БАЧКА ТОПОЛЯ – ПРОЄКТИ

Камп толеранциї отворел Ивица Дачич

БАЧКА ТОПОЛЯ, 27. юлий 2010. (Рутенпрес) – Штварти Камп толеранциї за младих подунайских реґийох и городох отворел у Бачкей Тополї министер нукашнїх дїлох Ивица Дачич.

Вон з тей нагоди гварел же би за полицию було вельо менєй роботи кед би у дружтву у Сербиї було вецей толеранциї и наглашел же ми мило же ше у Войводини и Сербиї отримує таки сход младих, бо толеранция цошка цо нам шицким хиби, а вона нєобходна же би дружтво функционовало.

Министер за людски и меншински права Светозар Чиплич гварел же важне же би млади учели о толеранциї и же шицки розлики хтори постоя, а на зоз хторима ше пишиме, нє розлики хтори роздвоюю, алє су нашо богатство.

Предсидатель Скупштини Войводини Шандор Еґереши гварел же Войводина европска реґия и же Сербиї потребни нови политични идентитет хторио иницирує диялоґ зоз европским културним и политичним нашлїдством.

Тогорочни Камп ше отримує под ґеслом "Влап ритем Дунаю", а на святочним отвераню були и координатор Совиту дунайских реґийох Петер Ланґер и предсидатель општини Бачка Тополя Атила Баби.

Святочносци присуствовали и представнїки покраїнскей и републичней власци, подунайских реґионох и городох, амбасадох и европских институцийох.

У цеку шейсцдньовей програми буду отримани едукациї, креативни роботнї, и забавни змисти, а у Кампу участвую 200 младих зоз Нємецкей, Австриї, Словацкей, Мадярскей, Румуниї, Болгарскей, України, Горватскей и Сербиї.

(конєц) ад

КУЛА – ПОЛЬОПРИВРЕДА

Годно обисц державну жем пре закупйованє

КУЛА, 27. юлий 2010. (Рутенпрес) – Од вчера по идуци штварток оможлївене обиходзенє 325,48 гектари польопривредней жеми у власнїцтве держави на териториї општини Кула, котра у авґусту будзе дата под закуп.

Обиходзенє жеми вчера було оможлївене у катастарскей општини Сивец, нєшка будзе у Червинки, 28. юлия у Руским Керестуре и Кули, а 29. юлия у катастарскей општини Крущич.

Обиходзенє жеми будзе од 10 годзин, а явна лицитация заказана за 6. авґуст у будинку општини Кула.

Термин за зазберованє писмених понуканьох и подношенє приявох тих котри заинтересовани за закупйованє державней жеми зоз документацию и уплацованьом депозита 3. авґуст.

Оглашка за закупйованє державней жеми обявена у "Службеним листу" општини Кула, у новинох "Кулска комуна", на огласней табли општинскей управи у Кули, як и месних канцеларийох.

(конєц) маф

ВЕРБАС – ПОЛЬОПРИВРЕДА

Вербаска ПФС окончує безплатни анализи жеми

ВЕРБАС, 27. юлий 2010. (Рутенпрес) – Польопривредна фахова служба у Вербаше участвує у акциї Покраїнского секретарията за польопривреду "За богатшу Войводину – зоз мало дзеки, плодне польо” и за потреби польопривреднїкох окончує безплатни анализи польопривредней жеми.

Попри анализи плодносци, польопривреднїки достаню и совит хтори файти и яке количество минералного гною им потребне же би на своїм полю мали векши урожай, як и же би почитовали защиту аґросистеми.

Жем за анализу мож вжац зоз парцелох од 1,5 по 5 гектари и зоз глїбини до 30 центиметери за землєдїлски и заградкарски култури и од 30 по 60 центиметери за винїцарски и овоцарски култури.

Контрола плодносци жеми облапя ПХ вредносц, присуство калциюм-карбоната, гумусу, вкупного азоту, фосфору и калиюму, а за бранє жеми за анализу мож хасновац одвитуюци сонди.

(конєц) там

НОВИ САД – ИНФРАСТРУКТУРА

Почало партерне ушорйованє централней площи

НОВИ САД, 27. юлий 2010. (Рутенпрес) – Роботи на реконструкциї транспортних поверхносцох на централней новосадскей площи почали вчера зоз заменьованьом партерних плочох.

На Площи шлєбоди буду реконструовани и дражки, як и драга и дражки у Нєґошовей улїци и у улїци Краля Александра., док на концу буду пошорени и улїци Модене и Илиї Оґняновича.

На тих роботох анґажовани роботнїки ЯКП "Драга" и ЯКП "Лисє", а коло памятнїка Светозарови Милетичови и у улїци Модене буду поставени ґранитни и бетонски плочи.

Роботи буду закончени по конєц авґуста, а городска власц за тоту намену видвоєла 70 милиони динари.

(конєц) ад

РУСКИ КЕРЕСТУР – ВИРСКИ ЖИВОТ

Паломнїцтво до Текийох

РУСКИ КЕРЕСТУР, 27. юлий 2010. (Рутенпрес) – Парохиянє зоз Руского Керестура ше рихтаю на паломнїцтво до познатого Марийового святилища у Текийох при Петроварадину.

Заинтересовани можу ше приявиц на парохию, а одход будзе коштац коло 700 динари.

И того року там на швето Шнїговей Мариї котре ше означує 4. и 5. авґуста, медзи другима, будзе служена и Служба Божа у нашим грекокатолїцким обряду.

Наша Служба Божа будзе 4. авґуста на 16 годзин, а 5. авґуста на 7:30 годзин.

(конєц) маф

КОЦУР – КУЛТУРА

Зоз схадзки Управного одбору КПД ДОК

КОЦУР, 27. юлий 2010. (Рутенпрес) – Внєдзелю на преширеней схадзки Управни одбор КПД ДОК зоз Коцура розправял о вецей точкох, як и о наступних актовносцох.

Догварене же ше промоциї вецей публикацийох, а медзи нїма и Сербско-руского словнїка отримаю у реновираних просторийох месней читальнї “Данило Киш”.

На схадзки УО КПД ДОК одлучене же би шлїдуюца поставка вистави старих фотоґрафийох "Хвильки прешлосци и час терашньосци" Мариї Молнар була отримана у Сримскей Митровици.

Управни одбор тиж информовани же рукописи даскелїх нових публикацийох котри иницировало Дружтво буду готови по новембер кед ше обчекує розписованє рочного конкурса Покраїнского секретарияту за културу.

(конєц) маф

КУЛА – ЗДРАВСТВО

Спатранє стану у Дому здравя

КУЛА, 27. юлий 2010. (Рутенпрес) – До нащиви Дому здравя у Кули нєшка приходзи заменїк покраїнского секретара за здравство проф. др Здравко Косєрина.

По словох директорки Дома здравя др Стани Струґар, др Косєрина приходзи до нащиви же би спатрел стан у кулским Доме здравя.

(конєц) маф

ВЕРБАС – ЕКОЛОҐИЯ

Едукацию о защити злїву Дуная закончели и Вербащанє

ВЕРБАС, 27. юлий 2010. (Рутенпрес) – По тераз 519 фармере, польопривредни инжинєре и фаховци совитодавних службох успишно закончели обуку за правилне руководзене и одкладанє орґанского одпаду и информованє о процесох евро-итеґрацийох, гварене у сообщеню тима Проєкту за зменшанє заґадзеня рики Дунай.

Медзи тима цо закончели едукацию и польопривреднїки зоз општини Вербас, дознава Рутенпрес.

Обука запровадзена прейґ тренинґ центра, хтори формовани у рамику ДРЕПР проєкта у сотруднїцтве зоз Институтом за статкарство зоз Нового Саду, а проєкт ше реализує на подручу општинох Шабац, Пожаревац, Вербас и Нови Сад.

Министерство польопривреди, лєсарства и водопривреди тот проєкт реализує од 2006. року, пре уводзенє добрей пракси до польопривреди, промоцию очуваня животного штредку, як и зменшанє заґадзеня водоцека Дунаю и його прицекох.

Найвекше количество заґадзеня походзи од гнойовки, хтори зоз фармох и клальньох директно випущени до Дунаю виволує одумеранє флори и фауни.

До ДРЕПР програми уключени 53 фарми, штири клальнї и седем польопривредни школи зоз Сербиї.

Вкупна вредносц инвестицийох виноши коло 18 милиони долари и тот пенєж будзе похасновани за вибудов базенох за одкладанє и правилне хаснованє орґанского одпаду, а проєкт финансує Шветова банка.

(конєц) там

НОВИ САД – ПОЛИЦИЯ

Нова полицийна станїца по конєц рока

НОВИ САД, 27. юлий 2010. (Рутенпрес) – Нова полицийна станїца у Новим Садзе будзе отворена по конєц рока на Новим населєню.

Як порадзене у Городскей скупштини станїца будзе на Сателитским пияцу на месце дзе тераз апатика, хтора будзе премесцена на другу локацию.

Реновиранє простору будзе финансовац Город Нови Сад, а Полицийна управа обезпечи опрему.

Предсидатель Скупштини городу Александар Йованович гварел же би требало и звекшац число полицайох у городу, а станїца окрем Нового населєня будзе мац инґеренциї и на Телепу, Адицох и Сателиту, цо по тераз окончовала полицийна станїца на Детелинари.

(конєц) ад

НОВИ САД – ПОЛИЦИЯ

Загарештовани дохторе пре намесцанє пензийох

НОВИ САД, 27. юлий 2010. (Рутенпрес) – Припаднїки криминалистичней полициї на подручу Нового Саду, Зомбора, Кули, Оджаку, Червинки и Беоґраду загарештовали ґрупу од 11 членох на чолє зоз двома дохторами хтори за надополнєнє од 3 500 до 5 000 евра оможлївйовали витворенє инвалидских пензийох.

На чолє тей криминалней ґрупи були дохтор Раде Перич (61) зоз Нового Саду и Радош Миланович (52) зоз Зомбору.

По словох директора полициї Милорада Вельовича, Перич бул член комисиї у Покраїнским фонду за Пензийне и инвалидске осиґуранє, а Миланович дохтор специялиста неуропсихиятриї.

Вони од 2007. по 2010. рок на териториї Войводини прейґ одредзених дохторох и поштреднїкох оможлївйовали нєосноване витворйованє инвалидских пензийох.

(конєц) ад

ЗОМБОР – ТРАНСПОРТ

Було 15 транспортни нєщесца

ЗОМБОР, 27. юлий 2010. (Рутенпрес) – Прешлого тижня на подручу Полицийней управи Зомбор случели ше 15 транспортни нєщесца у котрих три особи чежко и два лєгчейше покалїчени.

Пре воженє под дїйством алкоголу затримани штири особи, а материялна чкода ше преценює на коло 550 тисячи динари.

На териториї општини Зомбор случели ше 7 транспортни нєщесца у котрих два особи чежше, и єдна лєгчейше покалїчени, док ше у општини Апатин случело єдно транспортне нєщесце, а два особи затримани у полициї.

На подручу општини Оджак случели ше штири транспортни нєщесца, а у општини Кула було три транспортни нєщесца у котрих єдна особа чежше покалїчена, а єдна затримана пре воженє под дїйством алкоголу.

Медзи причинами котри спричинєли транспортни нєщесца начишлєни нєприлагодзена швидкосц, нєуступанє права першенства преходу и друге.

(конєц) маф