РУСКИ КЕРЕСТУР - УПИСОВАНЄ ДО ОВС

Руснаци сполнєли потребну квоту

РУСКИ КЕРЕСТУР, 5. марец 2010. (Рутенпрес) - Як Рутенпрес дознава, вчера, 4. марца, з Министерства за людски и меншински права, нашому Националному совиту усмено потвердзене же Руснаци сполнєли потребну квоту о числу уписаних до Окремного виберанкового списку (ОВС) за директни вибор нового Националного совиту.

Вчера у Министерстве достати податок же ше до ОВС за Руснацох уписали 6 958 припаднїки нашей заєднїци, од потребних 6 363, та з тим и Руснаци медзи дзешец националнима заєднїцами у Сербиї котри, за тераз, досягли потребне число уписаних припаднїкох до ОВС.

На основи податкох з Министерства хтори доручени нашому Националному совиту, у општини Кула, вчера, 4. марца, до ОВС були уписани 2 578 Руснаци, у општини Вербас 1 883, у општини Жабель 768, у городзе Нови Сад 721, у општини Шид 591, у општини Бачка Тополя 188, у городзе Суботица 83, а у општини Сримска Митровица 74 Руснаци.

И попри сполнєтей, з вчерайшим дньом аж и преруценей квоти уписаних припаднїкох рускей заєднїци до ОВС, и з Министерства и з нашого Националного совиту и надалєй поволую нєуписаних Руснацох же би ше уписали до ОВС, а акция на уписованю тирва по 9. марец.

(конєц) зам

РУСКИ КЕРЕСТУР - НАЦИОНАЛНИ СОВИТ

На ютре схадзка у Орахове

РУСКИ КЕРЕСТУР, 5. марец 2010. (Рутенпрес) - На ютре, 6. марца, у Новим Орахове будзе отримана схадзка Националного совиту Руснацох, дзе будзе розпатрани закончуюци рахунок за прешли, та финансийни план за перши шейсц мешаци того року.

На дньовим шоре буду и питаня вязани за верификованє одлукох хтори стреду принєшени на схадзки Управного одбору Завода за културу Войводянских Руснацох, як и информациї о уписованю Руснацох до Окремного виберанкового списку.

Схадзка на соботу, 6. марца, у Новим Орахове будзе отримана у просторийох тамтейшого КУД "Петро Кузмяк", з початком на 11 годзин.

(конєц) зам

РУСКИ КЕРЕСТУР-ДРУЖТВО

Сцигли нови формулари за виводи зоз матичних кнїжкох

РУСКИ КЕРЕСТУР, 5. марец 2010. (Рутенпрес) – Нови формулари за тирваци виводи зоз матичних кнїжкох народзених, винчаних и умартих, 2. марца сцигли и до матичней служби у Руским Керестуре, як и до шицких местох кулскей општини.

Як дознаваме од матичарох у керестурскей Служби по вчерайши дзень дзень уж и видали 5 виводи зоз матичней кнїжки народзених, и два зоз кнїжки винчаних.

Як познате, нови формулари за виводи буду мац од 1. марца нєогранїчени рок тирваня, а нє як по тераз лєм шейсц мешаци, а нови ше муши виняц єдино кед придзе до даяких пременкох у особних податкох особи котрей потребни тоти документи.

Такси за видаванє виводох остали исти, тє. 290 динари, а за державянство 500 дин. з тим же потвердзенє о державянству остало зоз органїченим роком тирваня, одн. шейсц мешаци.

Нови тирваци формулари за виводи годно достац єдино у матичних службох, а нє як по тераз и у кнїжкарньох.

Як дознаваме у општинскей Матичней служби у Кули, обчекую же им маю сцигнуц и двоязични формулари за виводи, на котрих припаднїки других националних заєднїцох годни достац двоязични вивод, односно з єдного боку на сербским, а з другого на своїм мацеринским язику.

(конєц) маф

КУЛА - КУЛТУРА

Нєшка Скупштина КПЗ

КУЛА, 5. марец 2010. (Рутенпрес) - У просторийох кулского Културного центру, нєшка, 5. марца, будзе отримана порядна Рочна скупштина Културно-просвитней заєднїци (КПЗ) општини Кула.

Културно-просвитна заєднїца облапя шицки установи, орґанизациї, КУД и здруженя у култури у кулскей општини и прейґ нєй ше виторює финансованє и запровадзує културну политику и културни активносци у тей општини.

Члени Скупштини нєшка буду розпатрац звити о роботи орґанизацийох з обласци култури, як и финансийне дїлованє КПЗ у прешлим року.

Як плановане, Скупштина на нєшкайшей схадзки прилапи и Програму роботи орґанизацийох з обласци култури у општини Кула, календар манифестацийох и змаганьох у тей обласци, та финансийни план установох у култури и самей КПЗ за тот рок.

На дньовим шоре будзед и вибор єдней часци нових членох до Предсидательства КПЗ, а на дньовим шоре Скупштини и приношенє одлуки о ускладзованю одредбох Статута КПЗ з новим Законом о здруженьох.

(конєц) зам

БАЧКА ТОПОЛЯ - КУЛТУРА

Вистава рисункох Влади Нярадия

БАЧКА ТОПОЛЯ, 5. марец 2010. (Рутенпрес) - У "Арт ґалериї" у Бачкей Тополї (у будинку музею), нєшка, 5. марца, од 18 годзин шветочно будзе отворена самостойна вистава рисункох нашого уметнїка з Вербасу Влади Нярадия.

На вистави у Бачкей Тополї буду виложени прейґ трицец Нярадийово рисунки з циклусу "Гаос", хтори творени од 1997. по 2010. рок.

Попри уж видзених рисункох, на вистави у бачкотопольскей "Арт ґалериї" буду виложени и дзепоєдни нови, та и наградзовани рисунки Влади Нярадия.

Вистава тирва од ютра, 5. по 26. марец.

(конєц) зам

РУСКИ КЕРЕСТУР-КАРИТАС

Ґу року Борби процив худобства

РУСКИ КЕРЕСТУР, 5. марец 2010. (Рутенпрес) - На поволанку папи Венедикта ЮВИ, же би ше европски Каритас уключел до акциї ЕУ "Зеро поверти" , тєст “Нула худобства”, одвитовали и шицки владичества односно владически Каритаси у Сербиї, та и наш Еґзархатски.

На яки способ ше до активносцох Каритасу у 2010. року котри Европска уния преглашела за рок Борби процив худобства уключи наш Еґзархатски Каритас, начално догварене штредком фебруара на схадзки у Руским Керестуре, котра отримана зоз благословом нашого еґзарха владики кир Георгия.

На схадзки участвовали представителє нашого Еґзархатского Каритасу на чолє зоз о. Владиславом Варґом, котри дочасово окончує длужносц його директора.

О. Варґа поинформовал же з тей нагоди и наш Каритас будзе уключени до проєкту Националного Каритасу Сербиї под меном “Обсерватория худобства” котри предвидзує провадзенє и випитованє шицких файтох сучасного худобства.

На схадзки предложене же би ше и надалєй у наших парохийох нєпреривно сензибиловало вирних за чежку ситуацию худобства и о одвичательносци спрам ближнїх у потреби у власней парохиї.

Тому цилю служа и стаємни каритасово шкатули за пенєжни прилоги у наших церквох. Предложене тиж основац каритаси, або кружоки у каждей нашей парохиї дзе их ище нєт.

Єдна зоз формох помоци то вшелїяк и домашнє допатранє котре треба потримовац и инкорпоровац до дружтвених структурох, понеже го и дружтво як таку препознало и прилапело.

(конєц) маф

РУСКИ КЕРЕСТУР-ЦЕРКВА

Трибина за фамелиї

РУСКИ КЕРЕСТУР, 5. марец 2010. (Рутенпрес) - Трибина на тему "Моралносц у фамелиї" отрима ше у Руским Керестуре, на нєдзелю, 7. марца, у виронаучней сали, з початком на 14 годзин.

Викладанє отрима о. мр Михайло Малацко, парох керестурски, а шведоченя зоз живота винєше фамелия Варґа зоз Ґорнього Бреґу.

После викладаня предвидзена и дискусия по менших ґрупох, а приход наявели и фамелиї зоз других наших и околних римокатолїцких парохийох.

НОВИ САД – КУЛТУРА

Вистава у Ґалериї Матици сербскей

НОВИ САД, 5. марец 2010. (Рутенпрес) – У Ґалериї Матици сербскей у Новим Садзе отворена вистава "Пенєж на тлу Сербиї" на хторей приказани пенєж хтори хасновани на тих просторох у остатнїх 2 500 рокох.

Окремни сеґмент вистави пошвецени пенєжу Народней банки Сербиї хтори концом 19 вика друковани у Французкей.

Виставу отворел французки амбасадор у Сербиї Жан Франсоа Терал хтори бешедовал о историйней повязаносци сербского и французкого народа и державох.

Святочному отвераню присуствовали и заменїк городоначалнїка Нового Саду Саша Иґич и вицеґувернер Народней банки Сербиї Боян Маркович.

Вистава будзе отворена по 15. марец, а у рамикох вистави буду орґанизавани и роботнї у сотруднїцтве зоз Французким културним центром у Новим Садзе.

(конєц) ад

НОВИ САД – ИНВЕСТИЦИЇ

Инвестициї у Войводини од 5 милиярди евра

НОВИ САД, 5. марец 2010. (Рутенпрес) – Иножемни инвеститоре до Войводини уложели коло 5 милиярди евра, а у компанийох роби коло 68 000 занятих, гварел покраїнски премиєр Боян Пайтич.

Циль покраїнскей влади будзе же би ше уровень инвестицийох врацел на тот зоз 2008. року, односно же би ше прилїв иножемного капиталу дуплирал.

Окремна вигодносц за инвеститорох у Войводини то донациї од 1 300 евра за кажде нове роботне место, програми суфинансованя за нови погони и технолоґиї, як и програми финансованя Розвойней банки Войводини.

По словох директора Фонда за промоцию иножемних инвестицийох Бранислава Буґарского, анкета медзи инвеститорами хтори дїлую у Войводини гвари же дзепоєдни планую привредни рост и нови роботни места у тим року.

(конєц) ад

НОВИ САД – КУЛТУРА

Штири представи зоз БИТЕФ у Новим Садзе

НОВИ САД, 5. марец 2010. (Рутенпрес) – Штири представи зоз репертоара БИТЕФ буду приказани у Новим Садзе од 6-10. марец у Сербским народним театру.

Буду виведзени представи "Случай Войчек/Хинкмен" у режиї Ани Томович, "Параноя шик" и "Пах цимету", як и комедия "Як ше прави милка".

У рамикох тижня БИТЕФ у Новим Садзе будзе орґанизаована и трибина "Уплїв БИТЕФ на домашню продукцию и децентрализацию театру" на хторей буду госци селекторка фестивалу Аня Суша и драматурґ Єлена Боґовац.

(конєц) ад

НОВИ САД – ВОЛОНТЕРЕ

Волонтере збераю помоц за загрожених

НОВИ САД, 5. марец 2010. (Рутенпрес) – Волонтерски центер Войводини у сотруднїцтве зоз Балкан и Младежским центром почал зберац помоц за загрожених у вилївох у Заєчару.

Волонтерски центер поволал шицких гражданох, орґанизациї и подрпиємства же би до просторийох тей орґанизациї пронєсли средства нєобходни за нормални живот загрожених фамелийох.

Найвецей потребни средства за особну гиґиєну, шмати, обуй, покровци, посцелїна, лїки и єдзенє.

Приєм гуманитарней помоци орґанизовани од 10 до 18 годзин у Нєґошевей 3 у Новим Садзе а будзе тирвац по 9. марец.

(конєц) ад