ВЕРБАС – ЗДРАВСТВО

Реконструкция амбуланти у Коцуре нарок

ВЕРБАС, 28. юлий 2010. (Рутенпрес) – Заменїк покраїнского секретара за здравство проф. др Здравко Косєрина вчера нащивел Дом здравя "Велько Влахович” и Общи шпиталь у Вербаше у рамику анализи роботи шицких установох примарней здравственей защити у Войводини.

Др Косєрина гварел же у примарней здравственей защити єст пейц главни проблеми хтори вязани за реализацию капитациї, за обєкти, за опрему, кадри и санитетни материял, як и за лабораторийни реаґенси.

З тей нагоди вон гварел же у рамику Дома здравя у найподлєйшим стану амбуланти у Старим Вербаше и Коцуре и потребне окончиц їх реконструкцию.

У идуцим року почнє реконструкция амбуланти у Коцуре, а у Старим Вербаше будзе ше будовац нову амбуланту на другим месце, бо ше будинок терашнєй амбуланти, през поступок реституциї, муши врациц церкви, гварел предсидатель општини Вербас Желько Видович.

Кед у питаню Дом здравя у Вербаше, сотруднїцтво зоз локалну самоуправу барз добре и општина помага тоту установу.

Предсидатель општини Желько Видович гварел же предходних рокох Дом здравя од општини доставал 1,5 милиони динари рочнє, а у тим року достанє 4,5 раз вецей, з тим же општина финансує и роботу педиятрох и стоматолоґох у валалских амбулантох.

Директор шпиталю Петро Ґреґорински гварел же у шпиталюцо скорей треба пременїц патоси и же нєт досц кадри, гоч нєдавно прияли 26 роботнїкох.

Общому шпиталю потребни ище голєм 50 медицински шестри и очекую од Влади Войводини и Министерства здравя же допуща анґажованє нових здравствених роботнїкох.

(конєц) там

РУСКИ КЕРЕСТУР – ПОЛЬОПРИВРЕДА

Закончене виплацованє жита

РУСКИ КЕРЕСТУР, 28. юлий 2010. (Рутенпрес) – Виплацованє тогорочного урожаю жита кооперантом у двох керестурских задруґох закончене.

У дїловней єдинки "Керестурстеп" виплацованє жита по 13 динари за килограм вєдно зоз ПДВ, закончене вчера, а у , “Юарбису”, тиж по истей цени, виплацованє закончене 26. юлия.

До дїловней єдинки "Керестурстеп" жито придали вецей як 400 кооперанти з Руского Керестура и околних местох, а до Подприємства "Юарбис" жито придали коло 300 кооперанти.

(конєц) маф

РУСКИ КЕРЕСТУР – ВОЛОНТЕРСКИ КАМП

Заєднїцки забавни вечар у Каритасу

РУСКИ КЕРЕСТУР, 28. юлий 2010. (Рутенпрес) – Волонтерски камп у Руским Керестуре ше закончи зоз забавним вечаром у просторийох Каритасу, дзе ше волонтере сами костирали.

Учашнїки кампу з тей нагоди пририхтую Бависка без гранїцох за каритасових волонтерох, за дзеци до 13 рокох котри уключени до рижних секцийох.

Бависка без гранїцох почню на 20 годзин, а на 21 каритасово волонтере учашнїком Кампу, як и младим зоз орґанизациї "Пакт Рутенорум" пририхтаю диско вечар.

(конєц) маф

ВЕРБАС – ПРИВРЕДА

У "Медели" нєшка ґенерални штрайк

ВЕРБАС, 28. юлий 2010. (Рутенпрес) – Роботнїки Фабрики кексу "Медела" у Вербаше нєшка почали ґенерални штрайк, хтори будзе тирвац по виполньованє їх вимогох.

Роботнїки ше под час штрайку находза у фабричней мензи.

Штрайкацки одбор сообщел же ше роботнїки враца робиц кед им даватель роботи, компания "Инвей" Предраґа Ранковича Пецония обезпечи звекшанє заробкох од 50 одсто.

Штрайкаче глєдаю и же би "Инвей" з нїма предлужел розгварки о подписованю Колективного контракту, як и же би шицки учашнїки штрайку були ошлєбодзени одвучательносци пре учасц у штрайку.

Роботнїки глєдаю и же би им днї хтори препровадза у штрайку були плацени як же робели.

Штредня плаца у "Медели" виноши коло 20 000 динари, з тим же цепле єдзенє виноши 4 500, а Штрайкацки одбор твердзи же тот пенєж нє достаточни за основну еґзистенцию.

(конєц) там

НОВИ САД – КОМУНАЛИЇ

Обрахованє зогриваня по новей системи

НОВИ САД, 28. юлий 2010. (Рутенпрес) – Од новей сезони у Новим Садзе почнє обрахованє зогриваня по потрошнї, цо значи же кажде обисце на радиятори будзе мушиц убудовац термостатски вентили, калориметри и алокатори.

"Новосадска цепларня” у прегваркох зоз Европску банку за обнову и розвой же би достали кредит за тоту намену, алє як гварел директор “Новосадскей цепларнї” Владимир Єлич, кед же ше кредит нє достанє скупштини бивательох будинкох буду мушиц потписовац контракти зоз приватнима подприємствами хтори маю лиценцу за тоту роботу.

Кед же ше достанє кредит гражданє годни плациц монтажу у ратох, хто окончи роботу, бо цена монтажи 50 евра по радиятору.

Цепларня нє годна убудовац шицки алокатори и вентили до початку сезони зогриваня, бо отримує прейґ 85 000 обисца, так же буду анґажовани и други подприємства.

Гевти будинки хтори нє сцигню на шор буду и надалєй плациц по старей системи, през цали рок, алє док ше цала робота закончи, Скупштина городу вигласа одлуку же би шицки Новосадянє мушели мац монтирану тоту опрему на радияторох.

Преценює ше же нови систем обрахованя зогриваня зменша рахунки за коло 60 одсто жительох, док други буд плациц зогриванє исто, або и вецей у зависносци од излолациї будинку и старосци облакох.

(конєц) ад

БУДАПЕШТ – КУЛТУРА

Наградзени ход "Св. Єфрема"

БУДАПЕШТ, 28. юлий 2010. (Рутенпрес) – Хлопски византийски хор "Св. Єфрема" зоз Будапешту достал першу награду "Суперсоник" за компакт диск церковней византийскей музики.

Хор "Св. Єфрем" награду достал за штварти компакт диск хтори видати у юнию под назву "Византийни мозаїки" на хторим ше находзи 18 композициї класичних и сучасних композиторох.

Тоту награду додзелює Луксембуржски професийни музични фонд "Пицикато" од 1997. року, за компак диски хтори ше зявели на медзинародней сцени.

У остатнїм чаше таку награду достал хор-маестро, пияниста и композитор Мадярскей филхармониї Золтан Кочиш.

(конєц) млав/ад