НОВИ САД - КОСТЕЛЬНИКОВА ЄШЕНЬ

З Концертом класичней музики вчера закончена Костелнїкова єшень

НОВИ САД, 16. новембер 2008. (Рутенпрес) – Вчера зоз Концертом класичней музики у Ґимназиї "Йован Йованович Змай" Новим Садзе закончена тогорочна Петнаста културна манифестация "Костельникова єшень".

На Концерту уметнїцкей музики участвовали нашо млади, алє и уж афирмовани музичаре - инструменталисти, векшином школяре штреднїх музичних школох и студенти музичних академийох у нас и иножемстве.

На Концерту у Новим Садзе участвовли школяре штреднїх и основних музичних школох - Алексей Сивч (клавир), Яна Еделински (тамбура), Николая Сивч (вокал) и Оксана Рамач (гушля) зоз Руского Керестура.

На концерту наступели и нашо студенти на музичних академийох - Антония и Катарина Барново зоз Дюрдьова, та Ирена Бенак з Нового Саду (як Камерни трио на гушльох и клавиру); Димитрий Цап зоз Коцура (ґитара) зоз Луну Иветич ( флаута) , Дарко Варґа зоз Бачкей Тополї (клавир), як и єдно нове мено у нашей класичней музики - Петро Голик, постдипломски студент контрабасу у Минхену и Наташа Пенезич ( клавир) зоз Нового Саду.

Пре хороту єдного члена, трио "Позитив" кори тиж бул наявени, нє участвовал у програми концерта.

(конєц) зам/єп

РУСКИ КЕРЕСТУР - НАЦИОНАЛНИ СОВИТ

Нащива японского амбасадора Керестуру

РУСКИ КЕРЕСТУР, 16. новембер 2008. (Рутенпрес) - На особне жаданє, Його Екселенция Тадаши Наґаи, амбасадор Япону у Беоґрадзе, нєшка, 17. новембра, нащиви Руски Керестур.

Нєдавно, японски амбасадор у своєй Резиденциї у Беоґрадзе бул домашнї припаднїком нашей националней заєднїци, медзи нїма и предсидательови Националного совиту Руснацох Славкови Оросови, дзе начално бешедоване и о нащиви амбасадора Япону Рускому Керестуру, як центру Руснацох у Сербиї.

Як Рутенпрес дознава у Националним совиту Руснацох, Його Екселнеция Тадаши Наґаи, амбасадор Япону у Беоґрадзе, до Руского Керестура придзе нєшка дополадня, дзе заплановане же обидзе вецей нашо институциї и установи, а домашнї му будзе Национални совит Руснацох, на чолє з предсидательом Славком Оросом.

(конєц) зам

РУСКИ КЕРЕСТУР - ПОЛИТИКА-НАЦИОНАЛНИ МЕНШИНИ

Округли стол о правох националних меншинох

РУСКИ КЕРЕСТУР, 16. новембер 2008. (Рутенпрес) – Нютре, 18. новембра, у Руским Керестуре будзе отримани Округли стол з тему: "Витворйованє правох националних меншинох у локалних заєднїцох" - як виношенє резултатох Алтернативного звиту о применьованю Рамиковей конвенциї за защиту националних меншинох и Повелї о реґионалних, лєбо меншинских язикох.

У сотруднїцтве зоз керестурскеу Месну заєднїцу, Округли стол орґанизую Войводянски центер за людски права зоз Нового Саду и Центер локалней демократиї зоз Суботици, а з потримовку Фонду за отворене дружтво.

Округли стол ше орґанизує з цильом цо векшого упознаваня з резултатами Алтернативного звиту о применьованю спомнутей Повелї и Рамиковей конвенциї, а у чиїм виробку участвовали представителє седем националних совитох войводянских националних меншинох, нєвладово орґанизациї и фаховци з тей обласци.

У виробки Алтернативного звиту участвовал и Национални совит рускей националней маншини, а Совиту Европи, Алтернативни звит поднєшени 2007. року.

На Округли стол у Руским Керестуре поволани представителє локалней самоуправи, члени Националного совиту Руснацох, члени Совиту Месней заєднїци Руски Керестур, представителє младежских орґанизацийох и других нєвладових орґанизацийох и здруженьох, як и медийох на меншинских язикох.

Округли стол на вовторок, 18. новембра, будзе отримани у просторийох керестурского Дома култури, зоз початком на 11 годзин.

(конєц) зам

ВЕРБАС-ЗАНЯТОСЦ

Обука за 26 жени зоз вербаскей општини

ВЕРБАС, 17. новембар 2008. (Рутенпрес)- Тих дньох у Вербаше будзе отримана обука за 26 нєзаняти жени зоз вербаскей општини котри зтей нагоди достаню елементарни знаня зоз обласци хаснованя компютерскей технолоґиї.

Обука, котра предвидзує програму од 60 годзини, будзе ше одвивац у кабинетох за информатику у ОШ "Светозар Милетич" у Старим Вербаше.

Тоту акцию запровадзел Форум женох Демократскей странки у сотруднїцтве зоз Националну службу за занятосц, а спрам словох предсидательки Форуму, Ясмини Долапчев, циль обуки же би ше зменшала нєзанятосц женох.

Проєкт обуки 26 женох зоз вербаскей општини финансує Покраїнски секретарият за роботу, занятосц и родну ровноправносц.

( конєц) єп

НОВИ САД – ПРОЄКТИ

Стоти котракт за женске поднїмательство

НОВИ САД, 17. новембер 2008. (Рутенпрес) – Директор Ґаранцийного фонду Войводини Ґоран Васич наявел же тот фонд наютре потпише стоти контракт зоз женами поднїмательками у Войводини.

Васич на промоциї проєкту "Вєдно до роботи-вєдно до бизнису" гварел же тот проєкт оможлївел самозанятосц женох и обезпечел ґаранциї и потримовку у реализациї.

Тото проєкт наградзел и Совит Европи за цо Вивершна рада достанє награду у Стразбуру, а приме ю покраїнски премиєр Боян Пайтич.

Васич надпомнул же найвецей "старт ап" кредити того фонду вихасновани за бизнис у туризме, старих ремеслох, продукциї и услугох.

Максимални кредит до милион евра, рочна камата 6,95 одсто, ґрейс период єден рок, а рок отплацованя 6 роки.

Покраїнски секретар за занятосц Мирослав Васин гварел же у плану и нови проєкт за идуци рок, а то "Рок валалских женох" хтори наменєни женом на валалє у рамикох хторого локални активи женох буду орґанизаовац курси роботи на компютеру.

(конєц) ад

СУБОТИЦА – СУДСТВО

Аутоамтизация роботи судох

СУБОТИЦА, 17. новембер 2008. (Рутенпрес) – У Тарґовинским судзе у Суботици почала зоз роботу система за автоматске водзенє предметох.

Предсидатель Висшого Тарґовинского суду Радомир Лазаревич гварел же то проєкт за осучасньованє управи тарґовинских судох хтори обезпечи же би суд у Суботици ефикаснєйше и транспарентнєйше робел.

Помоцнїк министра правди Деян Пашич гварел же заняти у 14 городох обучени за роботу у тей програми, а очекує ше же по конєц рока тоту програму буду мац шицки тарґовински суди у Сербиї.

Тота програма розвита и рамикох реформи судства, а финансує го Америцка аґенция за медзинародни розвой.

(конєц) ад

16

17