КУЛА - КУЛТУРА

Робота орґанизацийох у култури

КУЛА, 8. марец 2010. (Рутенпрес) - И попри чежкей материялней ситуациї, орґанизациї з обласци култури у кулскей општини сполнєли свойо плановани програми роботи, поспишело ше отримац дїялносц, аж и зазначиц замерковани успихи на змаганьох - костатоване на порядней Рочней скупштини Културно-просвитней заєднїци (КПЗ) општини Кула.

Скупштина КПЗ отримана пияток, 5. марца, у просторийох кулского Културного центру, а попри делаґатох и представительох установохо у култури и КУД з кулскей општини, роботи Скупштини присуствовали и представителє Општинскей управи задлужени за буджет и дружтвени дїялносци, як и предсидатель општини Кула Светозар Буквич.

У витворейованю културней политики, КПЗ и орґанизациї у култури пестовали и розвивали шицки форми културного и уметнїцкого виражованя, уважовали мултикултуралносц, закладанє за компетентну роботу и високи естетични и уметнїцки досяги. У секцийох шицких орґаниазцийох у култури у местох општини анґажовани скоро 2 250 аматере.

Прешлого року витворенє буджету за културу у кулскей општини сполнєте з прейґ 75 одсто, а у тим року, плановани вецей як 62 милиони динари.Як наглашел предсидатель општини Светозар Буквич - ридко даєдна општина у Сербиї ше так стара о култури и видвоює тельо средства за орґанизациї у тей обласци, дзе тераз заняти 47 роботнїки.

Пре материялну ситуацию, у тим року нє плановани векши инвестицийни роботи, крем предлуженя уж розпочатих. Як наглашел Буквич, општина и надалєй будзе потримовац традицийни фестивали од висшого значеня, як цо то Републични фестивал драмских аматерох у Кули, покраїнски театрални фестивал у Крущичу, Фестивал рускей култури “Червена ружа” у Керестуре, и други.

Векшина орґанизацийох у култури прешлого року стоодстотно сполнєли свойо програми, дзе рускокерестурски Дом култури, у одношеню на план, програму сполнєл зоз 98 одсто, а кулске руске КУД "Гавриїл Костельник" зоз 100 одсто.

За витворенє квалитету програми, односно резлтатох посцигнутих на висших смотрох и змаганьох, Дом култури достал 88 боди за квалитет, по чим є штварти у општини, а КУД "Гавриїл Костельник" по тей основи достал седем боди, цо, з оглядом на обсяг дїялносци, досц добри успих.

У тим року, за Дом култури Руски Керестур, хтори ше водзи як установа, з буджету општини Кула плановани 4,7 милиони динари.

Кулске руске КУД "Гавриїл Костельник" спада до здруженьох гражданох, и вєдно з другима ище 11 такима дружтвами, финансує ше тиж з буджету, а прейґ КПЗ, и за його роботу у тим року плановани 210 000 динари.

(конєц) зам

КУЛА - ПОЛИТИКА

На вовторок Скупштина општини

КУЛА, 8. марец 2010. (Рутенпрес) - Пре нєдостаток кворума концом фебруара, схадзка Скупштини општини Кула була преложена за 9. марец, а з оглядом на нєизвесну ситуацию з обезпечованьом кворума, нє познате чи будзе отримана и на ютре.

Отже, пре явносци познати зраженя медзи чолнїками општини, насампредз у Скупштини општини векшинскей Демократскей странки, ище 22. фебруара було заплановане заменьованє пейцох одборнїкох Скупштини општини з ДС з другима, медзитим, праве одборнїки ДС нє шицки пришли на фебруарску схадзку Скупштини.

Одборнїки зоз шорох опозициї - СРС и Странски желєних, тиж нє присуствовали роботи фебруарскей схадзки Скупштини и нє познате чи даю кворум за ютрейше зволанє Скупштини општини Кула.

Попри планованих зменох одборнїкох, на дньовим шоре Скупштини општини и други кадрово питаня, односно замена дзепоєдних члнео Општинскей ради и явних подприємствох.

(конєц) зам

СУБОТИЦА-КУЛТУРА

Пласман на покраїнску смотру рецитаторох

СУБОТИЦА, 08. марец 2010. (Рутенпрес) – Члени рецитаторскей секциї при Дружтве Руснацох у Суботици зазначели нови успих. Всоботу 6. марца у читальнї Городскей библиотеки отримана зонска смотра рецитаторох.

Наступали коло 90 рецитаторе, од хторих 28 були старшого возросту. На покраїнску смотру прешли 11 рецитаторе, медзи котрима и Михайло Планкош зоз писню "О тайни постаня" Михала Ковача котрого пририхтала Наталия Ґрунчич.

У жирию ше находзели Каталин Фазекаш, педаґоґиня, Миодраґ Петрович, ґлумец зоз Нового Саду и Владимир Рис, спред Заводу за културу Войводини.

(конєц)кп

КУЛА - КУЛТУРА

Починаю месни смотри рецитаторох

КУЛА, 8. марец 2010. (Рутенпрес) - На ютре, 9. марца, у кулскей општини почина перше тогорочне змаганє у култури - месни смотри рецитаторох.

Перша Месна мотра рецитаторох ютре будзе отримана у Кули, у Културним центре, на хторей наступя и рецитаторе зоз руского КУД "Гавриїл Костельник".

Месни смотри буду предлужени у Сивцу 10. марца, у Червинки 11., а у Крущичу и Липару, месни смотри буду отримани 12. марца.

Месна смотра рецитаторох у Руским Керестуре будзе отримана пондзелок, 15. марца.

Селекторка шицких месних смотрох у кулскей општини будзе професорка сербского язика у керестурскей Школи Слободанка Настасич а єй консултанти за язики буду Мария Прекаяц за мадярски и Владимир Бесерминї за руски и українски язики.

Як то по традициї, Општинска смотра рецитаторох будзе отримана у Крущичу, 19. марца, а селектор смотри будзе новосадски ґлумец Миодраґ Петрович.

(конєц) зам