СУБОТИЦА-СПОРТ

Отримани спортски бависка "Яша Баков"

СУБОТИЦА, 1. септембер 2008. (Рутрнпрес) – В соботу, 30. авґуста у орґанизациї Дружтва Руснацох у Суботици, отримане змаганє у одбойки на писку на Паличу, дзе ше змагали шейсц екипи: зоз Нового Саду, Руского Керестура, Вербасу и три екипи зоз Суботици - два женски и єдна хлопска.

Найуспишнєйша була екипа зоз Нового Саду, друге место освоєла екипа зоз Руского Керестура, треце Дружтво Руснацох у Суботици, штварте Суботица-жени, пияте екипа Основней школи "Матко Вукович"- Суботица и шесте Вербас.

(конєц)кп

СУБОТИЦА – ЗДРАВЄ

Почал робиц перши погон за знїчтожованє медицинского отпаду

СУБОТИЦА, 1. септембер 2008. (Рутенпрес) – Концом прешлого тижня у суботицким Шпиталю почал зоз роботу погон за знїчтожованє опасного медицинского отпаду, як часц проєкту технїчней потримовки за руководзенє зоз медицинским одпадом.

Тот проєкт водзи Министерство здравя Сербиї зоз финансийну потримовку Европскей аґенциї за реконструкцию, котра за тоту намену видвоєла седем милиони евра.

Проєкт почати 2006. року, а требал би будз закончени 2009. року кед у Сербиї буду вибудовани 78 таки погони и обезпечени 25 авта за транспорт инфективного отпаду, од котрих єдно уж у суботицким шпиталю.

Суботица єден од перших реґионалних центрох у хторим почал функционовац таки способ знїчтожованя медицинского отпаду. Суботицки шпиталь з тей нагоди достал нове, сучасни авто хитней помоци.

(конєц)кп

РУСКИ КЕРЕСТУР - ОБРАЗОВАНЄ

Школа пририхтана за нови школски рок

РУСКИ КЕРЕСТУР, 1. септембер 2008. (Рутенпрес) - Пред початком нового школского 2008/9. рока, котри почина нєшка ,1. септембра, у Основней школи и Ґимназиї “Петро Кузмяк” у Руским Керестуре, шицко порихтане же би стари и нови школяре ознова шедли до школских лавкох.

Нєшка, школяре од першей по пияту класу основней школи треба же би пришли до нового школского будинку на 8 годзин рано, як и ґимназиялци.Школяре першей и другей класи основней школи треба же би на 8 годзин пришли до школского будинку "Замок" дзе и того року буду мац наставу.

Школяре основней школи од шестей по осму класу у септембру наставу починаю у пополадньовей змени та треба же би на пондзелок, 1. септембра до школи пришли на 14 годзин.

По словох директора Школи Янка Хому, и того року окончени шицки потребни пририхтованя коло отримованя школского будинку, набавки наставних средствох, а тиж и кадрох.

До першей класи ОШ руша 37 школяре, а до першей класи Ґимназиї єдно одзелєнє на руским язику дзе по тераз уписани 11 школяре и єдно оддзелєнє на сербским наставним язику зоз 30 школярами.

После длугшого часу ришени проблем кадра за английски язик понеже у за Основну школу прията нова дипломована професорка Мартина Ґшвенґ зоз Вербасу.

(конєц) маф

РУСКИ КЕРЕСТУР - ОБРАЗОВАНЄ

Туристични технїчар аж нарок

РУСКИ КЕРЕСТУР, 1. септембер 2008. (Рутенпрес) - Отверанє нового напряму - туристични технїчар остава нєвитворене у тим школским року, гварел Янко Хома, директор керестурскей Ґимназиї “Петро Кузмяк”.

Вон гварел же дати обецунки же нови напрям годзен будз запровадзени аж у наступним школским 2009/10. року и то зоз наставу на сербским язику.

Най здогаднєме, за запровадзенє нового напряму керестурска Ґимназия ище у марцу того року достала допущенє од Покраїнского секретарияту за образованє и културу.

До нєпорозуменя пришло у Министерстве простиви, алє пре пременку власци, та павзу у роботи Скупштини, тота вимога годна буц розришена познєйше.

(конєц) маф

РУСКИ КЕРЕСТУР - ОБРАЗОВАНЄ

Шкоски рок почина 1. септембра и у ПУ "Бамби"

РУСКИ КЕРЕСТУР, 1. септембер 2008. (Рутенпрес) - Нови школски 2008/9. рок 1. септембра почина и у Предшколскей установи "Бамби" у Кули и у єй керестурским оддзелєню “Цицибан”.

Того року у полудньовим пребуваню у керестурским оддзелєню маю уписано 51 дзецко предшколского возросту котри буду подзелєни до двох воспитних ґрупох, и 18 дзеци котри рок младши и котри до предшколскей оводи буду ходзиц два роки.

Приманє шицких предшколских дзецох окончи ше у будинку оводи з початком на 9 годзин, дзе треба же би их приведли родичи.

До цалодньового пребуваня у тей Предшколскей установи уписани 79 дзеци возросту од єдного по 5 роки, котри подзелєни до трох воспитних ґрупох: яшельковей, младшей и штреднєй, а буду робиц и у предполадньовей и у пополадньовей змени.

И цалодньове пребуванє дзецох почнє на пондзелок, 1. септембра, у ранших односно пополадньових годзинох, як то з розпорядком установи предвидзене.

(конєц) маф

СУБОТИЦА – ПРОСВИТА

Шицки дзеци буду мац место у оводи

СУБОТИЦА, 1. септембер 2008. (Рутенпрес) – У Суботици, спрам попису у маю мешацу, єст 150 дзеци предшколского возросту вецей як цо виноша капацитети Предшколскей установи "Наша радосц".

Предшколска установа, зоз помоцу суботицкей локалней самоуправи ришела проблем зоз обезпечованьом додатного простору, так же скоро шицки дзеци у новим школским року буду мац места у оводох.

Додатни простори ше находза у основних школох "Йован Йованович Змай" и "Сеченї Иштван" и у обєкту предшколскей установи хтори по тераз хасновала єдна нєвладова установа.

У обєктох “Нашей радосци” буду змесцени вецей як 4 тисячи дзеци.

(конєц)кп

СУБОТИЦА - ПРИВРЕДА

Отвера ше канцеларию за розвой валалу

СУБОТИЦА, 1. септембер 2008. (Рутенпрес) - У рамикох Аґенциї за розвой општини Суботица, 1. септембра почина зоз роботу реґионална канцелария за рурални розвой. и вона єдна файта пункту републичного министерства польопривреди за швидше розвиванє валалох..

Канцелария ше находзи у будинку Реґионалней привредней комори, и уж од 25. септембра по 26. децембер буду рґанизовани фахово преподаваня зоз рижних обласцох польопривреди.

(конєц)кп

16

17