ВЕРБАС – УПИС

У Вербаше будзе квота

ВЕРБАС, 3. марец 2010. (Рутенпрес) - Руснаци у општини Вербас блїзко при квоти, хтора предвидзена за тоту општину и нєобходна же би ше орґанизовало нєпоштредни виберанки за нови Национални совит.

По словох Неди Кустудич у Матичней служби Општини Вербас, хтора задлужена за упис националних меншинох, по тераз сцигли 1.852 вимоги за упис, од того числа 8 одботи и 373 у виробки.

По тим, у општини Вербас до окремного списку уписани 1.471 Руснаци, а очекує ше же буду и уж спомнути 373, чийо вимоги за упис у процедури.

У општини Вербас жию 3.765 Руснаци, та квота за упис до окремного списку за цалу општину виноши 1.658. У самим Вербаше жию понад 1.320 Руснаци, так же квота за город виноши 660 уписаних, а заключно зоз вовторком, зоз Вербасу було блїзко 600 уписаних.

Од вкупно осмерих Руснацох, хтори одбити, тройо нє полнолїтни, єдней особи у медзичаше вжата дїловна способносц, а штири формулари дати до Националного совиту Руснацох, бо особи хтори дали вимогу за упис до окремного виберанкового списку, нє маю пребивалїще у општини Вербас.

Од националних меншинох, у општини Вербас найвецей ше уписали Руснаци, потим шлїдза Українци, Мадяре, Роми, Нємци и Горвати.

(Конєц)там

НОВИ САД - КУЛТУРА

Нєшка Управни одбор Заводу

НОВИ САД, 3. марец 2010. (Рутенпрес) - Порядна, єденаста схадзка Управного одобру Заводу за културу войводянских Руснацох, будзе отримана нєшка, 3. марца у Новим Садзе, у просторийох Заводу, з початком на 15 годзин.

После актуалносцох и анализи програми тогорочного означованя Националного швета Руснацох, Управни одбор будзе розпатрац звити о роботи и финанасийним дїлованю Заводу у прешлим року.

Управнио одбор нєшка принєше и програму роботи Заводу за културу у тим року, з финансийним планом, алє и дзепоєдни проєктни предлоги за перши квартал 2010. року.

(конєц) зам

ВЕРБАС – ШКОЛА

Школа достанє зогриванє на ґаз

ВЕРБАС, 3. марец 2010. (Рутенпрес) – Основна школа "Светозар Милетич" у Старим Вербаше, у хторей ше учи найвекше число руских дзецох, нєодлуга будзе роботни простор зогривац на природни ґаз, место на мазут.

Зоз помоцу Покраїнского секретарията за образованє зоз буджету Войводини обезпечене 11,5 милиони динари и тота сума будзе потрошена на реконструкцию котловнїци и на инсталованє пеца на ґаз.

Роботи почали вчера и буду готови за три тижнї.

По словох директора ОШ "Светозар Милетич" Станка Зечевича, нова система будзе зогривац 4.020 квадратни метери простору.

Можлївосц зогриваня на мазут будзе зачувана, так же вибор енерґента будзе завишиц од того цо ше баржей виплаци.

(конєц)там

ВЕРБАС – ЧКОДА

Витор звалєл хижу

ВЕРБАС, 3. марец 2010. (Рутенпрес) - Моцни витор, хтори дул предходного викенду, звалєл стару хижу у улїци Светозара Марковича у Старим Вербаше, у хторей жиє фамелия Александрович.

Перше спадла греда хтора трима закрице, а всоботу, док фамелия фриштиковала, спадло цале закрице.

У хижи биваю оцец Саша, мац Ґордана и троме хлапци: Дьордє, Никола и Александер и на щесце, нїхто нє настрадал.

Тоту хижу Александровичово достали од вербаского Центра за социялну роботу и як гваря, хижа анї теди нє була у добрим стану.

Центер за социялну роботу Александровичом понукнул помоц од три до штири тисячи динари же би себе нашли биванє, алє, як гваря, за тот пенєж нє можу нїч найсц и за тераз останю у хижи, гоч нє маю струї и боя ше же ше на нїх звалї.

(Конєц)там

РУСКИ КЕРЕСТУР-ПАРОХИЯ

Удатна акция збераня помоци

РУСКИ КЕРЕСТУР, 3. марец 2010. (Рутенпрес) - У Руским Керестуре, прешлей соботи 27. фебруара 32 фамелийом у потреби подзелєни пакети зоз поживу котру през цали тидзень назберали парохиянє, а котру орґанизовал парохийни Каритас.

По словох пароха о. Михайла Малацка, акция порушана пре чежку ситуацию у велїх валаских фамелийох, окреме тераз при концу жими, дзе єст вельки потреби за поживу, облєчиво и обуй, поготов за дзеци.

На поволанку помогнуц тим цо найменєй маю, а жию коло нас, одволали ше 60 особи, и найвецей назберане праве поживи як и шмати, а назберане и 9500 дин.

По словох координатора керестурского Каритасу, Янка Катони, за подаровани пенєж ше купи огрива двом фамелийом, а назберане облєчиво будзе доступне у каритасовим бутику же би себе вибрал кому цо потребне.

Як за "Рутенпрес" виявел Катона, за пейц роки дїялносци парохийного Каритасу, ище нїґда нє була така криза. Источашнє Каритас барз задовольни як ше парохиянє одволали на акцию и дзекує шицким котри помогли.

Зоз тоту акцию домашнї Каритас ше придружел до инициятиви Европскей униї наволаней "Нула худобства" у року борби процив худобства котрей пошвецени 2010. рок, а до котрей ше приключели и Каритаси цалей Католїцкей Церкви у Европи.

(конєц) маф

РУСКИ КЕРЕСТУР - СПОРТ

"Русин” ма 10 клуби

РУСКИ КЕРЕСТУР, 3. марец 2010. (Рутенпрес) - Прешлей нєдзелї, 28. фебруара, з рекордним присуством членства, у Руским Керестуре отримана порядна Рочна скупштина Спортского дружтва "Русин".

Попри спортистох, госци "Русиновей" Скупштини були народни посланїк др Дюра Мученски, член Општинскей ради општини Кула, задлужени за спорт Иштван Кордош, иншак и дакедишнї фодбалер и тренер Русина. На рожней скупштини бул и дакедишнї рукометни репрезентативец, бавяч и тераз тренер "Русина" Зоран Пузович, як и секретар керестурскей Месней заєднїци, а од нєдавна и предсидатель Атлетского клуба "Русин" Йоаким Надь.

Звит о прешлорочней роботи цалого Дружтва поднєсол предсидатель "Русина" Янко Хома, а звити по Клубох пречитали Яким Грубеня, Кимо Семан, Янко Хома, Драґан Ковачевич, Иван Папуґа, Саня Тиркайла, Любо Чизмар и Илона Зарубица, док з финансийним звитом Скупштину упознал Борис Шайтош.

На Скупштини окреме наглашене же того, 2010. року - керестурски Рукометни клуб означує 50, а “Русинов” Карате клуб 30-рочнїцу од свойо снованя.

На Скупштини тиж наглашени финанасийни проблеми, дзе главни финансиєре "Русина" Општински спортски союз и керестурска Месна заєднїца, а роботу клубох финансийно помагаю и родичи дзецох-спортистох.

Як гварене, и попри почежкосцох, у "Русину" присутна велька масовносц у шицких його клубох, а у прешлим року зазначени и одлични резултати спортистох "Русина" у урядових и других змаганьох.

Пред преглашеньом найлєпших спортистох цалого Дружтва, преглашени спортисти рока по Клубох - у Фодбалским Борис Сендерак, Рукометним Иван Рац, Карете-клубу Филип Рац, у Конїцким Желько Малацко, а у столнотенисерским Тони Костелник, хтори достали дипломи.

За найлєпшу спортистку рока на уровню цалого СД преглашена рукометашка и ґолґетерка Женского рукометного клубу Николина Зорич, а за найлєпшого младого спортисту у прешлим року преглашени млади атлетичар Ваньо Хома.

Погари найлєпшим спортистом рока на Скупштини уручел народни посланїк Дюра Мученски, з тим же у мено Хому, погар прияла його тренерка Саня Тиркайла.

Як поведзене на Скупштини, Ваньо Хома ше у тот час, тераз як член новосадского АК "Войводина", находзел на єдним медзинародниом змаганю у Нємецкей, и нєурядово дознаваме же и там, у скаканю до висока, освоєл стриберну медалю.

Од 28. фебруара того року, Спортске дружтва "Русин" звекшане за ище єден, дзешати свой клуб, понеже на Скупштини до членства "Русина" прияте Здруженє керестурских спортских риболовцох "Коляк".

(конєц) зам

ВЕРБАС – ПОЛИЦИЯ

Тидзень без транспортних нєщесцох

ВЕРБАС, 3. марец 2010. (Рутенпрес) – У предходним тижню на драгох у општини Вербас, после длугшого часу, нє зазначене анї єдно транспортне нєщесце.

У истим перодзе зазначени пейц виновни дїла, од хторих три зробели познати окончователє, а за окончователями двох ище ше вишлїдзує.

Явни порядок и мир нарушени седем раз. Зазначени и єден огень на приватним маєтку.

(Конєц)там