Микола Кучмаш народзени 25. юлия 1936. року у Коцуре. По законченю седемрочней школи у родним месце, теди наволаней проґимназия, закончел Стредню ветеринарску школу у Шабцу (1954) и Висшу педаґоґийну школу на Цетиню (ґрупа ґеоґрафия­история).

По краткей роботи у Месней заєднїци (1955) и Основней школи (1957/58), пол рока робел у Землєдїлскей задруґи у Коцуре. Од 1959. до 1968. року роби як наставнїк, а од 1968. до 1971. року як заменїк директора у Основней школи „Братство­єдинство" у Коцуре, односно остатнї шейсц мешаци як окончователь длужносци директора школи. Потим преходзи до Нового Саду, дзе од 1971. до 1993. року, кед одходзи до пензиї, роби як референт предаваня и предплати у НВРО „Руске слово".

Зоз спортом ше занїмал од младосци, та у родзеним валалє бавел фодбал, столни тенис и шах. Як секретар младежи у Коцуре иницировал формованє шаховскей секциї котра по двох рокох преросла до Шах клуба „Омладинєц". Ту окончовал стаємно длужносц секретара и капитена екипи, єден мандат и предсидателя клуба, а шах ше почал бавиц орґанизовано – рижни турнири за катеґорию, першенство места, уключованє до екипного першенства, пропаґандни турнири з нагоди державних шветох и ювилейох итд.

У месце ше орґанизує Срезки турнир другокатеґорнїкох (1964), Перше пионирске першенство Войводини (1964), Двацете младежске першенство Войводини (1970), а 1967. року Шаховски клуб як єдина валалска екипа уходзи до Першей войводянскей лиґи. Року 1965. клуб достава Октоберску награду СО Вербас.

Седемдзешатих рокох Микола Кучмаш єден час предсидатель Одбору Дома култури у Коцуре, котри формовани при Месней заєднїци и кед орґанизовани валалски културни манифестациї, а аматере посциговали позарядово успихи на рижних уровньох. Бул то час велького одреканя за ньго, алє културу нє напущовал анї по преходзе з роботу до Нового Саду. Та заш лєм, у єдней хвильки мушел охабиц тоту роботу и опредзелїц ше лєм за спорт.

Зоз преходом до Нового Саду (1971), истого року иницироване формованє Шах клуба „Руске слово", а 1973. року клуб уходзи до составу СД „Войводина" и далєй роби под истим меном. У обидвох клубох Микола Кучмаш стаємни секретар и капитен. За кратки час клуб уходзи до Войводянскей лиґи, орґанизує медзинародни турнири под назву „Шаховски таланти" (1974, 1975, 1976), котри прерастаю до Першого купа Европи (1977) и Шветового першенства за омладинки, цо далєй препущене Шаховскому союзу пре вельки финансийни обовязки и роботу.

У тим чаше роби на орґанизованю вецей медзинародних турнирох приятельства (1978, 1980, 1982), та трох отворених медзинародних ткв. Опен турнирох (1983, 1984, 1985).

Од 1972. року запровадзене медзинародне сотруднїцтво и черанка зоз клубами у бувшей Чехословацкей (Тринец, Чадца, Прага), Польскей (Катовице, Пекари Шласки) и Румуниї (Темишвар).

Року 1976. Микола Кучмаш положел испит за тренера у Заводзе за физичну културу Нового Саду, та роби як други тренер у клубе зоз омладинцами, а тренира и Шах клуб „Михаил Таль" у Ветернику. Попри спомнутей секциї у Коцуре, пейц роки водзи и шаховску секцию у ОШ „Коста Трифкович" у Новим Садзе.

Зоз орґанизованьом турнирох и судзи, та поклада за шаховского судию и достава званє покраїнского судиї (1973), союзного судиї (1975) и медзинародного судиї ФИДИ (1981), на Конґресу ФИДИ (Медзинародна шветова шаховска орґанизация) у Зєдинєних Америцких Державох.

Од 1971. до 1975. року селектор є омладинскей шаховскей репрезентациї Войводини, водзи екипу процив селекциї Сербиї и Румуниї, активни є у роботи СД „Войводина", Городского шаховского союзу Нового Саду (два раз бул предсидатель и два раз подпредсидатель), Предсидательства Шаховского союзу Войводини и рижних комисийох, предсидатель Секциї судийох Войводини итд.

Од самого початку Спортских бавискох „Руского слова" член є Орґанизацийного одбору (найвецей як секретар) и окончує шицки роботи на орґанизованю бавискох у вецей конарох екипних и поєдинєчних змаганьох. После 15 рокох пейц роки ше нє отримовало бависка, а вец вон предлужел, самоинициятивно, лєм зоз шахом, живот бависком ище 15 роки, так же ше 2006. року отримаю 30. Спортски бависка „Руского слова".

Зоз своїма написами о шаху зявйовал ше у „Руским слове", „Маку", „Пионирскей заградки" и Календарох, а тиж и у билтенох зоз дзепоєдних турнирох.

Наступал за тоти клуби:

ШК „Омладинєц" Коцур (1952-1970; 1992-1993)

ШК „Партизан" Нови Сад (1970-1971)

ШК „Руске слово" Нови Сад (1971-1973)

ШК „Войводина" Нови Сад (1973-1991; 1998)

ШК „Бубамара" Нови Сад (1994-1995)

ШК „Ґрас" Нови Сад (1996-1997)

ШК „Русин" Руски Керестур (1990-2006, и далєй)

Зоз екипу „Руского слова" почал, а зоз екипу „Войводини" закончел екипни шампионат Югославиї у дописним шаху 1972/1973. року, кед освоєли перше место у держави – найвекши успих. Розуми ше, ту и доставанє званя медзинародного судиї ФИДИ и судзенє. Судзел тоти турнири: