РУСКИ КЕРЕСТУР/КУЛА - УПИСОВАНЄ ДО ОВС

Квота найвироятнєйше сполнєта

РУСКИ КЕРЕСТУР/КУЛА, 2. марец 2010. (Рутенпрес) - Спрам вчерайшей евиденциї з нашого Националного совиту, мож повесц же и Руснаци найвироятнєйше виполнєли потребну квоту од 6 363 уписаних до Окремного виберанкового списку (ОВС).

Як гварели у Совиту - по пияток, 26. фебруар, на обробок до општинских управох були придати коло 6 700 вимоги-формулари Руснацох за упис до Окремного виберанкового списку.

Концом прешлого тижня, у остатнєй инстанци - у Минстерстве за людски и меншински права, а на основи євиденциї з општинох, до ОВС були уписани скоро 5 000 Руснаци.

Як ше могло и очековац, найвецей уписаних Руснацох будзе у општини Кула, дзе по конєц прешлого тижня уж були обробени 2 500 формулари за нашу заєднїцу.

На обробок чекал ище 281 формулар, так же концом прешлого тижня, до кулскей Општинскей управи Руснаци придали 2 781 формулар-вимогу за уписованє до ОВС.

На тот способ, Керестурци нє лєм же сполнєли з Националного совиту предвидзену квоту од 1 600 потребних уписаних, алє з оглядом же виполнєли прейґ 2 660 формулари, аж ю и преруцели за прейґ тисяч вимоги за упис.

Як спозорюю з Националного совиту, тоти цифри нїяк нє знача же уписованє до Окремного виберанкового списку престава, понеже акция тирва ище тидзень - по шлїдуюци вовторок - 9. марец.

Прето, зоз Совиту поволую ище вшє нє уписаних, же би ше уписали и вихасновали тото свойо гражданске право.

Як концом тижня поведзене у Општинскей управи, Руснацом хтори ше у кулскей општини уписали до ОВС, того тижня поряднєйше почню сциговац и Ришеня о упису до того списку.

(конєц) зам

НОВИ САД-ДРУЖТВО

Отворени дзвери у Скупштини АП Войводини

НОВИ САД, 2. марец 2010. (Рутенпрес) - Всоботу, 27. фебруара у Скупштини АП Войводини отримана треца по шоре манифестация Отворени дзевери на котрей участвовали школяре войводянских штреднїх школох, студенти, представителє нєвладових орґанизацийох, а на тот завод и школяре школи за полицайох зоз Сримскей Каменїци.

На Отворених дзверох участвовали и представителе Штреднєй школи "Петро Кузмяк" зоз Руского Керестура, школяре Сабина Ром и Адриян Варґа школяре туристичного напряму и психолоґиня Школи Весна Рилке.

Госцох у Скупштини Войводини привитал єй предсидатель Шандор Еґереши, а потим шлїдзели викладаня и дискусия на тему Безпечносц и млади.

Як викладаче на тоту тему наступели ґенерал Младен Курибак, начальнїк у управи полициї у Министерству нукашнїх дїлох, а як висланїк министра Дачича.

О безпечносци младих бешедовал и др Золтан Єґеш, секретар у Покраїнским Секретарияту за образованє, Таня Банянин Пеїч, помочнїца за младеж у Покраїнским Секретарияту за спорт и младеж та Зденка Ивкович, педаґоґиня, и директорка школи "Милош Црнянски" зоз Нового Саду.

У дискусиї доминовали предкладаня же ше процив насилства нє досц бориц лєм зоз санкциями алє и зоз тим же младим треба понукац цо вецей активносци котри их буду хасновито анґажовац.

Наглашене и же би медиї тото потримали зоз визначованьом позитивних прикладох толеранциї и добрих одношеньох, а нє лєм сензационализовали насилство. Потримани и цо вецей роботнї медзи младима зоз темами толеранциї, упознаваня и порозуменя.

Учашнїки Отворених дзверох мали нагоди поопатрац просториї Скупштини и буц упознати зоз роботу тей институциї.

(конєц) маф

ВЕРБАС –ДОКУМЕНТИ

Нєшка мож достац нови виводи

ВЕРБАС, 2. марец 2010. (Рутенпрес) - У матичней служби општини Вербас нєшка би мало буц закончене програмске усоглашованє и почнє ше видавац виводи зоз матичних кнїжкох народзених, винчаних и умартих зоз нєогранїченим термином важеня.

Як дознаваме од начальнїка Општинскей управи Миодраґа Шошкича, нови формулари пияток принєшени зоз Беоґраду.

Остало же би ше на компютерох у матичней служби - у општинскей управи у Вербаше и шицких валалских месних заєднїцох, инсталовало програми за нови формулари за тирваци документи.

Шицки гражданє општини Вербас, хторим нєшка нєоходни тоти документи, можу их достац на потерашнїх формуларох.

Видаванє тирвацих матичних документох почало вчера у цалей Сербиї.

На тот способ престава шейсцмешачни термин важеня виводох зоз матичних кнїжкох, а нови формулари, зоз окремну защиту будзе ше виберац лєм у случаю пременки мена, презвиска, пола або малженского статуса.

Формулари за нови виводи маю осем видлїви пасма защити и нє можу ше найсц у шлєбодним предаваню, бо их можу наручиц лєм єдинки локалней самоуправи.

Вивод зоз матичней кнїжки народзених будзе ше друковац у червеней фарби, документ о винчанин статусу у белавей, а вивод зоз матичней кнїжки умартих у догановей фарби.

Нове же на другим боку вивода, у општинох у хторих у службеним хаснованю язики националних меншинох, як цо случай и у општини Вербас, можу друковац назви рубрикох вивода зоз матичних кнїжкох и на язикох и писмох националних меншинох

КУЛА/РУСКИ КЕРЕСТУР - ДЕРЖАВНА УПРАВА

Ище нє було нови формулари за документи

КУЛА/РУСКИ КЕРЕСТУР, 2. марец 2010. (Рутенпрес) - Гоч у медийох наявене же од вчера, 1. марца, у општинских управох и месних канцеларийох почню хасновац и применьовац нови формулари за кресцени писма и други урядово документи хтори буду тирваци - у кулскей општини вчера ище нє видавали документи на нових формуларох.

Як Рутенпрес дознава у керестурскей Месней канцелариї, же би ше почало хасновац нови формулари, потребне перше пременїц и инсталовац за тото нову програму у компютерох.

Як поведзене, вчера у кулскей Општинскей управи робели на инсталованю тей програми, хтора би вец мала буц прешлїдзена и до месних канцеларийох по местох општини.

До керестурскей Месней канцелариї вчера ище нє сцигли нови формулари, и наявене же накадзи будзе инсталована и прешлїдзена нова програма, почнє и видаванє документох на нових формуларох хтори буду важаци тирвацо, а нє лєм шейсц мешаци.

(конєц) зам

КУЛА - ШКОЛЯРСКИ СТАНДАРД

Конкурс за трошки путованя за студентох

КУЛА, 2. марец 2010. (Рутенпрес) - Ище того тижня, до пондзелку, 8. марца, у кулскей општини тирва Конкурс за реґресованє часци трошкох путованя студентох на студиї, а з местом биваня на териториї општини Кула.

Конкурс прешлого пшондзелку розписало Оддзелєнє за дружтвени дїялносци општини Кула, а право на реґересованє часци трошкох путованя маю студенти з кулскей општини хтори биваю у местох општини, каждодньово путую з места биваня до места дзе студираю, школую ше на терху буджету, рок студийох уписали по першираз, нє змесцени су у студентских домох и нє доставаю даєдну од можлївих студентских стипендийох, лєбо кредитох.

За прияву за реґресованє трошкох, студенти муша придац фотокопию индекса (бок зоз фотоґрафию и уписаним семестром), з обовязним указованьом индекса на видзенє.

Надалєй, од документациї за тот Конкурс потребне уверенє з факултету о уписаним року студийох, фотокопию особней карточки, фотокопию чечуцого рахунку, потвердзенє студентского центру же нє хасную його змесценє и потвердзенє з подприємствох родичох же нє хасную студентски стипендиї и кредити.

Прияви на Конкурс треба доручиц до Услужного центру општини Кула, на шалтер число 4, а висина виносу часци трошкох путованя будзе одредзена после утвердзованя числа їх хасновательох.

(конєц) зам

ВЕРБАС –ЕКОЛОҐИ

Еколоґийни рух Вербаса на Сайме туризма у Беоґрадзе

ВЕРБАС, 2. марец 2010. (Рутенпрес) – Зоз потримовку локалней самоуправи, Еколоґойни рух Вербаса (ЕРВ) предходного викенду першираз ше зявел на Сайме туризма у Беоґрадзе.

Вербаски Еколоґийни рух ше нащивительом представел зоз "Урбанистичну и архитектонску студию туристично-рекреативного центра на вербаским Шлайзу", т.є. на горнєй, чистей часци Велького бачкого каналу.

Авторка студиї дипл. инґ. арх. Миня Чулибрк, иншак членїци Совита ЕРВ за урбанизем и просторне планованє.

"Саме зявенє на Сайме оможлївели нам нашо партнере зоз здруженя “Дунайски пропелер” зоз Беоґраду, на чолє зоз паном Крстом Пашковичом, хтори нам безплатно дали простор на своїм штанду”, виявел за Рутенпрес предсидатель ЕРВ Ратко Дюрдєвац.

(конєц)там

ВЕРБАС – ПИЯЦ

Купованє местох на пияцох после 31. марца будзе драгше

ВЕРБАС, 2. марец 2010. (Рутенпрес) – Предаванє пиячних тезґох, малих и вельких коцкох и розхладзуюцих витринох на пияцох у Вербаше тирва по 31. марец, виявел за Рутенпрес Светозар Степанов, управнїк пияцу у Вербаше.

Вон гвари же кед контракти буду склопени после того термину, вец цени резервациї буду векши за 30 одсто, алє и же у каждим случаю закуп пиячних местох мож плациц на вецей мешачни рати.

"Управни одбор принєсол одлуку же би цени пиячних местох остали на прешлорочним уровню, а цени за реґистровани польопривредни ґаздовства меньши за 5 одсто у одношеню на прешли рок”, гварел Степанов.

Цена єдней тезґи за польопривредне ґаздовство на єдним пияцу 14.700 динари, а єдна велька коцка 8 050. Кед продукователь вежнє тезґи на обидвох пияцох у Вербаше, вец тезґа кошта 10.500, а велька коцка 5.750 динари.

Резервацию и закуп пиячних местох мож окончиц у просторийох Пиячней управи, под час тирваня пияцу, стреду и соботу, од 7 до 13 годзин.

(конєц)там

ВЕРБАС – КАРПАТИ

У Карпатох будзе премиєра представи "Хобит"

ВЕРБАС, 2. марец 2010. (Рутенпрес) - На пияток 5. марца на 19,30 годзин, у сали КПД “Карпати” у Вербаше, Студио дзецинскей драми “Карпатох” премиєрно виведзе представу на сербским язику, “Хобит”.

Представу по роману Джона Р. Р. Толкина и драматизациї Биляни Стаїч, режирала Нади Лендєр.

У представи ґлумя искусни млади ґлумци, хтори по тераз у "Карпатох" ґлумели по руски и по сербски и хтори за собу маю три и вецей дзецински представи.

"З оглядом же єдна часц з глумцох ма петнац роки, тота представа мала би буц увод до младежского театра у "Карпатох", гутори режисерка Нада Лендєр.

(конєц)там