РУСКИ КЕРЕСТУР - МЛАДИ-ВОЛОНТЕРСКИ КАМП

Наймасовнєйши до тераз

РУСКИ КЕРЕСТУР, 21. юлий 2010. (Рутенпрес) - Вчера у Руским Керестуре почал до тераз наймасовнєйши Медзинародни волонтерски камп, котри будзе тирвац по 29. юлий.

На роботу до Керестура пришли 13-еро млади з иножемства - волонтере зоз Шпаниї, Французкей, Нємецкей, Мадярскей, Ческей, Македониї и зоз Польскей.

З местох у Сербиї, у Руским Керестуре 10 днї буду робиц седмеро млади зоз Старих Лединцох, Кикинди, Нового Саду, Крушевцу, Яґодини и з Кули, алє и прейґ 20 млади, векшином основношколци, з Руского Керестура.

Як гварели лидерки Кампу Сенка Надьова и Светлана Нярадийова, з прейґ 40 учашнїками, тогорочни Штварти медзинародни волонтерски камп будзе и найчисленши до тераз.

Главна робота тогорочного Волонтерского кампу ушорйованє и пораєнє обсяжней библиотеки на рускокерестурскей парохиї, медзитим, понеже вчера у Керестуре було швето Илиї, роботи почали на базену, понеже ушоренє базену пред наступним Музичним фестивалом "Водова фест", тиж єдна спомедзи роботох волонтерох.

Наступних дньох, волонтере буду подзелєни до двох ґрупох, за роботу у парохийней библиотетки и на базену, а попри того, як и скорейших рокох, за волонтерох буду орґанизовани и роботнї, та провадзаци змисти вязани за упознаванє з Руснацами и Руским Керестуром.

Волонтере од Керестурцох уж достали помоц у пожички бициґлох, пре каждодньови одход на роботу, обезпечена и помоц од спонзорох, насампредз од Школи "Петро Кузмяк" за змесценє, та од керестурских подприємствох за костиранє.

Волонтерски камп орґанизує Младежска орґанизация Керестура "Пакт Рутенорум", у сотруднїцтве з Волонтерским центром Войводини и з тим проєктом конкуровала на вецей адреси - до ресорних покраїнских секретариятох и министерствох, но, як дознава Рутенпрес, за тераз нє достали одвити з тих конкурсох.

(конєц) зам

БЕОҐРАД - ПОЛЬОПРИВРЕДА-ЖИТО

Цену жита одредзи тарґовище

БЕОҐРАД, 21. юлий 2010. (Рутенпрес) - Министер тарґовини и услугох Сербиї Слободан Милосавлєвич гварел же конєчна цена жита тогорочного роду будзе завишиц од догваркох на тарґовищу и квалитету роби, а оценєл же цена од 12 до 13 динари за килограм реална.

Милосавлєвич гварел же Дирекция за робни резерви куповала жито по тей цени, дзепоєдни одкупйоваче понукали векшу, алє цену циґурно зменша квалитет жита.

Вон оценєл же примарни продукователє вироятно нє буду задовольни, алє з оглядом же защитна цена жита тогорочного роду у Европскей униї дацо вецей як 10 динари, односно 1,01 еври, по тих ценох будзе догварена купованє тогорочного жита.

(конєц) ад

РУСКИ КЕРЕСТУР - ПОЛЬОПРИВРЕДА-ЖИТО

Виплацованє по 13 динари

РУСКИ КЕРЕСТУР, 21. юлий 2010. (Рутенпрес) - У Дїловней єдинки "Керестурстеп" у Руским Керестуре, вчера за жито виплацени перши 142 кооперанти, а виплацованє за жито нєшка почнє и у "Юарбису".

И "Керестурстеп" и "Юарбис" жито виплацує по 13 динари за килограм, цо цена вєдно з ПДВ, на основи догварки о цени жита на уровню "Войводина-аґрару", а то випатра будзе и терашня конєчна цена.

До Дїловней єдинки "Керестурстеп" жито придали прейґ 400 кооперанти з Керестура и околних местох, а до Подприємстве "Юарбис", жито придали коло 300 кооперанти.

(конєц) зам

КОЦУР - МЕСНА ЗАЄДНЇЦА

Виберанки за Совит 17. октобра

КОЦУР, 21. юлий 2010. (Рутенпрес) - Дополнююци виберанки за нових членох Совиту Месней заєднїци Коцур буду отримани17. октобра того року, а розписала их вчера предсидателька Скупштини општини Вербас Маряна Мараш.

У Виберанковей єдинки 27 Коцур-1 будзе ше виберац двох членох Совиту, у Виберанковей єдинки 28 Коцур-2 єдного члена, а у Виберанковей єдинки 29 Коцур-3 двох членох Совиту МЗ Коцур.

Члени Совиту буду виберани по єднокружней векшинскей системи, виберанкови поступок витвори Општинска виберанкова комисия, а предвиберанково активносци починаю 1. септембра.

(конєц) там

ВЕРБАС - ПРИВРЕДА

Вербас нащивели привреднїки з Италиї

ВЕРБАС, 21. юлий 2010. (Рутенпрес) - Представнїки Амбасади Републики Италиї и Комори италиянско-сербских привреднїкох, нащивели вчера општину Вербас и упознали ше з можлївосцами за привредне сотруднїцтво медзи фирмами з тей часци Бачки и Италиї.

НОВИ САД - ПРИВРЕДА

Продукция цименту хтори чува животни штредок

НОВИ САД, 21. юлий 2010. (Рутенпрес) - Беочинска фабрика цименту "Лафарж" почела продукцию новей файти цименту, хтори чува животни штредок, гварене у сообщеню з того подприємства.

Як гварене у сообщеню, нови цимент "Порланд-композитни ЦЕМ" зменшує трошки продукциї, а як резултат дава оптималне трошенє цименту и малу потребу за воду.

Прето вон редукує трошенє природних ресурсох и емисию угльового-диоксиду, з чим чуба животни штредок.

(конєц) ад

НОВИ САД - ОБРАЗОВАНЄ

Остало ище 1 512 места на факултетох

НОВИ САД, 21. юлий 2010. (Рутенпрес) - После першого уписного термину, на новосадских факултетох остало ище 1 512 шлєбодни места на основних студийох, а Медицински факултет єдини нє дал податки о шлєбодних местох.

Як гварела портпаролка Ректорату Єлена Цвеїн, векшина шлєбодни мест єст на самофинансованю - 1 263, а на буджету остало лєм 249 места, крем на Правним, Економским, Факултету технїчних наукох и Факултету за спорт и физичне воспитанє.

На Польопривредним факултету найвекше интересованє того року було за напрями аґро-еколоґиї и фитопатолоґиї, на Филозофским за напрями психолоґиї, журналистики и анґлийского язика, на ПМФ за напрями у готелиєрстве и туризмолоґиї, док на ФТН, найвекше интгересованє будуцих студентох було за напрями инжинєрского менаджменту, урбанизму, рахункарства и архитектури.

На Медицинским факултету на шицких напрямох конкуровали по даскельо кандидатох за єдно место, а найвекше интересованє було за Академию уметносцох. На ґлуму ше за 10 места приявели 120 кандидатох.

У першим уписним термину ше приявели 5,6 одсто вецей кандидати як цо було шлєбодни места, а прейґ 98 одсто приявених положело приємни испит.

Други уписни термин будзе од 1. по 20. септембер.

(конєц) ад

НОВИ САД - КУЛТУРА

З нагоди ювилею "Червеней ружи"

НОВИ САД, 21. юлий 2010. (Рутенпрес) - Перша схадзка Редакциї за видаванє  публикациї з нагоди 50-рочнїци Фестивала култури "Червена ружа", отримана вчера у Заводу за културу войводянских Руснацох.

Редакцию творя пописоваче нотного и текстуалного материялу композицийох виведзених на дотерашнїх "Червених ружох" - Лидия Пашо, Мирон Сивч, Юлиян Рамач, фахови консултант Ирина Олеяр, по функциї, директоре Дома култури Руски Керестур Владимир Малацко и Заводу за културу ВР Мирослав Кевежди, дизайнер Иґор Орсаґ, а редактор того виданя и автор текстуалней часци будзе Дюра Латяк.

На основи од скорей подписаного протоколу о сотруднїцтве медзи Домом култури Руски Керестур и Заводом за културу ВР, уж пописани, та електронски нотно и текстуално обробени дзецински шпиванки виведзени на дотерашнїх “Червених пупчох” у рамикой “Червеней ружи” - коло 420 композициї за дзеци.

Потримовку тому пописованю дава и Руска редакция Радио Нового Саду, алє и велї гражданє котри посилали нотни записи, пре оможлївйованє цо цалоснєйшого спатраня и публикованя музичней творчосци "Червеней ружи" и "Червеного пупча".

Пред Редакцию тей, вироятно тротомней публикациї, пописованє и обрабянє ище коло 490 шпиванкох у народним и забавним духу, хтори настали и виведзени су на "Червеней ружи", а як дознава Рутенпрес, и ту уж обробена значана часц композицийох у народним духу.

Публикация з нагоди 50-рочнїци нашого найвекшого и найстаршого Фестивала - "Червеней ружи", облапи коло 900 композициї, а мала би буц видрукована праве по ювилейни, Пейдзешати фестивал идуцого, 2011. року.

(конєц) зам

НОВИ САД - КУЛТУРА

Ютре схадзка УО

НОВИ САД, 21. юлий 2010. (Рутенпрес) - У Новим Садзе на ютре будзе отримана Дванаста схадзка Управного одбору (УО) Заводу за културу войводянских Руснацох.

Попри информациї о активносци Заводу медзи двома схадзками УО, найзначнєйша точка будзе проєктни предкладаня за дїялносц Заводу на основи средсттвох за перши и други квартал того року.

Управному одбору будзе предложене же би за програмни активносци и набавянє єдней камери, у наступним периодзе Завод опредзелєл прейґ 1,9 милиони динари.

За Информацийно-документацийну програму, дзе проєкти як цо креированє фото-документациї рускей култури; пописованє музейного скарбу у Коцуре, пописованє музейного скарбу у Шидзе, та пописованє нотного материялу з дотерашнїх фестивалох култури "Червена ружа", предложене унапрямиц вєдно 480 000 динари.

У обласци Розвойно-виглєдовацкей програми, предложене же би Завод за културу з вєдно 605 000 динари финансовал програму потримовки роботи нашим КУД прейґ помоци фаховцох и отримованя семинару; проєкт "Политика финансованя култури на локалним уровню", трибину "Руски часописи", пририхтованє за ИПА и други медзинародни фонди, та за семинари о писаню проєктох и стратеґийним планованю.

У Програми за сотруднїцтво, Завод за културу ВР би мал видвоїц 40 000 динари за софинансованє уж видатей публикациї о Якимови Сивчови, та 100 000 динари за "Водова фест" у Руским Керестуре.

Конєчну одлуку о предложеним виносу и проєктох, принєше Управни одбор на ютрейшей схадзки.

(конєц) зам

РУСКИ КЕРЕСТУР - КУЛТУРА-МЛАДИ

Того викенду "Водова фест"

РУСКИ КЕРЕСТУР, 21. юлий 2010. (Рутенпрес) - Того викенду, 23. и 24. юлия, у Руским Керестуре будзе отримани Штварти музични фестивал "Водова фест", котри орґанизяє Младежска орґанизация Руского Керестура "Пакт Рутенорум".

Попри учасци популарних менох з нашей и иножемней естради, "Водова фест" провадзи и удатна орґанизация, други атрактивни змисти, алє и баз добра обдумана промоция Фестивалу прейґ отримованя "Промотивних журкох" по местох ширцом Войводини, а остатня така була всоботу, 17. юлия у Вербаше.

Прешлого року, "Водова фест" през два днї отримованя мал коло 4 500 нащивительох, а з оглядом на учашнїкох тогорочного, орґанизаторе очекую нє лєм повторенє, алє аж и звекшанє нащиви.

На трох бинох, хтори буду поставени на отвореним, на керестурским базену - на Главней бини, Реґе-бини и Бини-ладї, хтора и того року на базен доплїва з Нового Саду, 23. и 24. юлия наступя 10 познати и менєй афирмовани музични ґрупи и 11 ди-джейове.

Главна гвизда тогорочного "Водова фесту" популарни Рамбо Амадеус, алє и ґрупи як цо то "Квин Рил Трибют Бенд" з Беоґраду, "КУД Идийоти" з Пули, з Горватскей, "Страх од летеня", "Д Фрайле", "Самостални рефернти" и други.

Спомедзи руских ґрупох, на "Водова фесту" наступя популарни млади керестурски состави "Крейзи казанс" и "Брейнловс", а орґанизаторе за публику у тим поглядзе пририхтую и дзепоєдни нєсподзиваня.

У рамикох "Водова фесту" будзе отримани и мото-камп, буду орґанизовани штанди вецей нєвладових орґанизацийох и здруженьох, а як и скорейших, и того року орґанизаторе пририхтую места за ошвиженє и костиранє. Уходнїца за єден вечар 250 динари.

(конєц) зам

НОВИ САД -ИНФОРМОВАНЄ

Змена у Новосадскей телевизиї

НОВИ САД, 21. юлий 2010. (Рутенпрес) - Главна и одвичательна редакторка бувшей ТВ "Аполо", хтора пременєла мено до “Новосадскей телевизиї”, Миряна Владисавлєв - зменєна и на єй место поставена длугорочна новинарка тей телевизиї Смилька Сеїн.

Як главу причину за змену, руководство наведло подле сотруднїцтво з директором Андрейом Томашевичом и редакцию.

На схадзки Управного одбору утвердзене же бувша редакторка прекрочела овласценя, прецо процив нєй наявена виновна приява.

Миряна Владисавлєв демантовала тоти твердзеня и у сообщеню гварела же ю руководство нагнало же на задзекованє, а на єй роботу нє була анї єдна заувага.

Вона твердзи же директор Томашевич обструовал єй роботу и пробованя же би злєпшала роботу редакциї. Тиж так, Владисавлєвова гварела и же єй директор бранєл з колєґиню бешедовац на мацеринским, словацким язику.

(конєц) ад

СУБОТИЦА - ИНФОРМОВАНЄ

Радио Суботица достала нового директора

СУБОТИЦА, 21. юлий 2010. (Рутенпрес) - На колеґиюме Явного подприємства Радио Суботица, пондзелок, 19. юлия, дотерашнї директор Антал Биачи, хтори тоту функцию окончовал 11 роки, придал длужносц новому директорови.

За нового директора вибрани Тони Бедалов, остатнї два роки предсидатель Управного одбору Радио Суботици. Бедалов наглашел же жада зачувац тоту медийну хижу и єй вецейязичносц, а будзе робиц и на унапредзованю и злєпшованю орґанизацийних роботох и економскей ефикасносци.

(конєц) кпа