БЕОҐРАД- ПЕНЗИЇ

Октоберски пензиї буду звекшани коло 17 одсто,

БЕОҐРАД, 30 август 2008. (Рутенпрес) - Влада Сербиї принєсла Уредбу о позарядовим звекшаню пензийох, з котру реґуловане же ше найнїзши пензиї, пенєжни надополнєня и пензиї воєних осиґуранїкох у октобре звекшує за 10 одсто.

Источасно ше зоз порядним ускладзованьом пензийох зоз инфлацию и ростом плацох, у складзе зоз одредбами Закона о пензийним и инвалидним осиґураню, звекшує за коло 7 одсто. Зоз позарядовим и порядним звекшаньом пензийох то виноши коло 17 одсто – гварел подпредсидатель Влади Сербиї Йован Кркобабич.

Зоз тим звекшаньом, пензиї буду виношиц коло 59 одсто штреднєй плаци у Сербиї, зоз чим ше практично сполнює законску обовязку же штреднї пензиї нє можу буц менши як 60 одсто од штреднєй плаци.

Спрам Кркобабичових словох, то перши крочай у поступним подзвигованю пензийох, а циль же би штредня пензия була коло 70 одсто штреднєй плаци. Виплацованє октоберских пензийох будзе у новембре.

(конєц) мс

НОВИ САД- НАЦИОНАЛНИ СОВИТ МАДЯРОХ

Ласло Йожа: нєт предписаня котре утврдзує вибор нових членох до националних совитох

НОВИ САД, 30. август 2008. (Рутенпрес)- Пейц новосадски нєвладово орґанизациї (НВО) зоз мадярскей заєднїци порушало инициятиву же би ше розпущел терашнї состав Националного совиту Мадярох, прето же му вишол мандат пред скоро двома роками.

З оглядом же ище нє принєшени закон за тоту обласц, предклада ше же би ше вибрало дочасни Национални совит мадярскей заєднїци.

Националному совиту Мадярох вицекол мандат 22. септембра 2006. року, вон вецей нє леґални прето ше вимага же би ше вибрало дочасни Совит, покля ше нє принєше Закон, вимагаю спомнути пейц НВО.

Вони найвекшу одвичательносц за тото здрилюю на предсидателя Националного совиту Мадярох Ласлу Йожу и на покраїнского секретара за управу, предписаня и национални меншини Тамаша Корхеца.

У сообщеню ше виноши и оцена же Скупштина Сербиї континуовано потупює актуални закон зоз тим же препущела можлївосц же би ше питаня меншинох ришело зоз новим законом, котри ище нє принєшени.

– Актуални закон цо ушорює и питаня меншинох заш лєм ма дзепоєдни релевантни факти. Гоч векшини совитом националних меншинох уж вицекол штирочни мандат, ми у тей хвильки нє маме предписанє котре утвердзує вибор нових совитох. Наглашуєм же Републични совит за национални меншини завжал становиско по хторим стари состави националних совитох буду потамаль док ше нє виберу нови – гвари Лало Йоже, предсидатель Совиту Мадярох.

Факт же Закон о националних совитох, односно Закон о людских и меншинских правох ище нє принєшени, нє зна ше анї кеди го Скупштина Сербиї прилапи, а потамаль док ше то нє риши, у тей обласци и надалєй будзе правни ваакум.

(конєц) мс

КОЦУР-ШКОЛА

У Коцуре, до першей класи руша 49 дзеци

КОЦУР, 30. авґуст 2008. (Рутенпрес) - На пондзелок, 1. септембра, до першей класи основней школи, у Коцуре руша 49 дзеци цо исте число як и прешлого року. Вони буду розпоредзени до трох одзелєньох-єдного руского и двох сербских.

По словох директорки основней школи "Братство-єдинство" зоз Коцура, Ксениї Медєши, до руского одзелєня, хторе будзе учиц наставнїца класней настави Славица Хромиш, уписани дзешецеро дзеци.

Трицец дзевецеро дзеци буду ходзиц до двох одзелєньох дзе ше настава будзе одвивац по сербски а тоти одзелєня буду учиц наставнїци класней настави Єлена Буила и Мария Шкрбич.

По словох Медєшовей, число одзелєньох у коцурскей основней школи остава исте яке и було-по три одзелєня зоз каждей класи, вкупно 24 одзелєня.

И того школского року коцурскей школи одобрени руски и мадярски язик як виборни предмет так же руски язик годни виучовац дзеци од першей по пияту класу а мадярски язик, дзеци од першей по осму класу.

(конєц) цики

РУСКИ КЕРЕСТУР - ВИРСКИ ЖИВОТ

Благослов пред початком школского рока

РУСКИ КЕРЕСТУР, 30. авґуста 2008. (Рутенпрес) - Початок нового школского року, у парохиї у Руским Керестуре ше сце першизар започац и зоз заєднїцку молитву и благословом школярох.

Прето на ютре, 31. авґуста, нєдзельова “дзецинска” Служба Божа будзе ше служиц за щешлїви початок и успишни школски рок за шицких керестурских школярох.

Нєдзельова дзецинска Служба Божа у церкви св. оца Миколая почина на 11 годзин и 30 минути.

(конєц) маф

РУСКИ КЕРЕСТУР - ОБРАЗОВАНЄ

Школски рок у школи почина 1. септембра

РУСКИ КЕРЕСТУР, 30. авґуста 2008. (Рутенпрес) - На пондзелок, 1. септембра, почина нови школски 2008/9. рок и у Основней школи и Ґимназиї "Петро Кузмяк".

Перши дзень школяре од першей по пияту класу основней школи треба же би пришли до нового школского будинку на 8 годзин рано, як и ґимназиялци.

Школяре першей и другей класи основней школи треба же би на 8 годзин пришли до школского будинку "Замок" дзе и того року буду мац наставу.

Школяре основней школи од шестей по осму класу у септембру наставу починаю у пополадньовей змени та треба же би на пондзелок, 1. септембра до школи пришли на 14 годзин.

(конєц) маф

ЧЕРВИНКА – ПРИВРЕДА

Означени початок кампанї преробка цукровей цвикли

ЧЕРВИНКА, 30. август 2008. (Рутенпрес) – Зоз подпальованьом вапнового пеца вчера у Фабрики цукру у Червинки на сомволични способ означни початок преробку цукровей цвикли хтори будзе тирвац 85 днї.

Др Милан Петрович, заменїк директора червинскей цукровнї, гварел же у Фабрики и того року очекую успишну кампаню понеже цукрова цвикла законтрачена на 12.000 гектарох зоз хторих ше рахує на урожай чежки од 550 по 600 тисячи тони сладкого кореню.

Вапнову пец подпалєли Светозар Буквич, предсидатель општини Кула, Душан Миланко, директор Землєдїлскей задруґи зоз Кляїчева, єдней од найвекших продуковательох, и роботнїки Фабрики цукру Бранислав Крунич и Милан Каленич.

Резанє цукровей цвикли почнє на вовторок, 2. септембра кед ше випродукує и перши количества нового цукру.

(конєц) мик

ВЕРБАС - СПОРТ

Спортска школа "Jumper" и у новим школским року

ВЕРБАС, 30. авґуст 2008. (Рутенпрес) - Спортска школя "Джампер" (Jumper), хтора облапя дзеци зоз општини Вербас возросту од 5 по 10 роки, почнє з роботу з новим школским роком, 1. септембра.

Циль школи, хтору уж треци рок водзи професор физичного Данило Няради, розвиванє моторичних способносцох и ученє основних елементох спорта.

"Джампер" конципована як спортска школа общого характеру, у хторей ше учи основи атлетики, борилецки спорти и спорти зоз лабду.

У предходних двох рокох през тоту школу прешло вецей як сто дзеци.

(Конєц)там 

СУБОТИЦА – СПОРТ

Спортски бависка "Яша Баков " у Суботици

СУБОТИЦА, 30. авґуст 2008. (Рутенпрес) – У рамикох Мемориялних спортских бавискох "Яши Бакова" Дружтво Руснацох у Суботици орґанизує змаганє у одбойки на писку, хторе ше отрима нєшка на Паличу.

Сход екипох на 9 годзин на теренох за одбойку на писку, а початок змаганя на 10 годзин.

(конєц)кп

16

17