ЧЛОВЕК ЗА ИСТОРИЮ

(Ґу 70-рочнїци од шмерци владики Дионизия Нярадия)

Спомедзи людзох заслужних за грекокатолїцку парохию у Руским Керестуре, и нє лєм у Руским Керестуре, перше место припада Дионизийови Нярадийови, крижевскому владикови, апостолскому администраторови Пряшовского владичества и апостолскому администраторови Карпатскей України, велькому мецени, з єдним словом – оцови народу. Вон – чловек историї и гоч уж лєм цо нє 70 роки од його шмерци, спомин на ньго ище жиє нє лєм у Руским Керестуре, алє и у других часцох кедишнього Крижевского владичества и на велїх других местох у швеце.

Дионизий Няради дзецко Керестура. Ту ше народзел 10. октобра 1874. року у обисцу богобойних родичох – Янка Нярадия и Ани р. Турински. Волали их – Микловшово. Побожни родичи уляли синови до души любов ґу Богу и Церкви. После основней школи дали го до ґимназиї, до першей класи до Винковцох, а вец до нашей семинариї у Заґребе, дзе и матуровал 1894. року.

После матури уписал ше у Заґребе на Богословски факултет, котри закончел 1898. року. Дня 21. децембра 1898. приял поддияконат, 25. децембра дияконат, а 1. януара 1899. року священство у Петровцох. Шицки пошвецаня окончел Юлий Дрогобецки, владика крижевски. Такой после пошвецаня поставени бул за вихователя наших школярох у заґребскей семинариї, а 8. априла истого року послали го до Шиду на парохию. Кельо го ценєли и любели у Шиду шведочи и факт же єдну улїцу у Шидзе наволали – Улїца владики Дионизия Нярадия.

После штирох рокох пастирскей служби у Шидзе, Дионизий Няради постал ректор семинариї у Заґребе, дзе остал полни 12 роки, до 1914., кед му було придане на управу Крижевске владичество. За владику бул пошвецени у Риме на треци дзень Крачуна, 9. януара 1915. року. Пошвецели го у церкви св. Серґия и Вакха македонски владика Лазар Младенов, титуларни владика минденски Неаматалах Караме и титуларни владика халкедонски Петро Коюнуян.

На чолє Крижевского владичества бул полни 25 роки. Були то часи, нєшка би ше поведло – зложени. После Першей шветовей войни створена нова держава – Сербох, Горватох и Словенцох, котра ше познєйше наволала Югославия, а у єй рамикох нашли ше и грекокатолїки Українци у Босней, грекокатолїки у Македониї и грекокатолїки Румунє у Банату, котри подпадли до Крижевского владичества. Требало то шицко орґанизовац, зєдинїц и водзиц. А владика Няради то окончел  як найлєпше могол, бо ґу каждому приступел з вельо християнскей и священїческей любови. Мож шлєбодно повесц же вон свой живот жертвовал за свойо владичество, и нє лєм за свойо.

Од 1920. до 1927. водзел вон и Пряшовске владичество. З його приходом на Горнїцу там подул нови витор. Там владика священїком строго розказал же би у школох дзеци учели народней бешеди, а и у церквох так наказовали. У Пряшове почал видавац новини «Руске слово», видал Библию на народней бешеди и други кнїжочки. Будзел вон там интелиґенцию, особено священїкох и учительох.

А кед ше 1938. створела млада Карпатска Україна, владику Нярадия посилаю и там же би станул на чоло Церкви. За тих пол рока, кельо бул у Хусту, зробел барз вельо на обнови церковного живота. У Оломуцу отворел семинарию за богословох, зволовал схадзки священїкох, путовал по парохийох.

У своєй побожносци владика Няради бул наисце чловек Божи. Одрекол ше шицких приємносцох у живоце. Жил як монах зоз строгим животом у посце и молитви. Ноцами уходзел до крижевскей катедрали и там лєжаци на жеми модлєл ше, часто и зоз слизами у очох. Свойо особни ствари вше подавал другим, а облєкал ше найскромнєйше. Часто нє мал анї «ґрайцара», як ше гвари, бо пенєж дал худобним.

Владика Няради основал нови парохиї у Босней и Славониї. Шицкого 13 нови парохиї. Вельо уваги пошвецел розвою манастирского живота. Постарал ше же би у Осиєку при манастире бул интернат за школярки, а у Шидзе широтинєц. Старал ше за вибудов нових церквох та бул велїм церквом «ктитор и благодїтель». Орґанизовал духовни вежби за священїкох, панїматки, учительки... Орґанизовал побожни дружтва и братства: «Благей шмерци», «Ружанєц», «Апостолат св. Кирила и Методия».

Владика Няради нє бул лєм вожд свойого народу, алє и творец рускей интелиґенциї. Вон школовал надарени дзеци без огляду яку професию себе вибрали. Окреме потримовал и помагал «Просвиту», єй виданя. Вон помогнул же би виходзела українска новинка «Ридне слово» и горватска за Жумберчанох – «Жумберачке новине». А о помаганю видаваня «Руских новинох» и «Календара» нє треба окреме наглашовац. За його пенєж купена и друкарня у Руским Керестуре.

И зоз пирком у рукох владика Няради ширел просвиту и побожносц. Написал вецей як петнац кнїжочки и брошури. И нє лєм по руски. Познати му публиковани роботи, окрем спомнутих, ище и: «Наша прадїдовска вира», «Служба Божа або Литургия». «О женїдби», о святим Йосафатови, о митрополитови Шептицкому и други.

Умар вноци медзи 13. и 14. априлом 1940. року на длужносци у Мрзлим Полю, дзе бул на канонскей визитациї.

о. др Роман Миз