Ruthen Press ***

пияток

НОВИ САД - КУЛТУРА

Завод останє у Новим Садзе, алє без плаценя кириї

НОВИ САД, 27. август 2010. (Рутенпрес) - На вчерайшей схадзки у Покраїнским секретарияту за културу, покраїнски секретар Милорад Дюрич предложел же би Управни одбору Заводу за културу войводянских Руснацох принєсол одлуку о одкладаню преселєня Заводу до його урядового шедзиска у Руским Керестуре 1. септембра, по приношенє нового Статуту Заводу, хтори ма буц принєшени по конєц марца идуцого року.

Покраїнски секретар за културу суґеровал же би ше заш лєм винашло други простор за роботу Заводу за културу, хтори будзе розтерховани трошкох за кирию, а Покраїнски секретарият порихтани участвовац у финансованю твореня предусловийох за преселєнє нашого Заводу на нову локацию.

Схадзка у Покраїнским секретарияту за културу отримана после вимогох з явней розправи же би ше чуло и думанє другого снователя Заводу, а о простору, односно обкеровйованю трошкох за плаценє кириї за Завод, з покраїнским секретаром за културу Милорадом Дюричом и його сотруднїками вчера бешедовали предсидатель Националного совиту Руснацох Славко Рац, його заменїк и подпредсидатель НС Мирон Сабадош, подпредсидателька НС Олена Папуґа и директор Заводу за културу ВР Мирослав Кевежди.

Як Рутенпрес дознава од предсидателя нашого НС Славка Раца, на вчерайшей розгварки у Покраїнским секретарияту за културу, виражена порихтаносц же би ше средства котри Завод плацел за кирию, унапрямело за Руски народни театер “Петро Ризнич Дядя” у 2011. року.

- Покраїнски секретар вчера виражел добру дзеку же би Завод вецей нє бул обтерховани з плаценьом кириї за свойо просториї у Стражиловскей 9, так же Секретарият будзе участвовац у финансованю твореня условийох, односно у адаптованю и опреманю простору за Завод у Новим Садзе, у Футожскей улїци, хтори власносц НВУ “Руске слово”. Його препорука управним одбором и “Руского слова” и Заводу за културу, же би потримали таку инциятиву - гварел Славко Рац после вчерайшей схадзки.

- Шедзиско Националного совиту будзе у Руским Керестуре, як то и спрам нашого Статуту, уж маме подручни канцелариї по наших местох, а у просторийох дзе у Новим Садзе будзе Завод за културу, будзе и канцелария НС за Нови Сад - гварел Рац.

На вчерайшей схадзки у Новим Садзе присуствовали и представнїки правней служби Секретарияту и правнїца у Заводу за културу ВР, так же бешедоване и о функциї предсидателя Управного одбору нашого Заводу, понеже на остатнєй схадзки Националного совиту на тоту функцию меновани судия у Шидзе Мирослав Цирба.

Толкованє правней служби Покраїнского секретарияту же тоти котрих на длужносц менує Народна Скупштина РС - "меновани особи", та ту пришло до зраженя интересу, так же ше будзе глєдац виход з тей ситуациї, о чим вироятно пошвидко будзе бешеди на Националним совиту Руснацох.

Як гвари Славко Рац, найвироятнєйше уж на пондзелок, 30. августа, скорей датума о початку преселєня Заводу, будзе отримана схадзка його УО, дзе буду розпатрани спомнути препоруки Покраїнского секретарияту вязани за просториї Заводу и предсидателя УО.

- З тима препоруками покраїнского секретара, обкеровали зме же то була єднострана одлука Управного одбору и даваме можлївосц же би ше, на основи Статуту Заводу, о тим вияшнєли и Национални совит и представнїки Влади АП Войводини.

Попри уж спомнутей финансийней потримовки Театру у 2011. року зоз Заводу за културу ВР, о хторей ше чолнїки нашого НС и Заводу за културу ВР вчера догварели з покраїнским секретаром за културу, маюци у оглядзе чежу ситуацию, гварене же покраїнски секретар Милорад Дюрич предложи же би з ребалансом покраїнского буджету за тот рок, за РНТ було опредзелєне ище милион 250 000 динари, кельо Театер достава за єден проєкт. У тим року, РНТ достал средства лєм за єден проєкт.

Ґу тому, предсидатель НС Руснацох Славко Рац, покраїнскому секретарови предложел же би замодлєл предсидателя Влади АП Войводини др Бояна Пайтича, же би ше прилапел покровительства Пейдзешатей "Червеней ружи", идуцого року у Руским Керестуре.

(конєц) зам

На початок

НОВИ САД - ВЛАДА

Отримана схадзка Влади Войводини

НОВИ САД, 27. авґуст 2010. (Рутенпрес) - На остатнєй схадзки Влади Войводини, под предшедованьом покраїнского премиєра Бояна Пайтича, розпатрани актуални питаня у обласци аґрару, хтори ше одноша на ярню шатву, жатву єшеньских шацох и роботу рибаловох у Войводини, як и на програму дїлованя ЯП “Войводина лєси”.

На схадзки розпатрана статистика и заключене же, у одношеню на прешли рок, зашати поверхносци у єшеньскей шатви зменшани за 17 одсто, а того року, под житом було коло 250 135 гектари, цо за 52 000 гектари менєй як прешлого року.

Ярец прешлого року бул пошати на 31 000 гектари, цо у одношеню на рок пред тим - 8 000 гектари менєй, а зменшани и поверхносци под олєйову цвиклочку.

Штреднї урожай жита у Войводини бул 3,74 тони по гектаре, а випродуковане коло 935 000 тони жита, цо за 21 одсто менєй як прешлого року. Ярцу було коло 3,62 тони по гектаре, цо зменшанє за 8 одсто, док урожай олєйовей цвиклочки зменшани за 7 одсто.

Цена меркантилного жита на Продуктней берзи под час жатви була од 10 до 13,5 динари, без ПДВ, з тенденцию росту, а продукция хлєбового жита на польох индивидуалних ґадовствох була 593 000 тони, док на польох задруґох и польопривредних подприємствох була 322 000 тони.

Рочна потреба за хлєбовим житом, на основи статистики “Житовойводини” з Нового Саду, коло 1,1 милиони тони, цо значи же тогорочни урожай будзе достаточни за потреби домашнього тарґовища.

На схадзки Влади Войводини прилапене предкладанє же би ше Влади Сербиї предложело унапредзенє одкупу жита, же би ше придати урожай вредновало на основи технолоґийного квалитету зарна.

На схадзки констатоване же аква-култура у Войводйни нє досц розвита и занєдзбана польопривредна дїялносц, гоч є профитабилна, а Войводина ма добри природни условия за рибалови, лєпши як у жемох з хторих Сербия увожи рибу.

На териториї Войводини єст 13 500 гектари рибалови, од чого 12 500 у екплоатациї, а вкупна продукиця риби коло 11 000 тони.

Заключене же би з постояцих вельких озерох, у хторих робота очежана, з реконструкцию рибаловох требало направиц вецей менши, з чим би робота була ефикаснєйша з применьованьом сучасних технолоґийох.

На схадзки констатоване и же би кредити хтори наменєни тей польопривредней дїялносци, мали буц вигоднєйши, на вецей роки и з меншима каматами.

Заключене же у Войводини єст надосц нєвихасновани поверхносци хтори би могли буц рибалови, а процедура би мала буц єдноставна и швидка, же би ше за тоту дїялносц заинтересовало цо вецей домашнїх и странских привреднїкох.

Влада Войводини препоручує локалним самоуправом же би пажици, по конкурсней процедури, дала на хаснованє заинтересованим хтори сцу орґанизовац продукцию риби, а Фонду за розвой Войводини, же би одредзел вигодни кредити за тоту намену.

Влада Войводини принєсла и одлуку о упису 9 кандидатох з инвалидитетом и 44 кандидатох ромскей националней заєднїци на високи школи фаховних студийох, чий сноветель Войводина, и на факултети Универзитету у Новим Садзе.

(конєц) ад

На початок

НОВИ САД - ПРОЄКТИ-ЕКОЛОҐИЯ

Мастер-план за розвой “Националного парку Фрушка гора”

НОВИ САД, 27. авґуст 2010. (Рутенпрес) - Предсидатель Скупштини Войводини Боян Пайтич нащивел ЯП “Национални парк Фрушка гора”, дзе отримана схадзка Роботней ґрупи за виробок Мастер-плану отримуюцого розвою Фрушкей гори по 2022. рок.

Роботну ґрупу предводзи покраїнски премиєр Боян Пайтич, хтори з тей нагоди гварел же виробок Мастер-плану фаховци почню у октобре, же би по конєц рока бул дефиновани.

Покраїна того року превжала сновательни права над “Националним парком Фрушка гора” и будзе робиц на розвою туристичних потенциялох и очуваню културно-историйних вредносцох и еколоґиї.

На Фрушкей гори ше находза 21 манастир и 14 озера, як и богата флора и фауна, вигодна за розвой лєсарства, рибарства, винїцарства, енерґетики и туризму.

Значна часц Мастер-плану будзе и будованє тунелу през Фрушку гору, з чим буду ришени терашнї проблеми транспорту прейґ тей гори.

(конєц) ад

На початок

НОВИ САД - ВЛАДА-ЛОКАЛНА САМОУПРАВА

Розписани конкурс за розвой локалних самоуправох

НОВИ САД, 27. август (Рутенпрес) - Покраїнски секретарият за локалну самоуправу и медзиопштинске сотруднїцтво розписал Конкурс за виєдначенши розвой локалних самоуправох, за цо опредзелєни 40 милиони динари - виявел вчера, 26. августа, на конференциї за пресу покраїнски секретар спомнутого Секретарияту др Томислав Станич.

Конкурс обявени 20. авґуста и отворени є по 10. септембер, з цильом злєпшаня комуникациї гражданох з локалнима самоуправами и явнима подприємствами, як и злєпшаня квалитету комуналних услугох у локалних штредкох.

Найвекша сума за котру кажда општина може конкуровац 2 милиони динари, а кед за єден проєкт, як партнере, источашнє конкурую два и вецей општини, вец мож конкуровац найвецей за 3 милиони динари. Право участвованя на Конкурсу маю шицки локални самоуправи у Войводини, а окреме тоти хтори маю прилапени стратеґиї локалного розвою.

Општина може конкуровац лєм з єдним проєктом, а кед наступи у партнерстве зоз здруженями гражданох, вец найвецей з двома - за локалну самоуправу и медзиопштинске сотруднїцтво.

Локални самоуправи, односно општини, у вимоги за средства з того конкурсу обовязни участвовац и з власнима средствами - з 10 одсто кед су у катеґориї нєрозвитих, 15 одсто за штреднє розвити и 25 одсто за розвити општини.

Покраїнски секретарият за локалну самоуправу и медзиопштинскей сотруднїцтво, проєкти зоз спомнутого Конкурсу будзе финансовац по конєц 2010. року. Приоритет буду мац проєкти котри витворя цо лєпшу комуникацию на релациї: граждан-локална самоуправа-явне комуналне подприємство.

Окремна увага будзе пошвецена формованьом єдинствених “кол-центрох”, интернет- порталох и sms-порукох, дзе гражданє годни приявиц шицки файти комуналних проблемох. Система наволана “желєна линия”, хтора ефикасно риши защиту животного штредку и отримуюци розвой.

(конєц) сим/ад

На початок

КУЛА - ПОЛИТИКА

Нєшка схадзка Скупштини општини

КУЛА, 27. август 2010. (Рутенпрес) - Розпатранє закончуюцого рахунку биджету општини Кула за прешли рок, Одлуки о снованю Медзиопштинского стратеґийного плану розвою социялней защити у Заходнобачким округу, та Одлуки о приношеню Локалного плану управяня з одпадом у општини Кула по 2020. рок - буду єдни з найзначнєйших точкох нєшкайшей, Осемнастей схадзки Скупштини општини Кула.

Тото зашеданє кулского парламенту окреме значне и за Руски Керестур, понеже ма буц принєшена Одлука о, як урядово поведзене - здобуваню до державней власносци за потреби општини Кула, жеми у будовательним подручу катастерскей општини Руски Керестур.

Роби ше о купованю дацо вецей як 10 гектари жеми од керестурского Подприємства "АБЦ Фуд" за потреби будуцей индустрийней зони у Руским Керестуре, а купованє би заєднїцки мали плациц општина Кула и керестурски месни самодопринос.

Одборнїки СО Кула ютре буду розпатрац и звит за прешли, як и плани роботи за тот рок Центру за социялну роботу општини, та вименки и дополнєня Програми дїлованя ЯКП "Комуналац" Кула за 2010. рок.

Як нєурядово дознава Рутенпрес, а пише и вчерайши "Блиц", на схадзку СО Кула рихтаю ше присц и пейцме одборнїки котрим мандати нєдавно врацени на основи судских одлукох, та вироятно буду поставяни и питаня вязани за одборнїцки мандати и мож очековац нєизвесну схадзку Скупштини општини.

(конєц) зам

На початок

СУБОТИЦА - ГОРОДСКА УПРАВА

Програма з нагоди Дзень городу

СУБОТИЦА, 27. авґуст 2010. (Рутенпрес) - Тогорочна преслава Дня городу Суботица почнє на ютре, 28. авґуста, а будзе тирвац по 5. септембер.

Дзень Городу Суботица 1. септембер и того дня у планє отромованє Шветочней схадзки Скупштини городу, на хторей, традицийно, буду додзелєни награди Почесни граждан и припознанє "Про урбе".

З нагоди преслави Дня Суботици, Дьордє Балашевич на Площи шлєбоди 1. семтембра отрима концерт, а у рамикох преслави, буду отримани рижни културни збуваня, як и Медзинародне змаганє бициґлистох за “Вельку награду Суботици”.

(конєц) кпа

На початок

МИКЛОШЕВЦИ (ГОРВАТСКА) - КУЛТУРА

Ютре и поютре "Миклошевци 2010"

МИКЛОШЕВЦИ (ГОРВАТСКА), 27. август 2010. (Рутенпрес) - Двацец пията културна манифестация "Миклошевци 2010", у тим руским месце у Горватскей будзе отримана на соботу и нєдзелю, 28. и 29. августа, з богату музично-фолклорну програму, а попри КУД з Горватскей, участвую и ансамбли зоз Словацкей и Сербиї.

Першого дня тогорочней ювилейней манифестациї, на ютре вечар од 20 г., на Концерту шпиванкох и танцох участвую два ансамбли зоз Словацкей - Фолклорни ансамбл "Тарка" з Тарнова и КУД "Обрешка" з Долнєй Обрешки, як и ансамбл КПД Русинох и Українцох "Калїна" з Риєки.

Ютре дополадня, од вчасних ранших годзинох, у рамикох Манифестациї "Миклошевци 2010" будзе отримани Медзинародни куп - змаганє у лапаню рибох на дуґов, дзе, як наявене, участвую екипи з Горватскей и Войводини.

На нєдзелю, 29. августа, после Служби Божей, од 11 г. буду отворени три вистави: Дружтва "Нашо дзеци" з Миклошевцох, подобових роботох Владимира Провчия з Матульох и Етно-збирки миклошевского музею.

Манифестация з назву "Поздрав ровнїни", на хторей участвую музично-фолклорни ансабмли, на нєдзелю у Миклошевцох будзе отримана од 15 годзин.

На тей смотри фолклору участвую КУД Руснацох и Українцох з Винковцох, КУД "Осиф Костелник" з Вуковару, КУД " Яким Гарди" з Петровцох, Дружтво Руснацох Цвелфериї з Райового Села, Дружтво "Руснак" з Петровцох и КУД "Яким Ґовля" з Миклошевцох".

Попри руских, участвую и ансамбли других народносцох - КУД "Петефи Шандор" з Чаковцох, Матица словацка з Осиєку, КУД "Зрински" з Берку и КУД "Коло" з Вуковару".

Тиж так, на Манифестациї "Поздрав ровнїни", як госци наступя и аматере Руского културно-просвитного дружтва з Нового Саду, а на вечар, од 20 г., на Концерту танцох и шпиванкох - полувечарши концерт отрима и музично-танєчни ансамбл Дома култури Руски Керестур.

Попри Керестурцох, на закончуюцей програми "Миклошевци 2010", з векшу часцу своєй програми представя ше и госци зоз Словацкей - Фолклорни ансамбл "Тарка" з Тарнова.

Попри ювилею самей Културней манифестациї, Двацец пияти "Миклошевци 2010” отримує ше и у рамикох означованя 60-рочнїци постояня миклошевского КУД “Яким Ґовля”.

Орґанизатор манифестациї КУД "Яким Ґовля" з Миклошевцох, а з финансийну и другу потримовку од Совиту за национални меншини РГ, Министерства польопривреди РГ, Вуковарско-сримскей жупаниї, општини Томповци и Союзу Русинох и Українцох Републики Горватскей.

(конєц) зам

На початок

РУСКИ КЕРЕСТУР/МИКЛОШЕВЦИ - КУЛТУРА-СПОРТ

"По драгих наших предкох” на бициґлох

РУСКИ КЕРЕСТУР/МИКЛОШЕВЦИ, 27. август 2010. (Рутенпрес) - На Културну манифестацию "Миклошевци 2010" и того року пойду бициґлисти з вецей наших местох, у рамикох акциї з назву "По драги наших предкох”.

Коло 10 бициґлисти з Руского Керестура, Коцура, Нового Орахова и Бачкого Маґличу, до Миклошевцох рушаю на нєдзелю вчас рано, же би там сцигли дополадня. После кратшого пребуваня у Миклошевцох, бициґлисти ше истого дня враца до Керестура.

Тогорочне путованє наших бициґлистох до Миклошевцох под час Културней манифестациї "Миклошевци 2010" орґанизоване по штвартираз, главни орґанизатор тих походох ґу Руснацом до Горватскей, єдного року и до Словацкей, професор у керестурскей Ґимназиї Владимир Бесерминї, а бициґлистох буду провадзиц и два превозки.

(конєц) зам

На початок

СУБОТИЦА - КУЛТУРА

Отримани Интеретно фестивал

СУБОТИЦА, 27. авґуст 2001. (Рутенпрес) - У Суботици вчера, 26. авґуста, закончени Дзевяти интеретно фестивал, хтори прероснул до єдней з найзначнєйших културних манифестацийох у тим городзе и бул позарядово нащивени.

На Фестивалє участвовали танєчни ґрупи з Италиї, Канади, Колумбиї, Мадярскей, Южней Кореї, Параґваю, Молдавиї, Греческей.

Кажди вечар, Суботичанє, и госци з других местох, мали нагоду уживац у танцох, музики, народним облєчиве, ручних роботох, виставох, националних кухньох, котри пририхтали госци з иножемства.

Пополаднями, на площи у центре городу, у Етнополису и Еко-куцику, пририхтовани програми, орґанизована програма за дзеци з рижнима креативнима роботнями, а виводзени и представи за дзеци.

Остатнього дня Фестивала, у шветочним дефилеу од Гали спортох по Етнополис, учашнїки ше ище раз представели вельочисленим нащивительом. После Шветочного завераня, ушлїдзел огньомет.

Интеретно фестивал тирвал од 22. по 26. авґуст, а орґанизатор бул Мадярски културни центер.

(конєц) кпа

На початок

ВЕРБАС - ПОЛЬОПРИВРЕДА

Почала жатва слунечнїку

ВЕРБАС, 27. авґуст 2010. (Рутенпрес) - Дзекуюци сухей и слунечней хвилї, жатва слунечнїку на польох у општини Вербас добре напредує.

Задруґа "Аґромикс" з Вербасу ма законтрачене 140 гектари слунечнїку и одкупює го за вербаску олєярню "Витал", хтора у составе компаниї "Инвей".

Спрам словох директора Задруґи Сави Шувакова, одкуп слунечнїку почал штварток, слунечнїк ма ЮС квалитет, урожай добри, и руша ше коло 2 тони по гольту.

Задруґа виплацує авансну цену од 35 динари за килограм, а док одкуп будзе закончени, о 10-15 днї, будзе виплацена розлика по тарґовищну цену.

Велї Вербащанє продукцию слунечнїку законтрачели у фирми ДОО "Либела продукт" Момчила Прелевича зоз Змаєва и витлачени слунечнїк придаваю на єй одкупним месце у Коцуре.

Представнїк фирми "Либела продукт" у Коцуре задлужени за одкуп, Юлиян Фейса, гвари же слунечнїк одкупюю за компанию "Инвей", а на тим одкупним месце пребераю и слунечнїк законтрачени у ЗЗ "Класка" Любомира Тамаша.

У Коцуре, урожай слунечнїка од 12-13 до 20 метери по гольту, а штреднї коло 16 метери по гольту.

"Либела продукт" слунечнїк одкупює по 36,20 динари, плус ПДВ, так же цена за виплацованє виноши 38 динари, цо двараз векша цена у одношеню на прешли рок, кед слунечнїк одкупйовани по 16,5 и 17 динари.

У општини Вербас найвецей слунечнїку єст у Коцуре, менши поверхносци єст и у Вербаше и Равним Селу, а у Змаєве и Бачким Добрим Полю, того року, пре лоньску нїзку цену, слунечнїк нїхто нє пошал.

(конєц) там

На початок

КОЦУР - ВИРСКИ ЖИВОТ

На ютре у Коцуре Кирбай

КОЦУР, 27. авґуст 2010. (Рутенпрес) - Грекокатолїцка церква у Коцуре на ютре, 28. авґуста, преслави Кирбай - на швето Успениє Пресвятей Богородици по старим календаре. Як наявене, швето возвелича и апостолски еґзарх за грекокатолїкох у Сербиї и Чарней Гори, преосвщени владика кир Георгий Джуджар.

На Кирбай буду служени три Служби Божо - ранша од 8, Архиєрейна Велька Служба од 10 годзин, хтору будзе предводзиц кир Георгий, и вечурня на 16 годзин. Нєшка вечар будзе служене Кирбайске Всеночне.

Понеже Кирбай пада всоботу, Коцурци очекую приход велїх госцох, як на духовну, так и на вашарску часц Кирбаю.

Вашарска часц Кирбаю будзе отримана у центре Коцура, а луна-парк роби уж вецей як тидзень и ознова є змесцени у дворе коцурскей Основней школи.

(конєц) цики

На початок

ВЕРБАС - ДРУЖТВО-СПОРТ

Векшу увагу дац женом у спорту

ВЕРБАС, 27. авґуст 2010. (Рутенпрес) - Нєвладова орґанизация "Центер за потримовку женом" з Кикинди, з потримовку Покраїнского секретарияту за спорт и младеж, вчера у Вербаше отримала першу схадзку фокус-ґрупи женских спортских колективох з општини Вербас.

Схадзка отримана у рамикох проєкту "Виглєдованє о положеню женох у спорту на териториї АП Войводини", до хторого уключени општини Вербас, Кикинда, Панчево, Зомбор, Сента, Житиште, Индїя и город Нови Сад.

Циль проєкту же би ше през анализу участвованя женох у рекреативним спорту, у спортских клубох и змагательних катеґорийох, през положенє женох у спортских союзох, асоцияцийох, судийских и тренерских орґанизацийох - виробело всеоблапяюцу слику положеня женох и обдумало можлївосци за унапредзенє їх положеня.

Милена Чук з НВО "Центер за потримовку женом" гварела же на основи резултатох анализох, будзе запровадзен механїзем стаємного провадзеня положеня женох у спорту, пре злєпшанє їх положеня у тей обласци.

(конєц) там

На початок