РУСКИ КЕРЕСТУР - НАЦИОНАЛНИ СОВИТ

На ятре схадзка Предсидательства

РУСКИ КЕРЕСТУР, 8. януара 2010. (Рутенпрес) - На ютре, 9. януара, у Новим Садзе будзе отримана схадзка Предсидательства Националного совиту Руснацох.

Предсидательство Националного совиту будзе бешедовац о уписованю Руснацох до Окремного виберанкового списку, як и о означованю 17. януара - наступного Националного швета Руснацох у Сербиї.

Схадзка Предсидательства Националного совиту ютре будзе отримана у просторийох Завода за културу войводянских Руснацох у Новим Садзе, з початком на 11 годзин.

(конєц) зам

РУСКИ КЕРЕСТУР - БЕЗПЛАТНИ АКЦИЇ

Вчера достали коло 250 Керестурци

РУСКИ КЕРЕСТУР, 8. януар 2010. (Рутенпрес) - И у Руским Керестуре стреду, 6. януара, почало дзелєнє 1 700 динарох, хтори ше достава од держави за безплатни акциї явних подприємствох.

Пенєж сцигнул и на Пошту и на рахунки до двох керестурских банкох, медзитим, з оглядом же пре Вилїю по старим календаре, Пошта и банки стреду робели лєм до дванац годзин, пред Пошту того дня була барз велька гужва, людзе стали и вонка, опрез будинку.

Як дознава Рутенпрес, стреду на Пошти по 1 700 динари за безлатни акциї видате коло 150 Керестурцом.

Пенєж за безплатни акциї сцигнул и на рахунки Керестурцох у банкох, дзе є стреду видати коло 100 особом, та мож повесц же нєшка коло 250 Керестурци и подзвигли по 1 700 динари за безплатни акциї.

У банкох нє було гужви и видаванє пенєжу идзе досц швидко, док на Пошти то дакус спомалшенше, понеже ше преверює Потвердзенє о додзелєним динарским рахунку хторе ше доставало при уписованю безплатних акцийох и особну карточку.

Ґу тому, цо нє обовязне, алє є лєм на вимогу власнїка, Пошта видава и информативне "Потвердзенє о власносци пейц безплатних акцийох Нафтней индустриї Сербиї".

Тото Потвердзенє ше видава лєм у Пошти, нє и у банкох, и у керестурскей Пошти стреду видати лєм даскельо таки Потвердзеня.

З оглядом же вчера, 7. януара бул нєроботни дзень, видаванє пенєжу за безплатни акциї будзе предлужене нєшка, 8. януара.

(конєц) зам

ШИД - ПРИВРЕДА

Саям руских привреднїкох

ШИД, 8. януар 2010. (Рутенпрес) - У рамикох тогорочней централней програми означованя Националного швета Руснацох у Сербиї 17. януара, 16. и 17. януара у Шидзе будзе отримани Саям рускей привреди.

У тим напряме Шидянє формовали и окремни Орґанизацийни одбор, на чиїм чолє член Националного совиту Руснацох и привреднїк Юлиян Ковач, а руским привреднїком по наших местох тих дньох послати допис-информация о Сайме, як и приява за участвованє.

Шицки руски привреднїки хтори заинтересовани мац свой штанд на Сайме рускей привреди, най ше явя Юлиянови Ковачови на тел.:(022)714-331; моб.:064/124 24 99, лєбо на мейл: julijankovac@neobee.net , найпознєйше по 15. януар того року.

Саям, односно штанди привреднїкох буду поставени у просторийох Руского двору; Саям будзе отворени 16. януара на 11 годзин, заварти ютредзень, 17. януара на 18 г., а под час Сайма, на нєдзелю, 17. януара, у Шидзе будзе отримани и Округли стол з тему "Можлївосци привредного сотруднїцтва".

(конєц) зам

РУСКИ КЕРЕСТУР-ЗДРАВСТВО

Сцигли ище 100 вакцини

РУСКИ КЕРЕСТУР, 8. януар 2010. (Рутенпрес) – Прешлей стреди, до Здравственей амбуланти у Руским Керестуре сцигли нови 100 дози вакцини прицив вируса типа А Ха-1 Ен-1, а до цалого Дому здравя у Кули, дзе спада и керестурска амбуланта сцигли нови 400 дози.

Попри 100 вакцинох до амбуланти, 20 вакцини однєшени и до Дому за старих у Керестуре, и уж перши дзень було надосц заинтересованих котри достали вакцину, и по словох др Златани Надьовей и тоти нови дози вакцини годни швидко буц потрошени.

Медзи нїма застали зме и др Дюру Мученския, народного посланїка котри пришол вакцину прияц у своїм валалє.

Попри сто дозох вакцини котри на два заводи уж подзелєни гражданом Руского Керестура, зоз новима сто, вкупно 200 вакцини сцигли до керестурскей Здравственей амбуланти.

Од тих котри ше вакциновали ревакциновац ше муша особи старши од 60 рокох як и дзеци возроста од 6 мешаци по 8 роки живота.

(конєц) маф

РУСКИ КЕРЕСТУР-ОБРАЗОВАНЄ

Школски рок ше предлужує пондзелок 11. януара

РУСКИ КЕРЕСТУР, 8. януар 2010. (Рутенпрес) – У ОШ и Штреднєй школи зоз домом школярох "Петро Кузмяк", як и у других войводянских школох, на пондзелок 11. януара почина предлуженє першого полроча чечуцого школского року.

Предлужене перше полроче ше закончи 15. януара, шлїдза два днї викенду, а од 18. януара почнє друге полрочє чечуцого школского 2009/10. року.

Най здогаднєме, розпуст у Войводини почал два днї скорей як звичайно, тє. 21. децембра, а седем днї скорей и у цалей Сербиї, по препоруки Министерства проствити, а пре ширенє епидемиї новей ґрипи.

(конєц) маф

РУСКИ КЕРЕСТУР-ВИРСКИ ЖИВОТ

Преславене Богоявлєнє Господнє

РУСКИ КЕРЕСТУР, 8. януар 2010. (Рутенпрес) – Стреду, 6. януара, у керестурскей парохиї преславене швето Богоявлєнє Господнє, єдно з найстарших и найвекших християнских шветох.

Швето парохияном зоз своїм присуством возвеличал и преосвящени владика кир Георгий Джуджар котри зоз трома домашнїма священїками предводзел вельку Архиєрейску Службу Божу зоз вельким водосвятийом тє. пошвецаньом богоявлєньскей води.

Толкуюци значенє швета владика наглашел значносц и нашого власного кресценя котре значи препородзенє з води и з Духа, и мало би тирвац цали наш живот.

Владика визначел и вецейнїсту хасновитосц пошвеценей богоявлєньскей води котру парохиянє потим однєсли дому, а котре ше дожиє єдино по вири.

У тим змислу ма значенє и пошвецанє обисцох котре у керестурскей парохиї почало нєшка, и ютре а по нєдзелї ше предлужує у наступних одприлики двох тижньох.

(конєц) маф

ПРЕШОВ (СЛОВАЦКА) - ДУХОВНИ ЖИВОТ

Календар за грекокатолїкох

ПРЕШОВ (СЛОВАЦКА), 8. януар 2010. (Рутенпрес) - Початком децембра прешлого року у виданю Здруженя святого Йоана Крестителя, зоз друку вишол "Гекокатолїцки русински календар".

Як гутори його сама назва - Календар наменєни Русином грекокатолїком у Словацкей, друковани є на азбуки, алє у нїм єст статї и зоз латинку.

Редакцию Календара творя о. Франтишек Крайняк, писатель Осиф Кудзей, о. И Барна, о. Ярослав Поповец, Милан Ґай, док технїчни редактор М. Костїлник.

Попри самей календарскей часци шветох по грегориянским и юлиянским календаре, кнїжка на 146 бокох приноши велї духовни и шветовни статї, як поведзене з нагоди його виходзеня - "за розум и душу".

(конєц) зам

16

17

18

19

20

21