НОВИ САД – СКУПШТИНА

Питанє Косова нє ма уплїв на Войводину

НОВИ САД, 29. юлий 2010. (Рутенпрес) – Предсидатель Скупштини Войводини Шандор Еґереши гварел же повязованє Войводини зоз косовским проблемом нє ма вязи и же ше положенє Войводини муши ришиц у рамикох Уставу и державно-правней системи Сербиї.

Вон гварел же нє треба правиц проблем кед го нєт, реаґуюци на вияву функционера Сербскей радикалней странки Милорада Мирчича же Войводину треба охраїнц и зопрец же би ше вона одвоєла од Сербиї.

Еґереши гварел же нєт политичней основи же би Войводина постала медзинародне питанє, а же питанє децентрализациї и демократизациї за хторе ше вон заклада добре нє лєм за Войводину, алє и за цалу державу, бо без тих процесох драга ґу Европскей униї будзе спомалшена.

(конєц) ад

НОВИ САД – СКУПШТИНА

Еґереши приял учашнїкох Кампу толеранциї

НОВИ САД, 29. юлий 2010. (Рутенпрес) – Предсидатель Скупштини Войводини Шандор Еґереши приял 200 учашнїкох Кампу толеранциї подунайских реґионох и з тей нагоди гварел же ше наздава же Сербия войдзе до Европскей униї за 10 роки.

По його словох толеранция значна за Войводину хтора вецейнационална, вецей конфесийна и вецейязична мултикултурална реґия.

Учашнїкох Кампу привитал у покраїнски секретар за образованє Золтан Єґеш, хтори гварел же Войводина ма єдинствени систем образованя на 7 язикох, а виглєдованє указало же найменєй насилства єст у школох дзе ше настава одбува на вецей язикох, односно у школох дзе ше пестує толеранция.

(конєц) ад

ҐОСПОДЇНЦИ – НАЦИОНАЛНИ СОВИТ

Друга порядна схадзка Националного совиту

ҐОСПОДЇНЦИ, 29. юлий 2010. (Рутенпрес) – Друга порядна схадзка Националного совиту рускей националней меншини будзе отримана 31. юлия у Ґосподїнцох у просторийох Месней заєднїци.

На дньовим шоре схадзки находза ше дванац точки, а медзи нїма прилапйованє Статуту Националного совиту (НС), як и Дїловнїка о його роботи.

На дньовим шоре тиж и вибор подпредсидателя НС, вибор Вивершного и Надпатраюцого одбору, як и вибор секретара НС.

Нови НС ма одредзиц и лимит за самостойне розполаганє зоз финансийнима средствами, та принєсц одлуку о його роботней заєднїци.

На схадзки будзе бешеди и о вобору члена Управного одбору (УО) Заводу за културу войводянских Руснацох и предсидателя УО истого Заводу, як и вименка Статута Заводу.

НС будзе розпатрац и вимогу Младежскей орґанизациї "Пакт Рутенорум".

(конєц) маф

НОВИ САД – ПОЛИЦИЯ

Нови гарештованя пре злохаснованє пензийох

НОВИ САД, 29. юлий 2010. (Рутенпрес) – У акциї витворйованя фалшивих инвалидских пензийох и корупциї полиция загарештовала ище 2 особи, а виновна приява поднєшена процив ище 4 особи на хторих ше сумня же давали мито, або видавали фалшиви лїкарски увереня, сообщене у Министерству нукашнїк дїлох.

Загарештовани пензионер Янош Балоґ (50) и Желько Спасич (42) зоз Кули, а виновни прияви поднєшени процив Михаила Ателєвича (63) зоз Беоґраду, началїка Оддзелєна за радиолоґию КБЦ Земун и Милойка Влашкого (57), специялисти неуропсихиятриї Општого шпиталю у Зомборе.

Процив пензионерох Бранка Радошевича (56) и Божи Рашич (60) зоз Зомбора тиж поднєшени виновни прияви.

Полиция загарештова тоти особи после вецеймешачней роботи у сотруднїцтве зоз Висшим явним тужительством у Зомборе.

Преценює ше же зоз фалшивима инвалидскима пензиями буджет Сербиї очкодовани за вецей як 3,5 милиони динари.

(конєц) ад

ВЕРБАС – ИНФРАСТРУКТУРА

Осторожно прейґ пруґи на драги за Коцур

ВЕРБАС, 29. юлий 2010. (Рутенпрес) – На пружним преходу спрам Коцура шицки гражданє хтори на тим месце преходза прейґ пруґи Суботица – Беоґрад, треба же би були окреме осторожни, пре рампу на пруґи, хтора нє роби уж двацец днї.

У електросекциї железнїци у Вербаше гварели же причина же рампа нє роби крадза опреми зоз пруґи, як и же механїзем за спущованє и дзвиганє рампи будзе оправени за даскельо днї.

По тей пруґи дньово преходзи блїзко 60 путнїцки и терховни гайзибани.

Шеф електросекциї у Вербаше Новица Ґрозданович гварел же ше место опреми хтора реґуловала роботу рампи, хтору крадоше однєсли, тераз кладзе дзешец раз чежши часци и же ше наздава же крадоше тоти часци нє годни однєсц и же рампа будзе нормално функционовац.

Шеф станїци у Вербаше Зоран Дабетич гварел же гайзибани нормално преходза, без опасносци за превозки и преходнїкох и же кажди гайзибан ма розказ же би ше застановел скорей пружного преходу, же би уключел сирену, як и же би препущел превозку хтора ше находзи на пружним преходу.

Попри того шветлосна сиґнализация и семафори стаємно робя и спозорюю на можлїви преход гайзибана, гварел Дабетич.

(конєц) там

НОВИ САД – СУДСТВО

Менєй судийох у новосадских судох

НОВИ САД, 29. юлий 2010. (Рутенпрес) – Окончователька длужносци предсидательки Висшого суда у Новим Садзе Зора Ямушаков гварела же єдна часц предметох у тим суду ше ришує спомалшено пре менше число судийох, односно 19, а по систематизациї предвидзено 28 судийох.

Вона гварела же менше число судийох нє оправданє же дзепоєдни гражданє длуго чекаю ришеня, а окреме тоти цо загарештовани, прецо и нєдавно отримани протест у Окружним гарешту у Новим Садзе.

Як гварела Ямушаков дзепоєдним загарештованим особом одредзене предлуженє судского процесу аж за октобер и кед же поступаюци судиї нє годни обезпечиц скорейши термин, предмети превежню и законча судийове зоз виглєдованя.

За зауваги гарештанцох хтори ше поносовали на спомалшеносц у одлучованю у жалбених поступкох Ямушаков гварела же вони прешлїдзени Апелацийному суду у Новим Садзе и буду розпатрени по хитним поступку.

(конєц) ад

НОВИ САД – СУДСТВО

Векша ефикасносц судох од уводзеня АВП програми

НОВИ САД, 29. юлий 2010. (Рутенпрес) – Суди у Сербиї значно звекшали ефикасносц од кеди уведзена програма за автоматске водзенє предметох (АВП).

Як гварел помоцнїк министерки правди Деян Пашич у Висшим суду у Новим Садзе, то ше окреме одноши на привредни суди у хторих ше тота програма применює од 2008. року дзе за перши 6 мешаци того року зробене 30 одсто вецей предметох як у истим периодзе прешлого року.

У Привредним и Апелацийним суду у Новим Садзе за перши 6 мешаци того року звекшана ефикасносц за 18 одсто, а тота програма ше примєнює ище у 48 основних и висших судох у Сербиї.

Циль же би по 2012. рок шицки 60 суди у Сербиї мали АВП програму, а Пашич наявел и єдинствени портал хтори пририхтує ресорне министерство, хтори гражданом будзе доступни за 2 мешаци, а прейґ хторого годни провадзиц цек судских предметох.

(конєц) ад

ҐОСПОДЇНЦИ – КУЛТУРА

Стретнуце у Боднарова

ҐОСПОДЇНЦИ, 29. юлий 2010. (Рутенпрес) – Тогорочна, 6. колония подобових уметнїкох и 9. дзецинска колония "Стретнуце у Боднарова" отримаю ше 31. юлия и 1. авґуста у Ґосподїнцох.

Як Рутенпрес дознава од Ирини Папуґовей спред Дружтва за руски язик, литературу и културу як орґанизатора, на Колонию ше приявели 20 уметнїки зоз Ґосподїнцох, Жаблю, Дюрдьова и Нового Саду котрих предводзи уметнїк Владимир Дороґхази.

На дзецинскей колониї "Стетнуце у Боднарова" будзе од 10 до 12 учашнїкох, школярох хтори приду зоз Ґосподїнцох, Дюрдьова, Коцура и Жаблю.

(конєц) маф

НОВИ САД – КУЛТУРА

Оцена тогорочного "Еґзиту" на вецейрочним уровню

НОВИ САД, 29. юлий 2010. (Рутенпрес) – Нащивителє "Еґзиту" того року цалокупну орґанизацию оценєли зоз оцену 4,1, цо на уровню вецейрочного просеку, гварене у аґенциї ТИМ хтора у цеку музичного фестивала анкетовала нащивительох.

У сообщеню гварене же шицки лоґистични аспекти фестивала, як и чистота, понукнуце пица, єдзеня и безпечносц зазначели рост, цо пошлїдок добрей орґанизациї, алє и зменшаней гужви.

Найпозитивнєйши упечаток за нащивительох зоз иножмества амбиєнт твердиї и атмосфера на Денс арени.

Нащивителє хтори прешираз були на "Еґизту" давали найлєпши оцени, док гевти хтори приходзели вецей раз давали слабши, а найслабши оцени давали домашнї нащивителє.

Найвисшу оцену дотал фестивалски камп у хторим було коло 95 одсто странских туристох зоз 50 державох.

Музична програма того року достала найслабши оцени, а неґативни упечаток охабела и полиция хтора охарактерована як нєлюбезна. Нащивителє ше поносовали и на нєдостаток тунїх лєтох до Сербиї, а найвекши проблем мали Британци.

Виглєдованя указали же 99 одсто нащивительох планує ознова присц на фестивал.

(конєц) ад

НОВИ САД – МЕДИЇ

Предлужени протест у "Дневник голдинґу"

НОВИ САД, 29. юлий 2010. (Рутенпрес) – Заняти у "Дневник голдинґу" и вчера протестовали нєзадовольни зоз динамику виплацованя особних доходкох и драгових трошкох.

Прегварки Влади Войводини и синдикалцох "Дневник голдинґу" ше застановели пре нєскладанє у динамики виплацованя нєвимирених плацох.

Функционере Влади Войводини гварели же прешлого тижня виполнєни шицки вимоги штрайкачох и наявели дисциплински мири же би штрайк бул закончени.

(конєц) ад

НОВИ САД – ПОЛЬОПРИВРЕДА

До Єгипту вивежено 200 000 товни курчата

НОВИ САД, 29. юлий 2010. (Рутенпрес) – Компания "Ирадия" зоз Сримскей Каменїци вивезла 200 000 товни курчата до Єгипту, гварене у сообщеню Привредней комори Сербиї.

То добри параметри за розвой сербского живинарства, а отверанє тарґовища за арабски жеми нова шанса за вивоз и преробок курчецини.

То би требал буц ясни сиґнал Министерству польопривреди же би стимуловало домашню продукцию и преробок курчецини.

У сообщеню гварене и же у Сербиї у хладнячох єст на тисиячи тони живинского меса.

(конєц) ад