РУСКА МАТКА

Руски Керестур

Маршала Тита 59

На Порядней рочней Скупштини Рускей матки, хтора отримана 11. фебруара 2006. року у Новим Саду, утвердзени предкладаня националних символох Руснацох у Сербиї, хтори понукнути Националному совиту рускей националней заєднїци у Сербиї на розпатранє и прилапйованє, и заєднїцки национални символи Руснацох/ Русинох/ Лемкох, хтори буду понукнути Шветовей ради РРЛ и 9. Шветовому конґресу Руснацох/ Русинох/ Лемкох, хтори будзе отримани у юнию 2007. року у Сиґету на Тиси у Румуниї, на розпатранє и прилапйованє.

За национални символи предложени:

а) Герб зоз карпатским медведзом з правого и 4 белавима и 3 златнима полями з лївого боку герба. Окремносц Руснацох у Сербиї на заєднїцким гербу виражена зоз голубом у руки карпатского медведза и зоз вертикалним польом по штредку герба хторе символизує драгу зоз Горнїци на Долню жем, драгу Руснацох зоз сиверу на юг, зоз Карпатох до Руского Керестура, односно до Бачкей и Сриму,

б) Застава зоз трома горизонталнима полями и фарбами: белаву у висини од єдней половки (двох штварцинох) застави, билу у штредку застави у висини од єдней штварцини застави и червену на сподку застави у висини од єдней штварцини застави и зоз заєднїцким гербом РРЛ у штредку застави,

в) Шветочна писня "Я Русин бул, єсм и буду" на текст Александра Духновича за заєднїцку и Шветочна писня Руснацох у Сербиї "Мой валал Руски Керестур" на текст поету Юлияна Надя и композицию Михайла Бодянца,

г) Шветочни дзень Руснацох у Сербиї: 17. януар, як здогадованє на 17. януар 1751. року кеди Франц Йозеф де Редл, єй велїчества царици Мариї Терезиї, кралїци Мадярскей совитнїк и кральовско-державного Бачского диструкту администратор, у Зомборе подписал перши урядови документ - контракт о насельованю 200 руских греко-католїцких фамелийох на тедишю пустару Вельки Керестур и Шветочни дзень младого Руснака/ Русина/ Лемка: 22. авґуст, кеди у Комлошки у Мадярскей 2002. року отримани перши Шветови камп младих Руснацох/ Русинох/ Лемкох, а хтори дзень уж предложени до календара шветох Зєдинєних нацийох як Дзень младого Русина.