НАЦИОНАНИ СОВИТ - УПИСОВАНЄ ДО ОВС

Квота сполнєта

НАЦИОНАЛНИ СОВИТ, 6. марец 2010. (Рутенпрес) – Руска национална заєднїца у Сербиї зоз вчерайшим дньом до окремних виберанкових спискох мала уписано 7 250 припаднїки рускей националней меншини, сообщело Министерства за людски и меншински права Републики Серби.

У информациї котра з тей нагоди дата за явносц, Национални совит рускей националней меншини гвари " же предвидзена квота за нашу меншину од 6 363 уписаних, у тей хвильки виполнєта уж з приблїжно 114 одсто, цо представя вельки успих за цалу нашу заєднїцу и же ше Руснаци находза медзи 10 меншинами хтори по тераз сполнєли услов за нєпоштредни виберанки за нови национални совити.

- По конєц уписованя до ОВС, тото число вшелїяк будзе и векше, и подрозумює ше же тото право треба вихасновац до конца предвидзеного термину, по 9. марец, понеже нам важни кажди припаднїк нашей заєднїци. Винчуєме и дзекуєме шицким хтори ше по тераз уписали - гвари ше у вчерайшей информациї Националного совиту Руснацох.

(конєц) зам

РУСКИ КЕРЕСТУР - НАЦИОНАЛНИ СОВИТ

Нєшка схадзка у Орахове

РУСКИ КЕРЕСТУР, 6. марец 2010. (Рутенпрес) - Нєшка, 6. марца, у Новим Орахове будзе отримана схадзка Националного совиту Руснацох.

На нєшкайшим зашеданю, Национални совит будзе розпатрац закончуюци рахунок за прешли, та финансийни план за перши шейсц мешаци того року.

На дньовим шоре буду и питаня вязани за верификованє одлукох хтори стреду принєшени на схадзки Управного одбору Завода за културу Войводянских Руснацох, як и информациї о уписованю Руснацох до Окремного виберанкового списку.

Схадзка у Новим Орахове будзе отримана у просторийох тамтейшого КУД "Петро Кузмяк", з початком на 11 годзин.

(конєц) зам

НОВИ САД - КУЛТУРА

Прилапени звити и програма

НОВИ САД, 6. марец 2010. (Рутенпрес) - Стреду, 3. марца, у Новим Садзе отримана 11. схадзка Управного одвору Заводу за културу войводянских Руснацох, дзе на самим початку, з минуту цихосци дата почесц покойному Ярославови Саболови.

Управни одбор єдногласно прилапел Звит о роботи, Програмни звит и Финансийни звит Заводу за прешли, 2009. рок.

Управни одбор за тераз нє прилапел дате задзекованє предсидательки Управного одбору Заводу за културу ВР Любици Отичовей на тоту функцию, з толокованьом же би ше го розпатрало после конституованя нового Националного совиту, нсампредз пре процедурални причини, так же Отичова и надалєй предсидателька УО нашого Заводу.

Анализуюци остатню Шветочну академию централней преслави Националного швета у Шидзе, вона оценєта як удатна, а такой дати и одредзени напрямки за пририхтованє тей програми з нагоди нашого Швета нарок, у Коцуре.

Окремна розправа була пред прилапйованьом финансийного звиту и проєктох у тим року, найвецей о потреби финансованя фаховей помоци културно-уметнїцким дружтвом, за цо у предлогу нє були опредзелєни средства.

Гоч намаганє же би Завод бул институция хтора ше стара о квалитету и капиталних проєктох у култури, направени баланс зоз средствами з якима Завод ма розполагац у 2010. року, так же фахова помоц по наших КУД-ох, як "Проєкт фаховей потримовки КУД-ом и семинари", будзе єден з проєктох Заводу.

Як єдни з найвекших проєктох буду спатранє политики финансованя и орґанизованя нашей култури на локалним уровню (по општинох и местох дзе жиєме), пописованє нотного материялу з дотерашнїх "Червених ружох" (а вочи ювилейному Фестивалу рускей култури), як и пририхтованє и видаванє компакт-диска Националней оркестри Руснацох.

Надалєй, Завод будзе участвовац у видаваню Руско-сербского словнїка и видаваню Другого тому позбераних творох Гавриїла Костельника.

Ґу тому, предлужи ше пописованє музейного скарбу у Коцуре и Шидзе, а у планє и видаванє видео-моноґрафиї Коцура, цо тиж у напряме квалитетнєйшей и рижнороднєйшей програми означованя Националного швета, на рок у Коцуре.

Вєдно, прейґ 30 рижни проєкти у обласцох Информативно-документацийней, Розвойней, Програми за сотруднїцтво, Промоциї Заводу, Презентациї рускей култури, Програми образованя и усовершованя, як и у других програмних задаткох тим року, Завод планує вифинансовац зоз прейґ 5,1 милион динари.

(конєц) зам/опс

НОВИ САД - КУЛТУРА

Проєкти Заводу у першим тогорочним кварталє

НОВИ САД, 6. марец 2010. (Рутенпрес) - Як проєкти у першим кварталє того рока, Завод за културу войводянских Руснацох планує почац, лєбо витвориц коло 10 проєкти, а часц проєктох будзе витворена и у сотруднїцтве з другима нашима институциями.

То будзе пописовнє музейного скарбу у Коцуре, суфинансованє публикациї Владимира Надя Ачима "Театер у кишенки" (як публикация о сценских вежбох, вєдно з НВУ "Руске слово"), публикованє Стратеґиї розвою култури Руснацох од 2010 по 2013. рок, та софинансованє публикациї о Якимови Сивчови (вєдно з новосадским РКПД).

Видаванє Подобовей монографиї Наташи Рибович будзе витворене вєдно з младежским часописом МАК; робота на Сербско-руским словнїку, вєдно з нашу Катедру, а вєдно зоз РНС - презентованє "Ружовей заградки".

Програма Шветочней академиї з нагоди Националного швета у Шидзе уж витворена, як и учасц представнїкох Заводу на Семинаре "Од традициї по сувенир", а у тим першим кварталє, у планє орґанизовац и семинар за руководительох фолклорних ансамблох по наших КУД.

(конєц) зам

ВЕРБАС – КАРПАТИ

У Карпатох пред числену публику виведзена премиєра представи "Хобит"

ВЕРБАС, 6. марец 2010. (Рутенпрес) - Студио дзецинскей драми КПД "Карпати" вчера вечар, у преполней сали дружтва премиєрно виведол представу за дзеци и младих, “Хобит”.

Представу по роману Джона Р. Р. Толкина и драматизациї Биляни Стаїч, режирала Нади Лендєр, а виведзена є на сербским язику.

У представи, у глєданю велького здобутка хтори им остал як нашлїдство од предкох, Хобити приходза до числених опасносцох и на концу находза же їх богатство то кнїжка, у хторей шицке знанє и мудросц швета. Досц лєм отвориц кнїжку и у нєй шицко цо нас интересує.

Порученє представи, "дзельме шицко з людзми", гутори же кнїжка предлужує свой живот так же ю буду читац и дзеци людзе, визуализована прейґ компютерских ефектох у одявней шпици.

У представи ґлумя искусни млади ґлумци: Иґор Миклош, Оґнєн Недич, Марина Арамбашич, Андреа Мученски, Весна Дедоевич, Невенка Црнянски, Ана Киш, Дияна Алексич, Валентина Фабри, Александра Миклош, Давид Копривица, Гелена Брил и Сара Трбоєвич.

Винїмно удатни костими направела Нада Роґанович, вибор музики Нада Лендєр, Сценоґрафию направели Владимир Будински и Петро Брил, за тон и шветло задлужени Боян Фейса, плакат и одявна шпица Мирослав Силадї и шминка Александра Лендєр.

Зоз тоту представу ансамбл "Карпатох" пошвидко наступи у основних школох у општини.

(конєц)там

СУБОТИЦА – КУЛТУРА

Отворени универзитет наявел нови змисти

СУБОТИЦА, 6. марец 2010. (Рутенпрес) – Отворени универзитет у Суботици од идуцого тижня уведзе нови културни змисти зоз хторима збогаци суботицку културну сцену.

Директор Отвореного универзитету Блажо Перович гварел же ше тота институция пред дзешец роками одрекла змистох по хторих була позната и же тоти програми буду врацени.

Найзначнєйши проєкт вшелїяк Фестивал европского филма, алє и ґалериї и трибини як "Отворена кнїжка", "Суботицка Аґора", "Политеа” и “Дружтво знаня”. То будзе нагода же би ше у Суботици пестовало нове, явне, одвичательне и критицке слово.

Тоти проєкти будзе финансовац Отворени универзитет, а на трибинох ше будзе дискутовац о суботицким животу, кнїжкох, дружтвених процесох и других дружтвених цекох.

(конєц) ад

НОВИ САД – ОМБУДСМАН

Покраїнски омбудсман процив цензури у медийох

НОВИ САД, 6. марец 2010. (Рутенпрес) – Покраїнски омбудсман Деян Янча препоручел Националному совиту Мадярох же би у цилю шлєбодного и нєзависного информованя превипитал одлуку о формованю окремного цела хторе би унапрямовало ушорйовацку политику дньових новинох "Мадяр со".

Покраїнски омбудсман думаня же огранїчованє шлєбодного прецека идейох и информацийох осетлїве питанє, а зоз тим ше зопера витворйованє правох припаднїкох националней меншини же би на своїм мацеринским язику були информоавни обєктивно.

Редакторе "Мадяр соа" здогадли же за ушорйовацку политику новинох компетентни ушорйовацки колеґиюм хтори ма потримовку цалей редакциї, прецо одлуку снователя доживюю як зменшованє фаховей компетентносци редакциї.

Вимогу ушорйовацкого колеґиюму "Мадяр соа" потримали Нєзависне дружтво новинарох Сербиї и Нєзависне дружтво новинарох Войводини и поволали Национални совит Мадярох же би хитно понїщел одлуку о снованю окремного совитодавного цела.

(конєц) ад

СУБОТИЦА – ПОЛЬОПРИВРЕДА

Отворена фабрика кристалного гною

СУБОТИЦА, 6. марец 2010. (Рутенпрес) – Покраїнски премиєр Боян Пайтич отворел нови погон за продукцию кристалних гнойох фабрики "Азохем" при Суботици.

То 70. погон нових технолоґийох хтори отворени у Войводини з потримовку Покраїнскей влади, а вкупна вредносц инвестициї 250 милиони динари, од чого покраїнска власц обезпечела 40 милиони.

У новим погону роботу достаню 125 особи, а кристални гной будзе пласовани найвецей на тарґовище Европскей униї, насампредз до Словениї, Италиї и Нємецкей.

Як гварел директор "Азохема" Предраґ Малишанович у тей фабрики ше будзе продуковац 7 000 тони кристалного гною рочнє, од чого 50 одсто будзе за вивоз.

(конєц) ад

НОВИ САД – САЯМ

Додзелєна награда "Лаза Костич"

НОВИ САД, 6. марец 2010. (Рутенпрес) – Награда "Лаза Костич" за найлєпше литературне дїло додзелєна Радмили Лазич за дїло "Маґнолия нам квитнє итд" хтору обявела библиотека "Светозар Маркович".

Лазичова на уручованю награди на Салону кнїжкох у Новим Садзе гварела же нє очековала награду, прето же лєм даскельо раз мала нагоду представиц свою поезию и Новим Садзе.

Припознанє єй уручели директор Новосадского сайма Ґоран Васич и предсидатель жирия Ненад Шапоня.

Награда за вивавательство припадла Службеному гласнїку за едицию "Велїканє сербскей литератури" у 20 кнїжкох Радована Поповича.

Награду Салону кнїжкох достали Завод за учебнїки у Беоґрадзе, Сербске културне дружтво "Просвита" зоз Заґребу и видавательна хижа "Каирос" зоз Сримских Карловцох.

(конєц) ад