НАЦИОНАЛНИ СОВИТ - НАЦИОНАЛНЕ ШВЕТО

Нєшка и ютре означованє Националного швета Руснацох по наших местох

НАЦИОНАЛНИ СОВИТ, 15. януар 2010. (Рутенпрес) - Попри централней шветочносци означованя 17. януара у Шидзе, Националне швето Руснацох у Сербиї того викенду, з пригоднима приємами и програмами, будзе означене и по местох дзе жию Руснаци у Войводини.

Националне швето у векшини наших местох з пригоднима програмами будзе означене у Подружнїцох Националного совиту, односно КУД-ох, 15. и 16. януара, пред Шветом.

Нєшка, 15. януара, пригодни програми и приєми, на хтори буду поволани и представнїки локалней самоуправи, буду отримани у Коцуре, Кули, Руским Керестуре, Суботици, Сримскей Митровици, Новим Орахове и Вербаше.

Означованє Националного швета Руснацох у Коцуре будзе отримане од 12 г. у Месней заєднїци, у Кули, тиж од 12 г. у КУД "Др Гавриїл Костельник", а у Руским Керестуре, од 14 г. у Хорскей сали Дома култури.

Нєшка, 15. януара, Националне швето од 14 г. будзе отримане и у просторийох Дружтва Руснацох Суботици; од 18 г. у Сримскей Митровици, од 19 г. у Руским доме у Новим Орахове, источасно и у Вербаше, у КПД "Карпати".

На соботу, 16. януара, Националне швето Руснацох од 12 г. будзе означене у Новим Садзе, у просторийох Руского културно-просвитного дружтва, а истого дня, лєбо на саме швето, на нєдзелю - и у Дюрдьове, од 11,30 годзин у просторийох КУД "Тарас Шевченко".

Тиж так, на пригодни способи и прилагодзено возросту, Националне швето Руснацох будзе означене и у предшколских установохо и школох дзе ше порядно, лєбо факултативнои виучує руски язик по наших местох.

(конєц) зам

ШИД - НАЦИОНАЛНЕ ШВЕТО

Шид порихтани за централну шветочносц з нагоди 17. януара

ШИД, 15. януар 2010. (Рутенпрес) - Централна програма тогорочного, трецого по шоре означованя 17. януара - Националного швета Руснацох у Сербиї будзе отримана у Шидзе, праве на Швето, на нєдзелю 17. януара.

Централна програма и Шветочна академия, источасно буду и увод до торогорочного означованя двох значних ювилейох Руснацох у Шидзе - 200-рочнїци од формованя рускей грекокатолїцкей парохиї у Шидзе и 90-рочнїци од початку орґанизованого културно-просвитного живота у Шидзе, кед 1920. року у тим месце формована Руска читальня.

Попри културних змистох, з нагоди Националного швета, 16. и 17. янура у Шидзе будзе отримани и Саям рускей привреди, у рамикох хторого на нєдзелю, 17. януара, будзе отримани и Округли стол о можлївосцох привредного сотруднїцтва.

У рамикох централней програми, на нєдзелю, 17. януара, у шидскей церкви будзе отримана Архиєрейна Служба Божа, хтору, як плановане, будзе предводзиц наш владика кир Георгий.

После Служби, од 18 годзин, у сали Културно-образовного центру у Шидзе будзе отримана Шветочна академия з нагоди Националного швета Руснацох у Сербиї, а после нєй и коктел за госцох, публику и учашнїкох програми у голу Културно-образовного центру Шид.

Попри представительох локалней самоуправи Шид, представительох з наших местох, представительох националних совитох других националних меншинох, представительох амбасадох дзепоєдних жемох у Беоґрадзе, очекує ше же на Шветочней академиї з нагоди нашого Националного швета буду присуствовац и представителє державних институцийох Републики Сербиї и Автономней Покраїни Войводини.

(конєц) зам

КОЦУР-НАЦИОНАЛНЕ ШВЕТО РУСНАЦОХ

Нєшка ше отрима академия з нагоди националного швета Руснацох

КОЦУР, 15. януар 2010. (Рутенпрес) – Нєшка ше у коцурскей Месней заєднїци, з початком на 12 годзин, отрима святочна академия з нагоди 17. януара, Дня Руснацох.

Академию орґанизовали Подручна кондзелария Националного совиту у Коцуре и члени Националного совиту Руснацох зоз Коцура.

Академия будзе мац три цалосци у хторих ше будзе бешедовац о трох сеґментох животу рускей националней заєднїци на тих просторох-историї приселєня, вирским живоце и о школстве при Руснацох а на концу будзе бешедоване о нєшкайшим стану при войводянских Руснацох.

Медзи бешеднима часцами, шпивацка ґрупа КУД Жатва одшпива дазкельо шпиванки прикладни за таку нагоду. Програма ше закончи зоз коктелом за присутних.

Окрем других, на академиї ше обчекує присуство чолних людзох општини Вербас. Їх присуство ше вихаснує за перши розгварки о преслави Дня Руснацох 2011. року кед Коцур ма буц домашнї централней преслави.

(конєц) цики

ВЕРБАС – ДЗЕНЬ РУСНАЦОХ

Дзень Руснацох у Вербаше преслави ше у КПД "Карпати"

ВЕРБАС, 15. януар 2009. (Рутенпрес) –У Културно просвитним дружтве "Карпати" у Вербаше нєшка на 19 годзин будзе академия з нагоди 17. януара, Националного швета Руснацох у Сербиї.

У програми наступи хор "Карпатох", шпивацка ґрупа и солисти дружтва, а писнї наших визначних поетох буду читац Нада Лендєр и Дияна Мученски.

На святочносц поволани предсидатель општини др Желько Видович зоз сотруднїками, представїки обидвох грекокатолїцких церквох и парохийох у Вербаше, а очекує ше и приход представнїкох Националного совиту Руснацох.

На академию поволани и представнїки установох зоз обласци култури и образованя у општини Вербас: Културного центра, Народней библиотеки, основних школох у Вербаше, у хторих ше факултативно виучує руски мацерински язик.

На програму з нагоди Дня Руснацох поволани и представїки дружтвох зоз хторима КПД "Карпати" подписали протоколи о сотруднїцтве, як цо Спортске друштво "Йоаким Киме Виславски" у Старим Вербаше, мадярске КУД "Кароль Сирмаи" и Дружтва гусларох Нєґош.

Националне швето Руснацох будзе означене и на годзинох мацеринского язика у шицких штирох основних школох у Вербаше у хторих ше пестує руски мацерински язик.

(конєц) там

РУСКИ КЕРЕСТУР/КУЛА - НАЦИОНАЛНЕ ШВЕТО

Нєшка пригодни приєми з нагоди 17. януара

РУСКИ КЕРЕСТУР/КУЛА, 15. януар 2010. (Рутенпрес) - З нагоди 17. януара, Националного швета Руснацох у Сербиї, нєшка, 15. януара, у Руским Керестуре и Кули буду отримани пригодни приєми у орґанизациї Националного совиту, односно його Подручней канцелариї у Кули.

Приєм зоз коктелом за представительох месних дружтвених и привредних орґанизацийох, представительох кулскей општини, як и поєдинцох з котрима сотрудзує Национални совит Русанцох, у Руским Керестуре на ютре будзе отримани з початком на 14 годзин у Хорскей сали Дома култури.

Пригодни приєм з културно-уметнїцку програму за представительох кулскей општини, будзе отримани и у Кули, у просторийох руского КУД "Др Гавриїл Костельник", з початком на 12 годзин.

На пригодни способи Националне швето Руснацох будзе означене у керестурским оддзелєню Предшколскей установи "Бамби", у основей и у штреднєй школи.

(конєц) зам

СРИМСКА МИТРОВИЦА - НАЦИОНАЛНЕ ШВЕТО

Поетски вечар

СРИМСКА МИТРОВИЦА, 15. януар 2010. (Рутенпрес) - У Барокней сали Музея Сриму у Сримскей Митровици, нєшка, 15. януара, з початком на 18 годзин, будзе отримана пригодни приєм и програма з нагоди означиваня Националного швета Русанцох у Сербиї.

Як Рутенпрес дознава од предсидателя Дружтва Руснацох Сримскей Митровици Владимира Балащака, у рамикох означованя Националного швета, у Сримскей Митровици буду представени и поетски твори Славка Виная, зоз збирки "Триолоґия" и литературного зборнїка "По нїткох Михалового лєта" з конкурса "Сон о карпатских горох" отриманого у Польскей.

(конєц) зам

ВЕРБАС – ОТКАЗИ

Министерства глєдаю 43 откази у општини Вербас

ВЕРБАС, 15. януар 2010. (Рутенпрес) – Гоч Министерство за локалну самоуправу и Министерство финансийох преценєли же у службох локалней самоуправи и явних подприємствох и установох у општини Вербас звишок 43 роботнїки, предсидатель општини др Желько Видович очекує же число одпущених будзе меньше.

Спрам препорукох, зменшанє числа занятих треба же би ше реализовало у општинскей управи, Народней библиотеки "Данило Киш" , Културним центру Вербас и Центру за физичну културу "Драґо Йовович".

"Глєдали зме од министерствох додатни час за реализованє тих їх розказох. Послали зме им списки и додатну документацию и концом мешаца очекуєме кноєчни одвит на нашу вимогу же би ше число одпущених зменшало”, гвари Видович.

По його словох, число одпущених будзе меньше од 43 роботнїкох, бо у предходней документациї нє наведзени роботни места хтори локална самоуправа муши отвориц, як цо Канцелария за младих, Канцелария за Ромох, Канцелария за локални економски розвой, Пореска управа и ище даєдни, хтори нє предвидзени у претходней систематизациї.

"То нє значи же одпущованя нє будзе, бо ше систематизация, хтору препише Министерство за локалну самоуправу муши випочитовац у подполносци”, гварел Видович.

(конєц) там

НОВИ САД- КУЛТУРА

Перша кнїжка Ирини Гарди Ковачевич на сербским язику

НОВИ САД, 15. януар 2010. (Рутенпрес)- Тих дньох зоз друку вишла найновша кнїжка Ирини Гарди Ковачевич, "Сказки" котру пририхтал Владимир Стеванов а на сербски язик сказки преложела авторка.

- То моя перша кнїжка на сербским язику и вона видрукована у едициї "Завичайни клуб" котри иснує у рамикох Городскей библиотеки Нового Саду. Тота едиция афирмує войводянску литературу националних заєднїцох з цильом же би указала нє лєм розличносц алє и заєднїцки литературни нїтки медзи народами котри ту жию, виявела за Рутенпрес Ирина Гарди Ковачевич.

Авторка у кнїжки обявела 15 сказки на сербским язику котри ше першираз нашли пред читачами. Слово о сказкох за котри авторка нашла инспирацию у рускей усней литератури як и хронїчарских записох о Руским Керестуре.

Ирина Гарди Ковачевич (1944.) за собу ма даскельо збирки поезиї за дзеци и одрослих, кнїжки прози, драмски тексти и штири монодрами. Заступена є у даскелїх антологийох поезиї, а єй литературни твори прекладани на сербски, словенацки, македонски, италиянски, мадярски, словацки, албански и румунски язик.

За свою литературну творчосц авторка наградзована вецей раз, а найпознатши припознаня то "Искри култури" и медзинародна награда "Александар Духнович".

Друкованє кнїжки "Сказки" Ирини Гарди Ковачевич помогла Городска управа за културу Нового Саду и Покраїнски секретарият за образованє и културу.

(конєц) єп

КОЦУР-ВАКЦИНАЦИЯ

У Коцуре ше вакциновали 170 особи

КОЦУР, 15. ЯНУАР 2010. (Рутенпрес) – У коцурскей амбуланти потрошени 70 дози вакцини процив вирусу Х1Н1 хтори до Коцура сцигли перших дньох того року.

То значи же ше у Коцуре вкупно вакциновали 170 особи бо перши контиґент од 100 вакцинох, у Коцуре потрошени концом прешлого року.

Остатнїх дньох ше у Коцуре могло обачиц звекшане интересованє за вакцинацию та коцурска амбуланта поручела нови количества вакцини хтори пошвидко маю сцигнуц до Коцура.

Цо ше дотика вакцинациї школских дзецох, вона ище нє окончена а як зме дознали од руководзацих школи, од 413 коцурских школярох, за вакцинацию ше приявели коло 100 школяре.

(конєц) цики

ВЕРБАС – СТРАНКИ

ЛСВ основала месни одбор у Змаєве

ВЕРБАС, 15. януар 2010. (Рутенпрес) – Лиґа социялдемократох Войводини основала месни одбор у Змаєве у општини Вербас. На сновательней слупштини, на хотрей присуствовали 24 члени странки, за предсидателя Месного одбору вибрани Боривоє Жуґич, за подпредсидателя Светозар Ботич, а за секретарку Сузана Црепуля.

По словох предсидателя Општинского одбора ЛСВ Мариа Мажара, "тота странка по тераз основала месни одбори у шицких трох месних заєднїцох у Вербаше, у Коцуре и тераз у Змаєве.

По його словох, у Савиним Селу и Равним Селу функционую инициятивни одбори, хтори планую по конєц фебруара отримац сновательни скупштини ЛСВ.

(конєц) там

НОВИ САД – ПОЛИЦИЯ

Транспортне нєщесце автобуса Севертранс

НОВИ САД, 15. януар 2009. (Рутенпрес) – У транспортним нєщесцу хторе ше случело вчера при Бешкей на авто-драги Нови Сад-Беоґрад повредзени 17 особи.

Як гварене зоз новосадскей полициї автобус зомборского подприємства "Севертранс" ше преврацел и при тим путнїки достали лєгчейши калїченя, та їх 11 после интервенцийох у Клїнїчним центру Войводини пущени на дальше лїченє дому.

Як гварел началнїк Урґентного центра Зоран Дєрманов медзи покалїченима и вожач и кондуктер автобуса, а єден пациєнт чежше покалїчени.

По словох началнїка Полицийней управи Нови Сад Стевана Крстич автобус ше пре ище вше нєпознати причини преврацел коло 8:30 рано, кед прешол мост при Бешкей.

У автобсу було 25 путнїки, а причини нєщесца буду познати после полицийного виглєдованя, док вожач упуцени на алко тест.

(конєц) ад

НОВИ САД – ВОДОСТОЙ

Мири охрани од вилївох и на Дунаю

НОВИ САД, 15. януар 2009. (Рутенпрес) – Вчера и на Дунаю уведзени порядни мири охрани од вилївох, на длужини од 65 километери, гварене у ЯП "Води Войводини".

Тераз длужина охрани од вилївох у Войводини виноши 398,2 километери, од чого 342,5 километери порядна охрана, а 55,68 позарядова.

Лєм на Беґею, хтори у опаданю, утаргнута порядна охрана од вилївох, док на других войводянских водоцекох вона ище на моци, гоч уровень рикох опадує, або стаґнує.

(конєц) ад

16

17