сервис СЧГ -БЕОҐРАД - ПРИВРЕДА

Пререґистрованє поднїмательох

БЕОҐРАД, 30. май 2006. (Рутенпресс) - Термин за безплатне пререґистрованє поднЇмательох зоз општинских, до реґистру Аґенциї за привредни реґистер тирва по 15. юний 2006. року.

Шицки котри ше нє пререґиструю по 15. юний, можу страциц мено под хторим дїловали и нє годни участвовац на тендерох, а нове реґистрованє буду мушиц плациц.

Пререґистрованє фирмох, роботньох, аґенцийох и другого, можу по 15. юний окончиц и у своїх општинох.

Термин за пререґистрованє нє будзе предлужени.

(конєц) мик

НОВИ САД-ПОЛИТИКА

ОСОБНИ КАРТО6КИ НА ЯЗИКОХ МЕНШИНОХ

НОВИ САД, пияток, 2. юний (Рутенпрес)- На соботу, 3. юния, зоз друку виду особни карточки на двох язикох – на сербским, и на єдним з язикох меншинох: мадярским, словацким, румунским, руским, горватским и чешким – гварел за Граждански новини Тамаш Корхец, покраїнски секретар за предписаня, управу и национални меншини.

Тоти документи буду у станїцох полициї идуцого тижня, та гражданє спомнутих националних заєднїцох годни достац особну карточку и на своїм мацеринским язику. Источасно у станїцох полициї буду дати и формулари на спомнутих язикох.

Закон Сербиї о урядовим хаснованю язика и писма зоз 1991. 1992. року дава право националним меншином на двоязични документи, медзитим, потераз особни карточки були лєм на сербским язику.

Медзитим, пошвидко стара особна карточка будзе заменєна з новим, електронским идентификацийним документом (подобне як кредитна карточка). Кажда особна карточка будзе мац свой "чип" и можлївосц автоматского очитованя податкох.

У електронскей особней карточки податки буду дати на анґлийским и сербским язику, а будзе можлївосц уписац податки и на язику и писме националней меншини – гварел Корхец.

(конєц) Сим

НОВИ САД- ЕКОНОМИЯ

МЛАДИ У КАМПАНЇ ЗА ПРОМОЦИЮ ВОЙВОДИНИ

НОВИ САД, 3. юний 2006, (Рутенпрес)- Фонд за потримовку инвестицийох у Войводини – ВИП , розписал Конкурс за идейне ришенє за кампаню промоциї Войводини як инвестицийней дестинациї у иножемстве у периодзе 2006/7. року.

Конкурс отворени од 1. по 15. юний 2006. року, а право участвовац маю студенти Филозофского факултета (оддїл за журналистику), студенти Новинарскей школи и млади новинаре до 35 роки цо жию у Войводини.

Идейне ришенє ма штири елементи: виробок слоґану за кампаню, розробок слоґану у рекламним порученю, новинарски текст о инвестицийним потенциялу Войводини и сценарий за промотивни филм о Войводини.

Найлєпши роботи буду наградзени з одходом до Минхену, Нємецка, на Експо-реал 2006. дзе участвує Фонд, а то будзе у октобре того року.

(конєц) Сим

НОВИ САД - СТЕРИЙОВО ПОЗОРЄ

Загребецки "Скакавци" найлєпши на Стерийовим позорю

НОВИ САД, 4. юний 2006. (Бета-Рутенпрес) - Представа "Скакавци" (КонЇки) Биляни Срблянович, котру режирал Януш Киц а виводол ю Заґребецки театер младих, нєшка преглашена за найлєпшу представу на 51. Стерийовим позорю у Новим Садзе.

Награда за режию додзелєна Деяну Миячу, хтори режирал представу "Скакавци" у виводзеню Югославянского драмского театра (ЮДТ), а Биляна Срблянович наградзена за найлєпши драмски текст.

Жири 51. позоря, у хторим були Йованка Дорота, Бранислава Лиєшевич, Светислав Йованов, Зоран Ерич и председатель Йован Чирилов, дидзелєл штири награди за найлєпши ґлумецки витвореня.

Наградзени Драґан Мичанович за улогу Тесли у представи з истим меном театра "Мадлениянум", Рената Улмански и Исидора Минич за улоги у "Скакавцох" ЮДТ у словенацка ґлумица Урсула Раукар за улогу у заґребецких "Скакавцох"

Лана Цвиянович достала Стерийову награду за костим у представох "Лажа и паралажа" Зомборского театра и "Скакавци" ЮДТ, а Исидора Жебелян наградзена за музику у "Скакавцох" ЮДТ.

Специялна награда додзелєна младому писателю Филипу Вуйошевичу за фалат "Халф-лайф", а перша награда "Почесни круг" додзелєна мадярскому театру "Креатор" за представу "Чарна жем".

Стерийово позорє закончує ше нєшка вечар зоз виводзеньом представи "Наход Симеон" Сербского народного театру, у режиї Томия Янезича, хтору ше бави на чесц наградзених.

(Конєц)там

НОВИ САД- ЗДРАВСТВО

Дезинфикация водоводу у новосадским породилїщу

НОВИ САД , 4. юний 2006. (Рутенпрес)- Всоботу, 3. юния, почала дезинфикация водоводу у породилїщу на Бетаниї у Новим Садзе.

Прешлого тижня у води водоводу новосадского породолїща на Бетаниї пренайдзена бактерия псеудомонас аеруґиноса. Руководство шпиталю рахує же би жридло тей бактериї могло буц у бойлерох и котлох, бо водоводни циви пред тим вимивани.

Одкеди отворени нови будинок породилїща на Бетаниї 7. априла, уж ше на други завод у водоводней системи зявела тота бактерия.

При порядней контроли 26. априла перши раз найдзена спомнута бактерия, а прешлого тижня знова.

Началнїк технїчней служби у шпиталю Драґан Малинович гвари же вимиванє и дезинфикация водоводней системи на Бетаниї будзе тривац два-три днї. Кед же будзе шицко як треба, пациєнти вец знова годни хасновац воду з водоводу и за пице, информує "Дневник"

Директор Клиничного центра др Драґомир Дамянов гвари же шицки пациєнти безпечни, бо хасную лєм здравствено контроловану воду.

Сим (конєц)

БЕОҐРАД - ДРУЖТВО

ПРИЯВИ ЗА ВЖАТИ МАЄТОК ПО 30. ЮНИЙ

БЕОГРАД, 6. юний 2006. (Рутенпрес)-По Закону о приявйованю и евидентованю, власнїки, их нашлїднїки, або правни нашлїднїки котрим вжати маєток без надопольнєня муша найпознєйше по 30. юний того року поднєсц прияви Републичней дирекциї за маєток.

Прияву о вжатим маєтку ше подноши у двох прикладнїкох виключно на формулару ПИО, безпоштредно, або по пошти препоручено Републичней дирекциї за маєток (Ґрачаничка 8, Беоґрад), без огляду чи власнїки вжатого маєтку маю комплетну документацию чи нє.

У случаю нє подношеня прияви, по Закону о приявйованю и евидентованю, власнїки вжатого маєтку нє буду мац право поднєсц вимогу за врацанє маєтку после приношеня Закона о реституциї.

Формулари за подношенє прияви мож достац у явним подприємстве "Службени новини" хторе ма обовязку друкованя и дистрибуованя формуларох, а телефон 011/3060-374.

(конєц) мик