ДОРТМУНД (НЄМЕЦКА) - СПОРТ

Ваньо Хома освоєл два други места

ДОРТМУНД (НЄМЕЦКА), 4. марец 2010. (Рутенпрес) - Млади атлетичар Ваньо Хома заблїснул и на своїм першим медзинародним змаганю и на 14. интернационалним Митинґу младих атлетичарох, котри прешлого викенду отримани у Нємецкей, у Дотмунду, у своєй конкуреницї у скаканю до висока освоєл два други места.

До прешлого року Ваньо Хома бул член керестурского "Русина", а тераз новосадскей "Войводини". У Дортмунду Ваньо Хома прескочел свою од скорей здобуту висину - 150 цм, та з тим завжал два други места.

Лєпши од нього бул єден атлетичар з Мадярскей, хтори, гоч млади, бо ше змагали у конкуренциї атлетичарох народзених 1997/98. року, високи аж 180 цм и прескаковал палїцу на висини од 165 цм.

Ваньо Хома на Митинґу у Дортмунду наступал за новосадску "Войводину", чийо атлетичаре по дванастираз участвовали на тим змаганю, а у екипних и поєдинєчних змаганьох, у Дортмунду участвовали млади атлетичаре зоз 12 державох.

З оглядом же є на внєдзелю отриманей Рочней скупштини керестурского СД "Русин" преглашени за найлєпшого младого спортисту "Русина" у прешлим року, вовторок, 2. марца, по врацаню з Нємецкей, його дотерашня тренерка Саня Тиркайла, Ваньови придала погар за тоту титулу.

(конєц) зам

РУСКИ КЕРЕСТУР - УПИСОВАНЄ ДО ОВС

Квота найвироятнєйше - сполнєта

РУСКИ КЕРЕСТУР, 4. марец 2010. (Рутенпрес) - На основи остатнїх податкох хтори достати од Министерства за людски и меншински права, Националного совиту Руснацох, и зоз општинсиких управох, Руснаци найвироятнєйше сполнєли потребну квоту уписаних до Окремного виберанкового списку за нашу заєднїцу.

У остатнєй инстанци - у спомнутим Министерстве - вчера, 3. марца потвердзене же, спрам їх евиденциї - до ОВС уписани уж 6 063 Руснаци, так же по сполньованє квоти од 6 363 хибя ище 300 вимоги формулари.

Спрам евиденциї Националного совиту, до вецей општинских управох у општинох дзе у значнєйшим чишлє жиєме, єст ище вецей як 1 500 придати вимоги-формулари за упис до ОВС, а хтори ище нє обробени, та з тим анї нє прешлїдзени до Министерства.

Ґу тому, ту и коло 200 вимоги хтори виполнєти, алє ище нє придати до општинских управох. Мож очековац же до конца того тижня, Министерству буду придати прейґ 7 000 формулари Руснацох уписаних до ОВС.

Вшелїяк - то нє значи же уписованє до ОВС престава. Ище вше тирва - по шлїдуюци вовторок, 9. марец - и шицки котри ище нє сполнєли тото свойо право, по тот датум можу виполнїц вимогу-формулар за упис до Окремного виберанкового списку.

(конєц) зам

РУСКИ КЕРЕСТУР - УПИСОВАНЄ ДО ОВС

Прейґ 7 300 вимоги-формулари Руснацох

РУСКИ КЕРЕСТУР, 4. марец 2010. (Рутенпрес) - Спрам податкох з Националного совиту Руснацох достатих од пописовачох по наших местох и з општинских управох, по вовторок, 2. марец, виходзи же Руснаци виполнєли прейґ 7 300 вимоги-формулари за упис до Окремного виберанкового списку.

Найвецей виполнєти формулари єст у општини Кула - коло 3 000, дзе од прейґ 2 860 придатих, по 2. марец 1 833 були и обробени.

Спрам податкох Националного совиту, у Руским Керестуре виполнєти коло 2 680 формулари, у Кули 343, у Червинки 1, а интересантне же и у Крущичу коло 30 Руснаци виполнєли вимоги-формулари за уписованє до ОВС.

У општини Вербас виполнєти коло 2 050 вимоги-формулари (1 906 по 2. марец уж були обробени), а як ше и очековало - найвецей вимоги у вербаскей општини виполнєти у Коцуре - прейґ 1520, потим у Вербаше, коло 520, а у Савиним Сели два формулари.

У одношеню на предпрешли и прешли тидзень, барз значни викрок у виполнєтих вимогох за упис направени у Новим Садзе, та спрам податкох з Националного совиту, по 2. марец там булу виполнєти 905 формулари, а на обробок були придати коло 750.

У општини Жабель виполнєти и до општини придати коло 730 формулари (441 бул обробени), дзе у Дюрдьове по 2. марец були виполнєти коло 600, у Ґосподїнцох коло 100, а у Жаблю коло 30 формулари.

Число виполнєтих вимогох за упис звекшало ше и у самим городзе Шиду, дзе по вовторок були виполнєти 230 формулари, а до општини на оборобок були придати прейґ 520 вимоги. У Бачинцох були виполнєти 156, у Беркасове 58, а у Бикичу112 формулари.

У општини Бачка Тополя були виполнєти 195 формулари - у Новим Орахове 118, Бачкей Тополї 76 и єден у Пачиру (з Лондону), док у Суботици виполнєти 91, а у городскей управи були обробени 83 вимоги за упис до ОВС.

Прешлого тижня ше таргли и у Сримскей Митровици, та виполнєти 64 формулари котри и придати на оборобок до општини.

(конєц) зам

РУСКИ КЕРЕСТУР - УПИСОВАНЄ ДО ОВС

И по местох у Войводини и Сербиї

РУСКИ КЕРЕСТУР, 4. марец 2010. (Рутенпрес) - Спрам податкох з нашого Националного совиту, формулари-вимоги за упис до ОВС за нашу заєднїцу, по 2. марец виполнєли и 66 Руснаци по рижних местох у Войводини и Сербиї

У Беоґрадских општинох виполнєти 14 формулари за упис до ОВС за Руснацох, у темеринскей 8, у тительскей 6; у беочинскей и бачкопетровскей по 5; у зомборскей 4; у општини Панчево 3, и по два у општинох Оджак, Сримски Карловци, Сента, Зренянин и Ковачица.

По єдну вимогу за упис до ОВС, Руснаци виполнєли и у войводянских општинох Алибунар, Бачка Паланка, Бечей, Канїжа, Мали Идьош, Нови Бечей, Пландиште, Сербобран и Чока.

Интересантне же по єдна вимога за упис до ОВС за Руснацох виполнєта и у Куршумлиї и Новим Пазаре.

(конєц) зам

РУСКИ КЕРЕСТУР - НАЦИОНАЛНИ СОВИТ

На соботу схадзка у Орахове

РУСКИ КЕРЕСТУР, 4. марец 2010. (Рутенпрес) - Понеже була преложена пре випровадзанє на остатню драгу подпредсидателя Националного совиту Руснацох, схадзка Националного совиту хтора мала буц отримана прешлей соботи, будзе отримана тераз, на соботу, 6. марца.

Як то було плановане, на соботу Национални совит будзе розпатрац закончуюци рахунок за прешли, та финансийни план за перши шейсц мешаци того року.

На дньовим шоре буду и питаня вязани за верификованє одлукох хтори вчера принєшени на схадзки Управного одбору Завода за културу Войводянских Руснацох, як и информациї о уписованю Руснацох до Окремного виберанкового списку.

Схадзка на соботу, 6. марца, у Новим Орахове будзе отримана у просторийох тамтейшого КУД "Петро Кузмяк", з початком на 11 годзин.

(конєц) зам

КОЦУР-ТИРВАЦИ ДОКУМЕНТИ

У Коцуре ше почали видавац тирваци виводи зоз матичних кнїжкох

КОЦУР, 4. марец 2010. (Рутенпрес) – Од вчера, Коцурци можу у своєй Месней канцелариї достац виводи зоз Матичних кнїжкох на нових формуларох. То значи же тоти виводи од тераз буду тирваци односно буду важиц до евентуалних пременкох у особних податкох особи на хтору вивод глаши.

По словох коцурского матичара Дюри Макая, до коцурскей Месней кондзелариї сцигли нови формулари а до рахункара инсталирана нова програма так же витворени шицки условия за видаванє тирвацих матичних документох.

У вияви за Рутенпрес, Макаї гварел же административни такси и на далєй оставаю по старим цо значи же виводи зоз Матичних кнїжкох народзених, умартих и винчаних коштаю 290 динари а потвердзенє о державлянстве кошта 500 динари.

(конєц) цики

КОЦУР-ШКОЛСКИ ЗМАГАНЯ

На окружне рецитаторске змаганє двоме, а на змаганє зоз английского язику єден школяр зоз Коцура

КОЦУР, 04. марец 2010. (Рутенпрес) – У општини Вербас предлужени општински змаганя основних школох. На рецитаторским змаганю, Коцур мал два екипи. Екипу основней школи "Братство-єдинство" представяли брат и шестра Николета и Иван Недичово а екипу коцурского Каритасу предстаяли Наташа Медєши, Александра Горняк и Марко Недич.

Шицки пецеро дзеци зоз Коцура рецитовали по руски а на зонске змаганє ше пласовали Марко Недич опрез Каритасу у младшим возросту и його брат Иван Недич опрез коцурскей школи у старшим основношколским возросту.

На окружне змаганє зоз английского язику, од коцурских школярох ше пласовал Майкл Милинкович школяр осмей класи.

(конєц) цики

КОЦУР-ОГНЬОГАСЦИ

Огньогасни испит положели 27 млади Коцурци

КОЦУР, 4. фебруар 2010. (Рутенпрес) – Од трицец кандидатох, младих членох ДОД Коцур, хтори ходзели на преподаваня зоз основох огньогаства, 27 вишли на испит и шицки го положели.

На закончуюцим испиту участвовали 9 дзивчата и 18 хлапци, од 15 по 18 роки. Вони мали писмену, усмену и практичну часц испиту а питаня були зоз седем обласцох плус практична вежба.

Кандидати испит покладали пред комисию чиї предсидатель бул Келєвич Райко опрез Општинского огньогасного союзу а члени були и др. Борис Банович, Микола Фейса, Янош Надьфеї и Ивица Фейса.

Зоз положеним огньогасним испитом, потерашнї пионире огньогасци постали огньогасци а и так числене ДОД Коцур достал нових випитаних огньогасцох.

(конєц) цики

ВЕРБАС – БАЗЕН

Драгши уходнїци за заварти базен

ВЕРБАС, 4. марец 2010. (Рутенпрес) – Цена уходнїци за жимски базен Центра за физичну културу "Драґо Йовович" у Вербаше звекшана зоз 100 на 150 динари.

"Подрагшели лєм уходнїци за одроснутих, а уходнїци за дзеци остали на потерашнїм уровню. То перше подрагшенє у остатнї три роки", гварел новинаром директор ЦФК Любомир Секулич.

Як и по тераз, остава хаснованє завартого базена и сауни 300 динари, як и викенд ваучер, хтори кошта 550 динари и мешачна карта за базен 3.000 динари.

"Мешачно за отримованє завартого базена треба нам 550.000 динари, а пре подрагшенє струї, були зме примушени на тот крочай, гварел директор Секулич.

(Конєц)там

ВЕРБАС – КНЇЖКИ

Отворени мини саям кнїжкох

ВЕРБАС, 4. марец 2010. (Рутенпрес) – У рамику манифестациї Караван кнїжкох през Войводину, хтору орґанизує Здруженє сербских видавачох, на Площи Никола Пашич у центре Вербаса отворени мини саям кнїжкох.

Любителє писаного слова маю можлївосц же би на даскельо штандох купели найпопуларнєйши наслови белетристики, наукову литературу, словнїки и енциклопедиї видавательних хижох "Лоґо", "Йован", Беокнїжка", "Домино фер" и других.

Наслови мож купиц зоз попустом од 20 до 60 одсто, а саям будзе тирвац по 10. марец, кажди дзень од 8 до 20 годзин.

Як и по тераз, општина Вербас одрекла ше од надополнєня за закуп явней поверхносци и видавательни хижи, у вредносци суми, хтору би дали за плаценє места, подарую кнїжки вербаскей Народней библиотеки "Данило Киш".

(Конєц)там

ВЕРБАС – ФЕСТИВАЛ ПОЕЗИЇ

Розписани конкурс за младих поетох

ВЕРБАС, 4. марец 2010. (Рутенпрес) – 42. Фестивал поезиї младих отрима ше у Вербаше од 27. по 29. май, гварели вчера на конференциї за новинарох члени Совиту того фестивала.

Конкурс за младих поетох зоз Сербиї и реґиона, хтори розписал Совит Фестивала поезиї младих, послати на велї адреси, гварел предсидатель Совита и поета Ґоран Лабудович.

Право участвованя на конкурсу маю млади поетове до 27. рокох старосци, зоз циклусом од 10 нєобявених писньох на сербским язику и язикох националних заєднїцох, а зоз прекладом на сербски язик.

Писнї умножени у штирох прикладнїкох и подписани зоз шифру (зоз ришеньом шифри у окремней коверти), треба доручиц на адресу: Народна библиотека "Данило Киш" Фестивал поезиї младих, Вербас, М. Тита 87, 21 460 Вербас, найпознєйше по 1. април того року.

Поетове, чийо писнї вибере фахови жири, у составе др Зоран Дєрич, Дьордьо Сладоє и Небойша Деветак, буду участвовац на 42. фестивалу поезиї младих, хтори ше 27. 28 и 29. мая того року отрима у Вербаше, гварел член Совита Бранислав Зубович.

Найлєпших младих поетох Фестивал наградзи, а главна награда друкованє кнїжки.

У маю на Фестивал до Вербасу зоз Чарней Гори придзе караван мажореткиньох и оркестер плеховей музики, гварела членїца Општинскей ради задлужена за културу Єлена Милянич.

Поета и член Совита Фестивала Мирослав Ковач (пише по сербски и руски), гварел же ше очекує приход на Фестивал поетох зоз Словениї, Македониї, Босни и Герцеґовини и Чарней Гори, а же тогорочни конкурс Фестивала обявени и на даєдних сайтох у Горватскей.

"Фестивалу нєодлуга врациме мено хторе мал до 2006. року – Югославянски фестивал поезиї младих, а будземе ше закладац же би и змистово и по учашнїкох бул реґионални фестивал, на хторим ше буду змагац млади поетове зоз державох бувшей СФРЮ", гварел Ковач.

Ковач гварел же уж тогорочни Фестивал будзе ношиц и скорейши знак, роботу академского маляра зоз Вербасу Ратка Шоча.

(Конєц)там