Дзешатого децембра 2006. року наполня ше 100 роки од народзеня Яши Бакова. Нєкаждодньови и всестрани чловек, єденац роки шампион Югославиї у скаканю зоз палїцу, учашнїк берлинскей Олимпияди, облюбени и почитовани тренер, професор и воспитач, єден зоз сновательох "Руского слова", познаватель велїх шветових язикох и културох, Яша Баков остал запаметани вшадзи дзе жил и робел.

Яша Баков народзени 10. децембра 1906. року у Дюрдьове, у худобней селянскей фамелиї. Ище як ґимназиялєц интересовал ше за шицки обласци дружтвеного и спортского живота. У Дюрдьове 1921. року бул снователь Дюрдьовского атлетичного клуба, гоч хлапци бавели лєм фодбал, а Яша бул ґолман. Атлетику полюбел рок-два познєйше як ґимназиялєц у Зренянину, дзе скакал зоз палїцу (2,20 метери) и до далєка 5,58 метери. Бул одлични школяр, алє нємирного духу, та му велї нє предвидзовали же закончи за паноца у Риме. Так и було, алє ту научел италиянски, анґлийски, шпански и латински язик. Врацел ше зоз Риму и почал студирац у Беоґрадзе югославянску литературу, сербскогорватски и французки язик. Дипломовал 1934. року, алє окрем факултетских обовязкох атлетика му була "у креви". Скакал зоз палїцу и участвовал на вецей державних и балканских першенствох, на турнирох у жеми и иножемстве. На єдним таким, у Удинох у Италиї 1935. поставел державни рекорд у скаканю зоз палїцу – 3,60 метери. Тот рекорд му бул и уходнїца за участвованє на Олимпийских бавискох 1936. року у Берлинє. Ту упознал велїх найпознатших шветових атлетичарох, насампредз Джесия Овенса, владара вецей шветових рекордох и освойовача штирох златних медальох, алє далєй од квалификацийох нє пошол. Квалификацийна норма за финале була 3,80 метери. Яша два раз звалєл палїцу, а при трецим пробованю його бамбус ше зламал. Други бамбус нє мал, та його участвованє на остатнїх предвойнових бавискох закончене.

Свою любов ґу атлетики розвивал медзи младима вшадзи дзе ше зявйовал. Кед пришол робиц до Сомбора такой розвил тот конар спорта и Сомборци у тим предвойновим периодзе були познати атлетичаре. После Другей шветовей войни, такой зоз своєй єдинки пришол до Руского Керестура. Робел як професор у нїзшей ґимназиї, алє його спортски дух и далєй нє мировал. Валал котри до теди нє знал цо то атлетика, тераз постал розсаднїк атлетичарох, окреме палїцарох, облюбеней Бакововей дисциплини. Було на дзешатки палїцарох, та ше раз зявели и на фодбалским змаганю у Беоґрадзе и у полчаше демонстровали тоту дисциплину.

Яша Баков розвивал и фодбал на води (ватерполо), шлїзканє (гокей) и други спортски дисциплини. Шицко цо интересовало младеж Баков им знал указац.

Яша Баков нє оставал лєм професор, воспитач и физкултурнїк. Кед пришол до Руского Керестура такой ше уключел и до пририхтованя нових новинох за Руснацох и бул член першей редакциї "Руского слова". Єдноставно, Яша Баков шицко сцел, знал и могол.

Умар 24. октобра 1974. року у Новим Садзе.

Владимир МЕДЄШИ