ВЕРБАС - ВИБЕРАНКИ

Коалиция ЗЕВ ма найвецей одборнїцки места

ВЕРБАС, 19. октобер 2009. (Рутенпрес) - На позарядових локалних виберанкох вчера у општини Вербас найвецей гласи освоєла коалиция "За европски Вербас - Борис Тадич, у чиїм составе Демократска странка, Сербски рух обнови и Социялдемократска партия."

Спрам прелиминарних резултатох, после обробених шицких 36 виберанкових местох, Коалиция "За европски Вербас" освоєла 7.517 гласи або 35,91 одсто и 15 мандати од вкупно 36, кельо єст у СО Вербас.

По чишлє освоєних гласох друга коалиция СПС-ПУПС-Єдинствена Сербия - Ивица Дачич, хтора ма 3.936 гласи або 18,08 одсто и 8 мандати.

Сербска напредна странка освоєла 2.875 гласи або 13,73 одсто и 6 мандати, Сербска радикална странка 1.563 гласи або 7,47 одсто и 3 мандати.

Либерално демократска партия - Лиґа социялдемократох Войводини - Лїстина за валали освоєли 1.137 гласи або 5,43 и 2 мандати.

Лїстина Демократска странка Сербиї - Нова Сербия - Воїслав Коштуница освоєла 1.248 гласи або 5,96 одсто и 2 мандати.

Спод цензуса остали Ґрупа гражданох "Єст надїї" зоз 2,85 одсто гласох, Рух социялистох - Александер Вулин зоз 2,58 одсто гласох, Союз войводянских Мадярох зоз 1,62 одсто гласох, Ґ 17 плус зоз 1,46 досто гласох и Реформисти Войводини зоз 1,27 досто гласох.

Од 37.175 гласачох, на виберанки вишло 56,17 одсто.

(Конєц)там

РУСКИ КЕРЕСТУР - ДРУЖТВО

"Отворени дзвери” у Каритасу

РУСКИ КЕРЕСТУР, 19. октобер 2009. (Рутенпрес) - Парохийни Каритас у Руским Керестуре вчера, зоз малим запожнєньом означел 10. октобер Дзень менталного здравя.

З тей нагоди отримане стретнуце зоз дзецми и одроснутима зоз иншакима можлївосцами под мотом тогорочней кампанї Националного Каритасу "Отворме дзвери" котра ше витворює кажди рок у рамикох проєкта Промоция менталного здравя.

На стретнуцу у велькей виронаучен сали отримало ше стретнуце зоз котрим ше жадало сензибилизовац парохиянох же би прилапели особи котри маю иншаки можлївосци. З тей нагоди ше представели и госци, представителє Дружтва ментално нєдостаточно розвитих особох “Белава птица”, зоз Кули.

Їх роботу представел предсидатель Марко Кошутич, а як окремни успих то дньови центер Дружтва котри каждодньово зазберує своїх хасновательох зоз шицких местох општини Кула та и зоз Керестура. Неда Фурикова, член Дружтва зоз Керестура, потим пречитала свою наградзену литературну роботу.

Ґабриєла Саянковичова представела роботу заєднїци "Вира и шветло" котре ше тераз лєм периодично стрета при домашнєй парохиї, а члени тей заєднїци, дзеци и їх родичи виведли пригодну програму.

Шицких присутних привитал и парох керестурски о. Михайло Малацко, та наглашел же таки стретнуца шицких уча як треба любиц другого, а волонтере Каритасу потим пририхтали закуску и друженє за шицких присутних.

З нагоди Дня менталного здравя, вчера вечар у Каритасу тиж так приказана проєкция италиянского филма на тоту тему под меном "Шицко можлїве".

(конєц) маф

НОВИ САД – ЗДРАВСТВО

Од нєшака вакцини процив нового ґрипа

НОВИ САД, 19. октобер 2009. (Рутенпрес) – Вакцинация процив нового ґрипа Х1Н1 почнє нєша у шицких Домох здравя у Новим Садзе.

На розполаганю 12 250 єдинки вакцини, од чого 11 000 за Доми здравя, 700 дозни за Ґеронтолоґийни центер и 550 за Дом за дзеци у Ветернику.

Вакцинация ше препоручує старшим од 65 роки, особом слабого имунитету, охореним од кардиоваскуларних хоротох, як и особом хтори виложени ризику од инфекцийох, а дзеци од 6-36 мешаци хтори предходно нє вакциновани процив ґрипа можу ше тиж вакциновац.

(конєц) ад

НОВИ САД – КУЛТУРА

Концерт Руского симфонийского оркестра

НОВИ САД, 19. октобер 2009. (Рутенпрес) – У новосадскей Синаґоґи нєшка на 20 годзин будзе отримани концерт Руского симфониского оркестра под управу дириґента Валерия Полянского.

Новосадска публика будзе мац нагоду чуц дїла руских композиторох як цо Мусорґски, Рахманїнов и Чайковски.

Карти задармо, а можу ше резервовац у Музичней омладини Нового Саду.

(конєц) ад

НОВИ САД – ПРИВРЕДА

Явна поволанка за модернизацию цепларнї

НОВИ САД, 19. октобер 2009. (Рутенпрес) – У британским маґазину "Файненшал таймс" обявена явна поволанка за заинтересованих за укладанє до осучасньованя и преширенє Термоелектрани-цепларнї Нови Сад, гварене у Електродистрибуциї Сербиї.

Поволанка обявена и у сербских медийох, а у поступку докапитализациї ЕПС и Термоелекранох-цепларньох город Нови Сад обезпечи жем зоз комплетну инфраструктуру и погоном.

Од стратеґийного партнера ше очекує же би зоз докапитализацию осучаснєл опрему и роботу, здобул векшинске власнїцтво и мал искуство у управяню зоз таким погонами, як и вибудов сучасного погону.

Явна поволанка отворена по 1. децембер, а очекує ше же квалификацийни поступок будзе закончени по конєц рока кеди ше отвори тендер.

(конєц) ад

НОВИ САД – НАУКА

Закончени "Тесла фест"

НОВИ САД, 19. октобер 2009. (Рутенпрес) – У Новим Садзе закончени Медзинародни саям иновацийох, знаня и творительства "Тесла фест", а Ґран при фестивала достал Предраґ Пешович за патент мини прецекови бойлер.

Медзинародни жири обрунтовал награду зоз тим же 10 000 таки бойлери уж вивежени до Южней Африки.

Жири препатрел вецей як 350 екпонати, а додзелєни вецей як 80 припознаня, як и медалї.

(конєц) ад

НОВИ САД – БЕРЗА

Зменшани обток на берзи

НОВИ САД, 19. октобер 2009. (Рутенпрес) – Вкупни обток на Продуктней берзи у Новим Садзе прешлого тижня зменшани за 31,43 одсто и виношел 1 695 тони.

Вкупна вредносц обтоку була 21,4 милиони динари, а цена кукурици була 8,55 динари за килу, док ше зоз житом тарґовало по цени од 9,07 динари за килу.

На берзи ше тарґовало и зоз семенским житом (14,04 динари за килу), статковим ярцом (7,89 динари) и вештаком (23,76 динари).

(конєц) ад

КОЦУР-ФОДБАЛ

Коцурци лєпши од Равноселцох-Искра-Пролетер 5:2(2:0)

КОЦУР, 19. октобер 2009. (Рутенпрес) – У осмим колу Медзиопштинскей фодбалскей лиґи Вербас-Бечей-Србобран, коцурска Искра бавела пред своїма патрачами процив Пролетеру зоз Равного Села.

Гоч без дазкелїх стандардних бавячох, Коцурци од початку забавели анґажовано и першу часц бависка закончели зоз резултатом 2:0 на свою хасен а стрелци були Цимбалєвич и Країнович.

У другей часци змаганя Искра предлужела зоз офанзивним бависком и пошвидко прейґ Сердара и Атили Ерия, звекшала свою предносц на 4:1. Госцом ше удало зменшац резултат алє такой после того Країнович зоз своїм другим ґолом на змаганю поставел конєчни резултат Искра 5, Пролетер 2.

Идуцей нєдзелї Искра будзе госцовац у Србобрану дзе ю дочека екипа Младосц-радосц а змаганє почнє на 14 годзин.

16

17