РУСКИ КЕРЕСТУР – ВОЛОНТЕРСКИ КАМП

Волонтере нащивели Национални совит и Каритас

РУСКИ КЕРЕСТУР, 22. юлий 2010. (Рутенпрес) – Учашнїки Волонтерского кампу вчера нащивели Национални совит рускей националней заєднїци дзе их приял предсидатель Совиту Славко Рац.

Вон их привитал и пожадал же би були добри амбасадоре у штредкох и жемох.

Предсидатель Рац волонтером представел роботу Националного совиту, одношеня держави и националних меншинох, як и кратку историю Руснацох на тих просторох.

Волонтере тиж опатрели и музейну постановку котра змесцена у Замку.

У просторийох парохийного Каритасу хтори волонтере тиж нащивели як госци були и предсидатель општини Кула Светозар Буквич, предсидатель СО Кула, Желько Ковач, директор Каритасу СЧГ о. Владислав Варґа и Мирям Амброзини, зоз Каритасу Милану у Италиї.

Госци волонтером представели роботу институцийох котри представяю, а свою роботу представел и парохийни Каритас на чолє зоз координатором Янком Катоном.

(конєц) маф

РУСКИ КЕРЕСТУР – ВОЛОНТЕРСКИ КАМП

Ушорйованє парохиялней библиотеки

РУСКИ КЕРЕСТУР, 22. юлий 2010. (Рутенпрес) – Волонтере другого дня Волонтерского кампу у Руским Керестуре, почали роботу на ушореню библиотеки на керестурскей парохиї.

Вельке число кнїжкох и часописох котри нєадекватно змесцени, млади пребераю и преноша до предвидзених просторийох дзе их сортирую и складаю до витринох.

По словох капелана о. Дарка Раца, пре вельке количество кнїжкох, тота робота анї нє годна буц закончена.

По словох координаторки Кампа Светлани Нярадийовей, пре вельке число волонтерох, на базену поробени плановани роботи на ушореню простора.

(конєц) маф

ВЕРБАС – ПОЛЬОПРИВРЕДА

Почало виплацованє жита

ВЕРБАС, 22. юлий 2010. (Рутенпрес) – У вербаских задруґох почало виплацованє одкупених количествох жита.

Польопривреднїки гравя же добре заробку нє будзе, бо урожай подруцел, на даєдних поверхносцох и до 50 одсто.

Задруґа "Аґромикс" превжала 2 000 тони жита за млїн Юлияна Раца у Србобрану, а жито виплацує по 12 динари плус пдв за килограм и по 1. авґуст буду виплацени шицки одкупени количества.

Жито мож зохабиц у млїну на лаґеру, лаґер безплатни и може ше предац познєйше, по тарґовишней цени, а єст и можлївосц чераня за муку и отруби по утвердзених паритетох.

Землєдїлска задруґа "Бачо" прияла 1 500 тони зарна за млїн зоз Сенти и жито виплацує по 13,10 динари за килограм зоз пдв.

Задруґа "Либела продукт" зоз Змаєва, од своїх кооперантох, а медзи нїма и велї Коцурци и Вербащанє, одкупела аж 7 000 тони жита.

Тота задруґа жито польопривреднїком виплацує по 13 динари за килограм зоз пдв и векшина продуковательох уж достала пенєжи.

Тогорочна цена жита як гваря позитивно нєсподзивала польопривреднїкох, бо нє верели же пойдзе понад 11 динари.

За розлику од жита, пивски ярец, пре нїзку одкупну цену и пре нєвигодни условия одкупу, у наиходзацей сезони вербаски парасти нє буду шац.

(конєц) там

КУЛА – ИНВЕСТИЦИЇ

Покраїнски секретар Модест Дулич нащиви општину Кула

КУЛА, 22. юлий 2010. (Рутенпрес) – Покраїнски секретар за спорт и младеж Модест Дулич нєшка нащиви општину Кула.

Секретара Дулича приме предсидатель општини Светозар Буквич, а потим обиду спортски терен зоз штучну траву ОШ "Иса Баїч" у Кули за чию вибудов Покраїнски секретарият за спорт и младеж видзелєл 2, 8 милиони динари.

Плановане тиж же би секретар Дулич обишол и Спортски центер у вибудови у часци Кули на Вашарищу.

(конєц) маф

ВЕРБАС – КИРБАЙ

На Кирбаю у Новим Вербаше будзе и Владика

Як дознава Рутенпрес од пароха у Новим Вербаше, о. Ярослава Вовка у архиєрейней Служби Божей буду сослужовац священїки зоз наших парохийох, а под час Служби будзе споведз, и после мированє.

На Кирбай малу Службу Божу будзе служиц на 7 годзин рано о. Ярослав Вовк.

Кирбай у Новим Вербаше слави ше на швето Святого Владимира 28. юлия, а од снованя тей парохиї преноши ше на останю нєдзелю у мешацу, та прето тогорочни Кирбай будзе 25. юлия.

(конєц) там

НОВИ САД – ИНВЕСТИЦИЇ

Ище нє почала обнова Сербского народного театру

НОВИ САД, 22. юлий 2010. (Рутенпрес) – Обнова Сербского народного театру ище вше нє почала, гоч будинок заварти за нащивительох ище пред трома тижнями.

Зоз Фонда за капитални укладаня наявюю же би реконструкция требала почац пошвидко, бо проєктно-технїчна документация закончена, алє ше чекала дозвола Городу и инспекциї.

После того почнє тендерска процедура, а роботи би нє требали уплївовац на початок сезони, бо буду прилагодзени роботи ґлумцох.

Сербски народни театер достал 180 милиони динари за обнову и опреманє будинку, а идуцого року после сезони ше очекує и друга фаза роботох, кеди ше буду робиц будовательни роботи и звучна изолация.

(конєц) ад

НОВИ САД – ИНСТИТУЦИЇ

Ендре Пап предсидатель ВАНУ

НОВИ САД, 22. юлий 2010. (Рутенпрес) – Академик Ендре Пап єдногласно вибрани за нового предсидателя Войводянскей академиї наукох и уметносцох.

На схадзки Скупштини ВАНУ професор др Бранимир Ґудурич вибрани за ґенералного секретара, проф. др Йожеф Салма за секретара Оддзелєня дружтвених наукох и уметносцох, а проф. Србислав Денчич за секретара Оддзелєня природних и технїчних наукох.

(конєц) ад