НОВИ САД - НАЦИОНАЛНИ СОВИТ

Схадзка Роботней ґрупи

НОВИ САД, 20. юлий 2010. (Рутенпрес) - Роботна ґрупа, формована на Першей порядней схадзки Националного совиту Руснацох после Конститутивней, 10. юлия, вчера пополадню отримала схадзку у просторийох Заводу за кулуру войводянских Руснацох у Новим Садзе.

Роботну ґрупу Национални совит оформел пре пририхтованє предкладаньох за ускладзованє Статута НС з новим Законом о националних совитох националних меншинох, як и Дїловнїка о роботи Националного совиту. Ґу тому, тото цело пирихта и предлоги будуцих одборох Совиту.

До Роботней ґрупи були меновани Славко Рац, як предсидатель Националного совиту, та члени Совиту Мирон Сабадош, Вера Дупало и Йовґен Мудри, як и правнїки - Боґдан Виславски, Зоран Бережни и Мария Пап, и вчерайшей схадзки присуствовали шицки спомнути члени Совиту и правнїки Зоран Бережни и Боґдан Виславски.

Роботна ґрупа вчера принєсла Роботни верзиї Статута и Дїловнїка о роботи НС, та перше после усоглашованя конєчней верзиї на Роботней ґрупи, вони буду предложени на прилапйованє Националному совиту.

Тиж так, Роботна ґрупа Националному совиту предложи формованє шейсц фахових одборох НС, формованє Предсидательства НС, як совитодавного цела, та других органох и функцийох, як цо то Вивершни одор и подпредсидателє Националного совиту.

Як порадзене на Першей, Друга порядна схадзка Националного совиту Руснацох будзе отримана 31. юлия.

(конєц) зам

КУЛА - МЕДЗИНАРОДНЕ СОТРУДНЇЦТВО

Нащива амбасадора України

КУЛА, 20. юлий 2010. (Рутенпрес) - Предсидатель општини Кула Светозар Буквич у општини Кула за делеґацию Амбасади України у Беоґрадзе, на чолє з амбасадором Виктором Недопасом, пияток, 17. юлия, пририхтал пригодни приєм з нагоди означованя 20-рочнїци Декларациї о державним суверенитету України.

Попри госцом, Буквич тот ювилей повинчовал и припаднїком українскей националней меншини котри жию у кулскей општини, наглашуюци же у општини Кула жию припаднїки 23 националних меншинох, а найчисленши медзи нїма Руснаци, Мадяре и Українци.

Як гварел Буквич, после нєдавних виберанкох и констутуованьох нових националних совитох, општина ше може похвалїц же ма аж двох предсидательох националних совитох - Славка Раца, предсидателя НС Руснацох, и Йозу Сапуна, предсидателя НС Українцох, а Сапун тиж присуствовал приєму у општини Кула.

- Локална самоуправа до тераз витворйовала барз добре и коректне сотруднїцтво з припаднїками шицких националних меншинох и намагала ше помогнуц им цо вецей у витворйованю своїх правох. Же би з пестованьом свойого язика и култури очували свой национални идентитет, и намагаме ше витворйовац високи стандарди на тим планє - гварел Буквич на стретнуцу з амбасадором України Виктором Недопасом.

З оглядом же у кулскей општини, кед слово о меншинох, жиє найвекше число Руснацох и Українцох, амбасадор Недопас гварел же општина Кула у тим поглядзе представя духовни центер рускей и українскей заєднїци.

Амбасадор виражел подзекованє локалней самоуправи на велькей потримовки припаднїком українскей, алє и другим националним меншином, а винєсол и податок же у України жию коло 1 800 Серби и сотруднїцтво України и Сербиї барз значне и нєпреривно ше баржей розвива.

После тих розгваркох, у сали СО Кула отримана и пригодна културно-уметнїцка програма, а амбасадор України у Сербиї Виктор Недопас зоз сотруднїками и предсидатель општини Светозар Буквич, пияток у Кули бешедовали и з предсидательом нового Националного совиту українскей националней меншини у Сербиї Йозом Сапуном, членми Националного совиту Українцох и представителями українских КУД.

(конєц) мип/зам

РУСКИ КЕРЕСТУР - МЛАДИ-ВОЛОНТЕРСКИ КАМП

Нєшка починаю роботи

РУСКИ КЕРЕСТУР, 20. юлий 2010. (Рутенпрес) - Наступни 10 днї, по 29. юлий, Руски Керестур будзе домашнї младим з иножемства и нашей жеми на Штвартим медзинародним волонтерским кампу.

До конца вчерайшого дня, волонтере зоз Шпаниї, Французкей, Нємецкей, Мадярскей, Ческей, Македониї, з Польскей, алє и з местох у Сербиї - зоз Старих Лединцох, Кикинди, Нового Саду, Крушевцу, Яґодини, з Кули поприходзели до Керестура и змесцени су у интернату ОШиҐ "Петро Кузмяк".

Попри з иножемства и нашей жеми, на тогорочним кампу у Руским Керестуре буду робиц и домашнї, так же, по численосци, Штварти медзинародни волонтерски камп будзе до тераз наймасовнєйши.

Волонтерски камп орґанизує Младежска орґанизация Керестура "Пакт Рутенорум", у сотруднїцтве з Волонтерским центром Войводини, а роботи почали нєшка, на базену, дзе буду ушорйовац место за наступни Музични фестивал "Водова фест".

Главна робота тогорочного Волонтерского кампу будзе ушорйованє обсяжней библиотеки на рускокерестурскей парохиї.

Лидерки Штвартого волонтерского кампу Сенка Надь и Светлана Няради з Руского Керестура, а як и до тераз, за волонтерох буду орґанизовани и провадзаци змисти, вязани за упознаванє з Руснацами и Руским Керестуром.

Волонтере од Керестурцох уж достали помоц у пожички бициґлох, пре каждодньови одход на роботу, обезпечена и помоц од спонзорох, насампредз од Школи "Петро Кузмяк" за змесценє, та од керестурских подприємствох за костиранє.

Младежска орґанизация "Пакт Рутенорум" з проєктом Волонтерского кампу конкуровала на вецей адреси - до ресорних покраїнских секретариятох и министерствох, но, як дознава Рутенпрес, за тераз нє достали одвити з тих конкурсох.

(конєц) зам

НОВИ САД - ЗАВОД ЗА КУЛТУРУ

На штварток схадзка УО

НОВИ САД, 20. юлий 2010. (Рутенпрес) - У Новим Садзе на штварток, 22. юлия, будзе отримана Дванаста схадзка Управного одбору (УО) Заводу за културу войводянских Руснацох.

Попри информациї о активносци Заводу медзи двома схадзками УО, найзначнєйша точка будзе проєктни предкладаня за дїялносц Заводу на основи средстствох за перши и други квартал того року.

(конєц) зам

НОВИ САД - ПРИВРЕДА-МЕДИЇ

"Дневник голдинґ” препущел нагоду

НОВИ САД, 20. юлий 2010. (Рутенпрес) - Нємецки медийни концерн "ВАЦ" видал сообщенє же "Дневник голдинґ" препущел нагоду превжац 55 одсто акцийох у заєднїцким подприємстве “Дневник Войводина Прес".

"ВАЦ” предлужел термин за догварку до 15. юлия, алє “Дневник голдинґ” нє прилапел понукнуце, гоч мал предносц при купованю.

Як гварел член управи "ВАЦ" Петер Ланґе, тото подприємство предлужи розгварки з другима компаниям, хтори заинтересовани за преберанє акцийох тей компаниї у "Дневник Войводина Пресу".

Предсидатель Управного одбору "Дневник голдинґу" Златимир Момиров, гварел же тота медийна установа нє одустанє од права предносци при купованю, алє тиж визначел же "ВАЦ" длужни вецей як 6 милиони еври, понеже нє сполнєл условия з контракту.

(конєц) ад

ВЕРБАС - ОБРАЗОВАНЄ-МЛАДИ

До Европи и двойо студенти з општини Вербас

ВЕРБАС, 20. юлий 2010. (Рутенпрес) - У рамикох проєкту "Путуєме до Европи", хтори орґанизую Европски рух у Сербиї и амбасади Австриї и Нємецкей у Беоґрадзе, вибрани 100 найлєпши студенти, хторим обезпечени безплатни превоз на гайзибанє по по жемох Европскей униї.

За путованє по жемох ЕУ, хторе будзе тирвац 22 днї, орґанизаторе обезпечели и медзинародне драгове осиґуранє и стипендию од по 200 еври.

Медзи 100 найлєпшима студентами зоз Сербиї и двойо студенти з општини Вербас - студент ФТН, одсек за мехатронику Страхиня Дедеич з Бачкого Доброго Поля и студенткиня журналистики на Филозифским факултету у Новим Садзе, Драґана Божович зоз Савиного Села.

Условия конкурсу були висока штредня оцена под час студийох, знанє странских язикох, нїзки мешачни приходи по члену фамелиї и же студент скорей нє путовал вонка з нашей жеми.

Зоз заключеньом предсидателя општини др Желька Видовича, општина Вербас успих своїх младих согражданох потримала з по 15 000 динари, а з тим и їх участвованє у проєкту "Путуєме до Европи".

(конєц) там

НОВИ САД - ИНФРАСТРУКТУРА

Булевар Европи будзе готови за два мешаци

НОВИ САД, 20. юлий 2010. (Рутенпрес) - Преширенє Булевару Европи, од улїци Братох Ґрулович по Футожску почало, а роботи, хтори окончує ЯКП “Пут”, буду закончени за два и пол мешаци.

Вредносц роботох 126 милиони динари, а преширенє Булевару Европи ше окончує прето же є, при першобутним будованю 2006. року, нє збудовани у полней ширини, бо власнїки парцелох з правого боку нє посцигли догварку зоз Заводом за вибудов городу, цо того року ришене.

Тота часц будзе широка 10, длугока 743 метери, а паркинґи и дражки за бициґлистох и пешакох буду будовани вєдно з дїловнима обєктами и будинками.

Як гварел директор Заводу за вибудов городу Борислав Новакович, вибудов Булевару унапредзи транспорт и привреду у Новим Садзе и отвори нови роботни места.

Часц роботох на трецей етапи, од улїци од Корнелия Станковича по Руменацку драгу, з чим Булевар Европи будзе злучовац авто-драгу и Рибарске острово, почню о два тижнї.

Остало вибудовац ище 5 километери драги, надвожняк прейґ новей ранжирней станїци и мост прейґ канала ДТД.

(конєц) ад