|
 |
1
РУСКИ КЕРЕСТУР - ПРИВРЕДА
Од
нєшка штрайк у АБЦ фуд
РУСКИ КЕРЕСТУР, 23. новембер 2011. (Рутенпрес) - Од
нєшка, од 6 годзин рано, у Фабрики АБЦ фуд у Руским
Керестуре почина ґенерални штрайк.
Штрайк преглашени понеже од роботнїкох предложена
динамика виплацованя плацох и других длуствох, власнїца
и руководство Фабрики змарзнутей желєняви нє прилапели.
Позавчерайши и вчерайши прегварки Штрайкацкого одбору и
руководства о динамики виплацованя заробкох стаємно,
дочасово занятим и сезонцом, нє були успишни, так же
вчера, стаємно и дочасво заняти роботнїки вигласали
ступанє до пред тим наявеного ґенералного штрайку.
Штрайк урядово приявени до полициї и управом двох
синдикатох хтори дїлую у АБЦ фуд, а як дознава
Рутенпрес, до Фабрики нєшка придзе и инспекторка за
роботу и роботни одношеня, котрей штрайк тиж приявени.
Нєшка рано з власнїцу и руководителями секторох у
Фабрики почню и прегварки о отримованю минимума процесу
роботи.
Роботнїки од руководства вимагаю же би стаємно заняти цо
скорей достали плацу за авґуст и розлику за три
минималци. Сезонски роботнїки же би цо скорей достали 3
заостати плаци - од децембра прешлого, заключно з
фебруаром того року.
Роботнїки предкладаю же би по 30. новембер стаємно
заняти достали плацу за септембер и розлики од
минималцох за перши тогорочни три мешаци, а сезонски
роботнїки по конец новембра же би достали други три
плаци - од марца по май.
Предложене и же би сезонци за тогорочни септембер, плацу
достали до конца новембра, як и же би були виплацени
дньовнїци комбайнером и шофером. Штрайк будзе тирвац
покля вимоги роботнїкох нє буду сполнєти.
Штрайкацки одбор поволал шицких занятих и дочасово
занятих же би ше одволали на штрайк, алє же би
почитовали и минимум процесу роботи, хтори будзе
догварени. Тиж так, поволал и сезонцох, же би нєшка
пришли опрез Фабрики, дзе будзе познате чи годни и
войсц до кругу АБЦ фуд.
(конєц) зам
На початок |
|
2
НОВИ САД - МЕДЗИОПШТИНСКЕ СОТРУДНЇЦТВО
Општини лєм вєдно на европски конкурси
НОВИ САД, 23. новембер 2011. (Рутенпрес) - Покраїнски
секретарият за медзирегионалне сотруднїцтво и локалну
самоуправу вчера представел два, спомедзи седем проєктох
медзиопштинского сотруднїцтва на подручу Войводини.
Виключно ше их финансує з покраїнских фондох, за цо
обезпечени коло 11 милиони динари.
Роби ше о проєктох руралного розвою у обласци
польопривредней продукциї, хтори вєдно запровадзели
Суботица и Зомбор, та за розвой руралного туризму у
сримских општинох Беочин, Сримски Карловци и Ириг.
Попри потримовки проєктом прейґгранїчного сотруднїцтва,
Влада Войводини перша институция у держави хтора
самостойно почала финансовац проєкти медзиопштинского
сотруднїцтва, у хторих тераз участвую коло 15 општини.
Як
визначел Покраїнски секретар за медзирегионалне
сотруднїцтво и локалну самоуправу Тихомир Стантич, таки
заєднїцки проєкти войводянских општинох нєобходни пре
векши можлївосци на конкурсох за европски предприступни
фонди.
Ґу
тому, як гварел Стантич, проєкти медзиопштинского
сотруднїцтва нєобходни и за ровномирни розвой
Войводини, бо резултати з остатнього попису указую же
рурални подруча барз заоставаю за городскима, а число
жительох у нїх вше менше.
(конєц) саб
На початок |
|
3
ШИД
-НВЕСТИЦИЇ
Починаю роботи на вибудови ґазоводу
ШИД, 23. новембер 2011. (Рутенпрес) - На ютре
предсидатель Влади Войводини др Боян Пайтич у Куковцох
при Шиду, урядово отвори початок роботох на
вибудови ґазоводу за шицки населєни места у шидскей
општини.
Крем предсидателя войводянскей влади и найвисших
представнїкох локалней самоуправи, шветочносци птвераня
буду присуствовац и ґенерални директор “Сербияґазу”
Душан Баятович, як и представнїки стратеґийного партнера
на вибудови - италиянского конзорциюму “ҐАП” з Фиренци.
Вредносцс роботох 16 милиони еври, а як гваря у локалней
самоуправи, општина Шид витворела найвигоднєйшу вибудов
ґазней мрежи, понеже за цалу роботу з єй буджету нє
будзе в нїч идвоєне, а и Шид и шицки валали достаню ґаз.
На
початок роботох наявени и приход представнїкох Влади
Италиї и италиянских привреднїкох, хтори пошвидко маю
намиру инвестовац до шидскей општини.
(конєц) влдї
На початок |
|
4
КУЛА - ЕКОЛОҐИЯ
Помоц у обласци защити животного штредку
КУЛА, 23. новембер 2011. (Рутенпрес) - Општину Кула
вчера нащивели подсекретар у Покраїнским секретарияту за
защиту животного штредку и отримуюци розвой др Слободан
Пузович и совитнїца предсидателя Влади Войводини
задлужена за защиту животиньох Єлена Балашевич.
Госци перше бешедовали з предсидательом Општини Кула у
задзекованю Светозаром Буквичом и предсидательом
Скупштини општини Кула Жельком Ковачом, а на розгваркох
присуствовали и директор ЯП “Завод за вибудов Кула”
Бранислав Вуйович, Стефан Ґелевайчук з Општинского
оддзелєня за инспекцийни роботи, представитель Руху
горякох Ґоран Круплянин, та представитель Ветеринарскей
станїци др Йова Хайдин.
Секретар Пузович представел роботу Секретарияту и
актуални проблеми у защити псох и мачкох у Войводини, а
интересовал ше и за терашнї уровень защити животиньох у
кулске општини, та за дзиви депониї и проєкт
пречисцованя Велького бачкого беґелю.
Єлена Балашевич понукла помоц у снованю реґионалного
азилу за пси и мачки-блукачох. Заключене же вибудов и
отримованє азилу Општину будзе коштац менєй як
надополнєня за части тужби пре напади псох, а азил може
буц самоотримуюци.
Слободан Пузович и Єлена Балашевич нащивели Розсаднїк
Руху горякох општини Кула дзе визначене же полєшованє
териториї кулскей општини єден з найважнєйших задаткох
Руху. Општина Кула, з менєй як 1 одсто полєшеней
териториї, спада до ридко полєшених у Войводини.
Госци обишли и обєкт за прилапйованє псох, дзе им
представени проєкт будуцого азилу и засадзованя
защитного пасу коло нього.
Попри задовольства з поробеним, госци наявели блїзше
сотруднїцство з Општину Кула пре швидше и квалитетенєйше
ришованє проблемох вязаних за защиту животного штредку.
(конєц) аму
На початок |
|
5
ЗОМБОР
-
МЕДЗИОПШТИНСКЕ СОТРУДНЇЦТВО
Зомбор, Суботица и Канїжа у проєкту Ю-ес-ей-ду
ЗОМБОР, 23. новембер 2011. (Рутенпрес) - У Зомборе нєшка
будзе подписани контракт о сотруднїцтве городох Зомбор,
Суботица и Општини Канїжа, у обласци розвою руралних
обласцох тих локалних самоуправох.
Проєкт отримуюцого локалного розвою, хтори финансує
америцка аґенция за розвой Ю-ес-ейд, обдумани пре
унапредзенє квалитету живота у валалох облапених
општинох. Општини-учашнїки формую партнерски кластери,
хтори олєгчаю и унапредза роботу, насампредз заградкарох
и овоцарох.
Як
виявела руководителька Канцелариї за локални економски
розвой Суботици Ерика Кудлик, за приступанє проєкту,
нєформално наволаного “Оставам на валалє”, барз
заинтересовани и други општини сиверозаходней Бачки.
(конєц) саб
На початок |
|
6
НОВИ САД - ИНФРАСТРУКТУРА
Закончена реконструкция Кею у Новим Садзе
НОВИ САД, 23. новембер 2011. (Рутенпрес) - Зоз
символичним садзеньом остатнього древка, городоначальнїк
Нового Саду Иґор Павличич означел законченє
роботох на реконкструкциї Слункового кею у Новим Садзе.
Друга фаза реконструкциї и ожелєньованє кею коло Дунаю
тирва од мая. Вибудовани нови пешацки, бициґлистични и
трим-дражки, поставени лавки, канти за шмеце и явни
тоалет.
Роботнїки ЯП “Желєнїдло” ушорели желєни поверхносци, а
гортикултурни роботи коштали коло 22 милиони динари.
З
ушореньом тей поверхносци, Нови Сад будзе конкуровац на
змаганє за найлєпше ушорену явну поверхносци, хторе ше
отримує у Барселони, у Шпаниї, 23. януара идуцого року.
(конєц) ад
На початок |
|
7
РУСКИ КЕРЕСТУР - ИНФРАСТРУКТУРА
Закончене оправянє мосцикох
РУСКИ КЕРЕСТУР, 23. новембер 2011. (Рутенпрес) - Вчера у
Руским Керестуре закончене оправянє дзевец векших и
менших мосцикох, на вецей местох у валалє, а на єдним
месце положена и цалком нова инсталация за атмосферску
канализацию.
Роботи на оправяню мосцикох окончело БП “Блашко” з Кули,
їх предрахункова вредносц виноши 650 000 динари (без
ПДВ), а средства за тоту роботу обезпечени з месного
самодоприносу.
Дзе
их нє було, попод мосцики покладзени пайпи, на даєдних
пайпи заменєни з новима, уляти бетонски конструкциї, дзе
було потребне и дражка на мосцикох.
Єдна з векших роботох було кладзенє пайпох и ушоренє
цалосного одводзеня атмосферскей води до яркох на драги
у улїци Сримского фронта, на крижаню з Я. Т. Боґмека.
Там
попод драгу положена цалосна потребна инсталация и єден
шахт, а од нєшка там отворени и транспорт, хтори єден
час бул заварти пре тоти роботи.
(конєц) зам
На початок |
|
8
НОВИ САД - ПОЛЬОПРИВРЕДА
Войводина уж сполнєла квоту
НОВИ САД, 23. новембер 2011. (Рутенпрес) - Войводина
виполнєла свою квоту од 28 тисячи тони кукурици за
предай до Робних резервох.
Интервентни одкуп кукурици за Робни резерви по 18 динари
за килу почал позавчером, прейґ Продуктней берази у
Новим Садзе.
Робни резерви одкупя 50 тисячи тони кукурици, а як
оценєли фаховци, то добри поцаг держави, бо стабилизує
тарґовище и помогнє статкаром.
Коректна цена и сиґурне виплацованє опредзелєни велїх
польопривреднїкох же би ю тераз предали до Робних
резервох.
Як
гварел директор Продуктней берзи у Новим Садзе Жарко
Ґалетин, причина велького интересованя польопривреднїкох
за предай то цена од 18 динари, цо за 10 одсто вецей од
комерциялней на тарґовищу. Кукурица будзе виплацена о 7
днї од подписованя конктрактох.
Член Асоцияциї польопривреднїкох Мирослав Ивкович гварел
же Робни резерви одредзели мали количества за одкуп, та
ше нє шицки опредзелєли за предай, понеже є уж
лаґерована и винїманє зоз силосох би представяло
дополююци трошок.
(конєц) ад
На початок |
|
9
ВЕРБАС - ОБРАЗОВАНЄ
Караван младих о дзецинских правох
ВЕРБАС, 23. новембер 2011. (Рутенпрес) - Концом прешлого
тижня, у будинку Општини Вербас отримани Караван
дзецинских правох, у котрим участвую штредньошколци з 8
войводянских городох.
Проєкт засновани на Песталоци-мрежи, котра витворює
проєкти интеркултуралносци. Вербас представел право на
образованє з Конвенциї о правох дзецка.
Проєкт-менаджер проєкту “Толериши се” Саша Дуїн визначел
же у шицких местох дзе Караван прейдзе, перше будзе
роботня о дзецинских правох, а потим и нащива значим
местом у тим городзе.
После цалого проєкту буду витворени три филми, як и
материяли котри буду хасновац дзецом з Войводини и
ширше.
За
проєкт конкуровал Нови Бечей, а вредни є 3 тисячи 999
швайцарски франки.
(конєц) пан
На початок |
|
10
РУСКИ КЕРЕСТУР - ВИРСКИ ЖИВОТ
Акция парохийного Каритасу
РУСКИ КЕРЕСТУР, 23. новембер 2011. (Рутенпрес) -
Парохийни Каритас иницировал тогорочни жимски акциї за
фамилиї у потреби.
Збера ше очувани жимски шмати и обуй, як и пенєжни
прилоги за огриву, котри мож принєсц кажди вовторок и
пияток од 20 г. до просторийох Каритасу.
Помоц мож принєсц и кажди дзень на парохию, а пенєжни
прилог дац и до Каритасовей шкатули у Розвойней банки
Войводини.
(конєц) маф
На початок |
|
11
На початок |
|
12
На початок |
|
13
На початок |
|
14
На початок |
|
15
На початок |
|
16
На початок |
|
17
На початок |
|
18
На початок |
|
19
На початок |
|
20
На початок |
|
|
|
|
|
|
|