Ирина Папуґа, професор педаґоґиї (оцец Янко Папуґа, 1914-1998, и мац Цецилия Папуґа, нар. Бесерминї, 1919), народзена 12. новембра 1946. року у Бачинцох, општина Шид, Срим (Войводина, Сербия).

До основней школи ходзела у Бачинцох и Куковцох, а штредню и висшу педаґоґийну школу и Филозофски факултет, наставна ґрупа Педаґоґия закончела у Новим Садзе. Робела у образованю у Руским Керестуре, Покраїнским секретарияту за образованє, науку и културу, а тераз роби у Заводзе за културу Войводини (пред тим Културно-просвитна заєднїца Войводини) у Новим Садзе. Була посланїк Просвитно-културней ради Скупштини АП Войводини, член Просвитного совиту Войводини, помоцнїк покраїнского секретара за образованє, науку и културу, предсидатель Предсидательства Дружтва за руски язик, литературу и културу; тераз є предсидатель Скупштини Дружтва.

Обявела понад 100 написи и прилоги з обласци образованя, просвити и култури на сербским и руским язику у новинох, часописох, едицийох: "Руске слово", "Шветлосц", "Народни календар", "Руски календар", "Заградка", "Мисао", "Педаґоґийна стварносц" "Просвитни прегляд", "Сримски новини", "Сунчани сат", "Шидина", "Пчеса", "Студиа Рутхеница", Зборнїк САНУ и Матици сербскей, на веб-сайту "Руснаци у Панониї" (Канада) итд.

Написала ИСТОРИЮ ШКОЛИ У БАЧИНЦОХ, хтора обявена у Шидскей трибини "Сримских новинох" зоз Сримскей Митровици (1989-1990) и часопису "Шветлосц" НВУ "Руске слово", Нови Сад (1989). Як одвичательни редактор ушорює за видаванє Зборнїки роботох Дружтва за руски язик, литературу и културу "Студиа Рутхеница" (по тераз пририхтала 3-8 число), як и вецей други виданя Дружтва: сликовнїци за дзеци, зборнїк дзецинских писньох, кнїжки з едициї Образованє на руским язику, Литература, Одняте од забуца итд.

Участвовала у роботи вецей виглєдовацких проєктох, медзи хторима и проєкт "Розвиванє, очуванє и унапредзованє руского язика дзецох и школярох" зоз хторим спатрене виучованє и пестованє руского язика з елементами националней култури у местох (школох) дзе жию Руснаци. Вєдно з родичами школярох и управами школох дала значне доприношенє обновйованю пестованя руского язика у понад 20 основних школох, а окреме у сримских местох у хторих жию Руснаци: Шидзе, Бачинцох, Беркасове, Бикичу и Сримскей Митровици. Робела и роби и на виглєдованьох и обявйованю прилогох зоз прешлосци Руснацох у Сриме. У рамикох науково-фахових сходох яки отримани у рамикох Дньох Миколи М. Кочиша у Новим Садзе под назву "Руски учителє и руски школи" (1993) и "Просвитни живот Руснацох у прешлосци" (1998) написала вецей прилоги о руских учительох и воспитно-образовних активносцох Руснацох.

Ирина Папуґа автор двоязичней кнїжки (на сербским и руским язику) РУСИНСКА ҐИМНАЗИЯ – РУСКА ҐИМНАЗИЯ, Руски Керестур, 2000. року. За закладаня у роботи и културно-образовних активносцох достала вецей припознаня, спомедзи хторих: Медаля заслугох за народ, "Златна значка" Културно-просвитней заєднїци Сербиї, Беоґрад, Повеля Основней школи и Ґимназиї "Петро Кузмяк" з нагоди означованя 250 рокох образованя на руским язику (1753-2003) у Руским Керестуре.

Податки о Ирини Папуґовей унєшени до ЕНЦИКЛОПЕДИЇ Нового Саду, 2002. року.

Жиє и роби у Новим Садзе.