НАЦИОНАЛНИ СОВИТ - УПИСОВАНЄ ДО ОВС

Уписало ше достаточне число Руснацох

НАЦИОНАЛНИ СОВИТ, 9. марец 2010. (Рутенпрес) - Нєшка, 9. марца, закончує ше уписованє припаднїкох националним меншинох у Сербиї до окремних виберанкових спискох (ОВС), пре нєпоштредни виберанки за нови состав националних совитох. Уписованє почало од 9. новембра прешлого року.

Як сообщело Министерство за людски и меншински права, ище пияток, 5. марца, Руска национална заєднїца у Сербиї сполнєла потребну, од того Министерства одредзену квоту потребну за нєпоштредни виберанки.

Пияток, 5. марца, до ОВС були уписани 7 250 Руснаци, сообщело Министерства за людски и меншински права Републики Сербиї, котре на штварток 11. марца сообщи хтори национални заєднїци здобули право директно виберац свойо нови национални совити.

У информациї за явносц, хтору з нагоди сполньованя потребней квоти, пияток , 5. марца дал Национални совит рускей националней меншини, гварене же предвидзена квота за нашу меншину од 6 363 уписаних, пияток була виполнєта з приблїжно 114 одсто, цо представя вельки успих за цалу нашу заєднїцу.

- З тим ше Руснаци находза медзи 10 меншинами хтори по тераз сполнєли услов за нєпоштредни виберанки за нови национални совити.

Спрам, за тераз ище вше нєурядових информацийох, за национални заєднїци хтори сполнєли потребни квоти за директни виберанки, уписованє до ОВС будзе предлужене по истим принципу як и тераз, а до петнац дньох пред отримованьом виберанкох за нови национални совити.

(конєц) зам

НОВИ САД - КУЛТУРА

Представянє Руснацох на Салонє кнїжкох

НОВИ САД, 9. марец 2010. (Рутенпрес) - На Салону кнїжкох, хтори ше од 4. по 9. марец отримує у Новим Садзе, вчера, 8. марца, були представени и нови виданя руских видавательних установох и руских писательох.

Нашо виданя на Салону кнїжкох у Новим Садзе участвую на штанду Покраїнского секретарията за културу, и вчера перше представена часц видавательней дїялносци новосадскей Новинско видавательней установи "Руске слово", а потим и дзепоєдних виданьох Завода за културу Войводини, односно Дружтва за руски язик, литературу и културу.

У програми представяня НВУ "Руске слово", акцент на Салонє кнїжкох дати на творчосц Михала Ковача, односно твор о Ковачови "Євангелиста Ковач" академика Юлияна Тамаша.

О творчосци и самей спомнутей Ковачовей кнїжки бешедовали сам автор др Юлиян Тамаш, и редакторе кнїжки Микола Шанта и Микола М. Цап, док нашо рецитаторе - Андрея Колєсар з Руского Керестура и Александер Мудри зоз Кули, пречитали вецей писнї Михала Ковача.

Представянє Ковачовей творчосци на Салону кнїжкох у Новим Садзе, НВУ "Руске слово" витворело у сотруднїцтве зоз Заводом за културу войводянских Руснацох.

У пополадньових годзинох, на истим штанду представени и виданя Заводу за културу Войводини, у рамикох хторого роби Координация дружтвох за язики, як и нашо дружтво за руски язик, литературу и културу.

Медзи другима, представени и Мултиязикови билтен "Мост", число 9, як заєднїцвки проєкт Координацийного одбору дружтвох за язики, а нашо Дружтво окреме представело вибор з поезиї Меланиї Павловичовей "Плави лет-Белави лєт", "Русини у Новом Орахову-Руснаци у Новим Орахове”, “Руске обисце” Олени Папуґовей, як и зборнїки роботох “Студия Рутеника”.

Ище пияток, 5. марца, другого дня отримованя Салона, представена и збирка сказкох по сербски нашей писательки Ирини Гарди Ковачевич - "Сказке", а у виданю Городскей библиотеки Нови Сад.

(конєц) зам

ВЕРБАС – ШПИТАЛЬ

Акция "Отворени дзеври" у Очней амбуланти

ВЕРБАС, 9. марец 2010. (Рутенпрес) – Общи шпиталь зоз Вербасу з нагоди "Тижня борби процив ґлаукома" на стреду 10. марца у Очней амбуланти, будзе окончовац превентивни препатрунки пре вчасне одкриванє тей хороти.

Препатрунки ше годно окончиц од 8 до 19 годзин, пациєнтом нє треба упут, алє треба же би принєсли зоз собу здравствену кнїжочку.

У предполадньовей змени буду робиц дохторки Зорица Одалович и Мира Лаинович, а у пополадньовей др Рада Ковачевич.

На тот способ шпиталь предлужує зоз орґанизованьом акциї "Отворени дзвери", под час хторей пациєнти можу безплатно и швидко окончиц рижни превентивни препатрунки.

(конєц)там

ВЕРБАС –КОНКУРС

Конкурс за фотоґрафию о музею

ВЕРБАС, 9. марец 2010. (Рутенпрес) – З нагоди означованя 15. мая, медзинародного дня музея, у рамику манифестациї "Ноц музея" Музейна збирка Културного центра Вербас, розписала конкурс за вибор найлєпшей фотоґрафиї на тему – Музей як инспирация.

У правилох конкурса пише же ше вибрану тему понука "без огранїченьох, зоз шицкима асоцияциями и инспирациями, хтори настали после нащиви даякому музею". Фотоґрафиї би требали буц у диґиталней форми.

Авторе фотоґрафиї можу слац на ЦД-у на адресу: Музейна збирка Културного центра Вербас, Маршала Тита 88, 21460 Вербас и прейґ интернета на адресу mzvrbas@gmail.com  .

Попри роботох треба послац и мено и презвиско, адресу и число телефона. Авторе можу участвовац зоз найвецей шейсцома фотоґрафиями, а термин за посиланє роботох 1. май.

Фахови жири вибере три найлєпши фотоґрафиї , чийо авторе достаню пенєжни награди.

Шицки роботи, хтори сцигню на конкурс буду виложени на вистави з нагоди Медзинародного дня музея, под час "Ноци музея" у просторийох Музейней збирки.

На прешлорочней вистави фотоґрафийох з нагоди Ноци музея, медзи иншим, були виложени и роботи наших творительох Влади Нярадия, Ґорани Бильня, Здравка Силадїя и Александра Бесерминя.

(конєц)там

ВЕРБАС – АКЦИЇ

Почало ярнє ушоренє Вербаса

ВЕРБАС, 9. марец 2010. (Рутенпрес) – Явне комуналне подприємство "Стандард" зоз Вербасу през активносц Роботней єдинки "Комуналєц" започало зоз ушореньом улїцох у Вербаше, а за период од 31. марца по 15. април наявело вельку акцию ярнього ушореня городу.

Тих дньох орезує ше древа у улїцох Миливоя Чобанского и Вука Караджича у Старим Вербаше.

"Стандард” под час яри планує санировац шицки дзири на локалних драгох, хтори остали як пошлїдок шнїгу и солєня драгох, на шицких местох, дзе хибя, буду положени корпи за шмеце и будзе засадзене сезонске квеце у центру города на шицких за тото предвидзених местох.

Зоз "Стандарду" поволую гражданох и фирми же би дали свойо доприношенє и же би ушорели простор опрез своїх обисцох.

За початок априла заказане порушованє пилот проєкта збераня ПЕТ амбалажи, перше у даєдних часцох Вербаса.

За тоту намену буду положени окремни контейнери у круги Роботней єдинки "Комуналєц", дзе будзе и машина за пресованє ПЕТ амбалажи.

Тоту машину, дзекуюци анґажованю локалней самоуправи, "Стандард" достал од Министерства за защиту животного штредку и просторного планованя, гутори Никола Влахович, руководитель РЄ "Комуналєц".

(Конєц)там

КУЛА - КУЛТУРА

Од нєшка месни смотри рецитаторох

КУЛА, 9. марец 2010. (Рутенпрес) - Зоз змаганьом рецитаторох городу Кули, нєшка, 9. марца, у кулскей општини почали перши тогорочни змаганя з обласци култури - месни смотри рецитаторох.

На змаганю у Кули участвую и тройо рецитаторе руского КУД “Др Гавриїл Костельник”, так же буду рецитовани писнї по сербски, руски, мадярски и по українски.

Месни смотри буду у Сивцу 10. марца, у Червинки 11., а у Крущичу и Липаре, месни смотри буду отримани 12. марца. Месна смотра рецитаторох у Руским Керестуре будзе отримана 15. марца.

Селекторка шицких месних смотрох у кулскей општини професорка сербского язика у керестурскей Школи Слободанка Настасич, док єй консултанти за язики Мария Прекаяц за мадярски и Владимир Бесерминї за руски и українски язики.

Як то по традициї, Општинска смотра рецитаторох будзе отримана у Крущичу, 19. марца, а селектор смотри будзе новосадски ґлумец Миодраґ Петрович.

(конєц) зам

РУСКИ КЕРЕСТУР - ПОЛИЦИЯ

Вандализем на авзлогу "Металс банки"

РУСКИ КЕРЕСТУР, 9. марец 2010. (Рутенпрес) - Внєдзелю, 7. марца вчас рано, на авзлоґу "Металс банки" у центре Руского Керестура у будинку Дома култури, зазначени вандализем, з боку, за тераз нєпознатей особи - гварене вчера у “Металс банки”, а потвердзела то и полиция.

Внєдзелю, коло 5 годзин рано, нєпозната особа з бетонску цеглу розбила авзолоґ "Металс банки" од улїци Маршала Тита, обок коло уходу, дзе поставени и банкомат, цегла спадла на банкомат у просторийох банки, алє го нє очкодовала, и вон у функциї.

Такой после розбиваня грубого, вакумированого скла, оглашел ше аларм, так же полиция барз швидко интервеновала, на чим од роботнїкох банки достали похвали, а цали случай зазначели и сиґурносци камери, цо допоможе у одкриваню и идентификованю окончователя того вандализму.

Внєдзелю рано такой констатоване же то нє бул чин з намиру крадзи банки, понеже нукашньосц нє очкодована, виновнїк нє уходзел до банки и нїч нє украднуте, алє направена лєм векша материялна чкода и скло авзлоґу вчера заменєне.

После вишлїдзованя, полиция превжала потребни крочаї на лапаню виновнїка, а пре безпечносни камери, тота робота им у велїм олєгчана.

(конєц) зам

РУСКИ КЕРЕСТУР-ДРУЖТВО

Осми марец означени скромно

РУСКИ КЕРЕСТУР, 9. марец 2010. (Рутенпрес) – Медзинародни дзень женох, 8. марец, и на тот завод Керестурци означели скромно, без дакедишнїх орґанизованих преславох, вецей приватно, або у рамикох подприємствох.

У керестурскей Школи з тей нагоди за старших школярох орґанизована младежска театрална представа "Мирандолина" у виводзеню Аматерского театра "Стеван Сремац" зоз Червинки, а котра прешлого року преглашена за найлєпшу представу у Войводини.

Осмомарцовске швето своїм мацером вшелїяк найщирше винчую наймладши у Предшколскей установи "Бамби", зоз пригоднима програмками и власноручно виробенима дарунками. Дарунки своїм мамом у школи вирабяю и школяре нїзших класох керестурскей Школи.

З нагоди Осмого марца у керестурскей дискотеки през викенд орґанизовани окремни програми, а зоз живу музику 8. марец госци могли означиц у єдиним керестурским ресторану "Лонґов", котри вчера вечар бул виполнєти до остатнього места.

(конєц) маф

РУСКИ КЕРЕСТУР-ВИРСКИ ЖИВОТ

Отримана трибина за фамелиї

РУСКИ КЕРЕСТУР, 9. марец 2010. (Рутенпрес) – Внєдзелю, 7. марца, у Руским Керестуре отримана Трибина на тему Моралносц у фамелиї, о котрей викладанє отримал о. мр Михайло Малацко парох керестурски.

О. Малацко наглашел же ше морал звичайно дефинує як збир нормох односно. забранох, алє кед знаме же є дани од Бога котри нас люби вец морал за людзох Божи дар.

Функцию моралносци у шицких фазох супружества и фамелийного живота оцец. Малацко потолковал и прейґ прикладох, а зоз своїм искуствамо о тей теми шведочели супружнїки Даница и Йожеф Варґово зоз Ґорнього Бреґу при Сенти.

На трибини були присутни коло 80 особи, а попри домашнїх, були и госцински фамелиї: векше число зоз Коцура и зоз Суботици та даскельо зоз Беоґраду.

После преподаваня о. Малацка присутни му поставяли конкретни питаня, а велї виношели и свойо искуства, спознаня и замеркованя зоз тих деликатних, алє и фундаменталних сферох фамелийного живота.

Шицки ше зложели же о таких темох и на таки отворени способ християнски фамелиї нє маю вельо нагоди бешедовац та и дознац тото цо им потребне.

(конєц) маф

КУЛА-ДРУЖТВО

26. Жимски стретнуца учительох

КУЛА, 9. марец 2010. (Рутенпрес) – Внєдзелю, 7. марца у Кули отримани Жимски стретнуца учительох Сербиї, як источашнє и у 15 городох у Сербиї, односно у трох у Войводини.

Кулске стретнуце остримане у орґанизациї Дружтва учительох општини, а под покровительством Министерства просвити як и предсидателя општини Светозара Буквича.

Пленарна часц стретнуца отримана у Скупштини општини у котрей були два преподаваня, єдно о запровадзованю Нових стандардох за перши циклус образованя, а друге о Закону о основох системи образованя и воспитаня.

У другей часци семинара учашнїки зоз кулскей алє и околних општинох могли участвовац у даєдней од штирох роботньох, а по словох учашнїкох, окреме була интересантна роботня о МЕНСОВИХ способох ученя.

На семинаре участвовали и педаґоґиня и дзевецеро учителє и професоре класней настати зоз ОШ "Петро Кузмяк", а понеже семинар акредитовани, ношел осем боди котри учительом потребни за здобуванє и оочуванє 5-рочней лиценци за просвитних роботнїкох.

(конєц) маф

РУСКИ КЕРЕСТУР - СПОРТ

Русин страцел

РУСКИ КЕРЕСТУР, 9. марец 2010. (Рутенпрес) - У першим колє ярнєй часци першенства, а 16. колє змагательней сезони 2009/10. у Подручней фодбалскей лиґи Зомбор, фодбалере рускокерестурского Русина поражени на госцованю у Раткове.

Домашнї Раднички з Раткова, всоботу, 6. марца победзел Русин зоз 2:1, а ґол за Русин посцигнул Боян Надь.

Подросток Русина зоз своїма парняками у Раткове одбавел нєришено - 1:1, а ґол за Русин посцигнул Няради.

У шлїдуюцим колє, на нєдзелю, 14. марца, Русин бави на своїм терену, на Ярашу, з екипу Липару. Предзмаганє подросткох почина на 12, а перших фодбалских екипох на 14 годзин.

(конєц) зам

КОЦУР-ЗДРУЖЕНЄ ПЕНЗИОНЕРОХ

Здруженє инвалидских и других пензионерох Коцура отримало Рочну скупштину

КОЦУР, 09. марец 2010. (Рутенпрес) – Прешлей соботи, коцурске Здруженє инвалидских и других пензионерох отримало свою Рочну скупштину, дзе були присутни коло 100 члени и госци.

Предсидателька здруженя Андя Хромиш пречитала звит о роботи у прешлим року як и финансийни звит и потим обидва звити прилапени.

Хромишова визначела же и попри вельких нєприємносцох хторе Здруженє мало, робело ше на на витворйованю права пензионерох и и ришованю їх еґзистенциялних проблемох.

По словох Хромишовей, Здруженє прешлого року мало 363 члени хтори плацели чланарину. Обнавянє тогорочней чланарини уж почало и по тим кельо ше по тераз учланєли, реално обчековац же ше число членох Здруженя повекша на прейґ 400.

Спред општини були присутни члени општинскей ради Борис Бєлович и Райко Копривица, спред МЗ була секретар Славица Штрбац а були присутни и представителє пензионерских здруженьох зоз околних местох як и представителє ОО ПУПС Вербас.

(конєц) цики

КОЦУР-ОСМИ МАРЕЦ

Коцурски школяре порихтали прикладну програму за свойо мацери

КОЦУР, 9. марец 2010. (Рутенпрес) – Вчера, коцурски школяре нїзших класох порихтали удатну програму за свойо мацери и други мили особи кразшого полу.

Окрем прикладних писньочкох и шпиванкох, увагу публики найвецей тримали сценски слички як и ритмични точки.

Окрем школярох основней школи Братство-єдинство, у програми участвовали и дзеци зоз коцурскей оводи Герлїчка хтори наступали як секция вербаского Културного центру.

(конєц) цики

КОЦУР-ФОДБАЛ

Успих коцурскей Искри на старту

КОЦУР, 9. марец 2010. (Рутенпрес) – Внєдзелю почала ярня часц першенства у Медзиопштинскей фодбалскей лиґи Вербас-Бечей-Србобран у хторей ше змага и коцурска Искра, котра госцовала у Радичевичу дзе бавели процив домашнєй Младосци.

После одличного бависка, Искра победзела зоз 1:0 а єдини ґол на змаганю дал Чурґуз у 23. минути. Бавяче Искри препущели даскельо красни нагоди звекшац резултат алє, при концу змаганя, Коцурци мали и щесца бо домашнї нє вихасновали два свойо нагоди.

Руководзаци Искри задовольни зоз резултатом и указаним бависком. У вияви за Рутенпрес, предсидатель Искри Михал Варґа визначел же добре бависко и добри резултат права поволанка коцурским любительом фодбалу же би идуцей нєдзелї пришли на општински дерби, Искра-Будучносц зоз Савиного Села.

(конєц) цики

КОЦУР-ШАХ

ШК Омладинєц зоз Коцура отримал Рочну скупштину

КОЦУР, 09. марец 2010. (Рутенпрес) – Коцурски ШК Омладинєц, внєдзелю отримал свою Рочну скупштину хтора источашнє була и виборна.

За предсидателя знова вибрани Янко Бесерминї, його заменїк будзе Милован Паунович а роботу секретара будзе окончовац Мирко Кошевич.

Як цо познате, коцурски шахисти прешлого року витворели историйни успих и пласовали ше до Войводянскей лиґи. Нове першенство почнє 16. мая а у априлу ше буду бавиц куп змаганя.

До новей сезони ШК Омладинєц войдзе без двох стандардних бавячох, Масала и Коларича хтори напущели клуб а до клуба ше враца МК Ґоран Попович.

После роботней часци схацки, одбавени швидкоцагаюци турнир на хторим перше место освоєл Златич зоз 10,5 поени, шлїдза Конц, Павичевич и Попович зоз 9 поенами, Петрович и Тадич освоєли 8,5 поени, Коларич и Масал 8 поени, Фейса 7, Дьорович 5,5 поени, Бесерминї и Ковач освоєли по 3 поени, Паунович 1 и Кошевич 0,5 поени.

(конєц) цики