна академия з нагоди Националного швета Руснацох у Сербиї, 17. януара, праве на Швето, того року будзе отримана у Шидзе.

(конєц) зам

НОВИ САД - КУЛТУРА

Утвердзена програма за Националне швето

НОВИ САД, 9. януар 2010. (Рутенпрес) - Як Рутенпрес дознава у Заводу за културу войводянских Руснацох, пририхтованя за програму Шветочней академиї з нагоди Националного швета Руснацох при концу.

У програми з нагоди нашого Националного швета значна часц зверена Националней орхестри, визначним шпивачом и представительом домашнїх, Шидяньом. Ґу тому ґлумци и рецитаторе буду гуториц стихи наших, и других поетох, по руски и по сербски.

Режия цалей програми зверена Михайлови Зазулякови, за музичну часц програми задлужени Мирон Сивч, док поволанка, плакати и елементи сценоґрафиї виробена по задумки дизайнера Дарка Вуковича, професора за плакату на новосадскей Академиї уметносцох.

Централна програма означованя Националного швета Руснацох у Шидзе почнє зоз Архиєрейну Службу Божу у шидскей церкви од 16 годзин. Будзе ю предвидзиц наш владика кир Георгий, а од 18 годзин у Културним центре у Шидзе будзе отримана Шветочна академия з нагоди Националного швета Руснацох у Сербиї.

Попри културних змистох, 16. и 17. янура у Шидзе будзе отримани и Саям рускей привреди.

(конєц) зам

16

17