БАЧКА ТОПОЛЯ – ПРОЄКТИ

Почал Камп толеранциї

БАЧКА ТОПОЛЯ, 26. юлий 2010. (Рутенпрес) – Штварти Камп толеранциї за младих подунайских реґийох и городох отворени нєшка у Бачкей Тополї.

Тогорочни Камп ше отримує под ґеслом "Влап ритем Дунаю", а на святочним отвераню були предсидатель Скупштини Войводини Шандор Еґереши, министер нукашнїк дїлох Ивица Дачич, министер за людски и меншински права Светозар Чиплич, координатор Совиту дунайских реґийох Петер Ланґер и предсидатель општини Бачка Тополя Атила Баби.

Святочносци присуствовали и представнїки покраїнскей и републичней власци, подунайских реґионох и городох, амбасадох и европских институцийох.

У цеку шейсцдньовей програми буду отримани едукациї, креативни роботнї, и забавни змисти, а у Кампу участвую 150 младих зоз Нємецкей, Австриї, Словацкей, Мадярскей, Румуниї, Болгарскей, України, Горватскей и Сербиї.

(конєц) ад

РУСКИ КЕРЕСТУР – КУЛТУРА

Соботу закончени штварти Водова фест

РУСКИ КЕРЕСТУР, 26. юлий 2010. (Рутенпрес) – Всоботу у Руским закончени Штварти музични фестивал младих "Водова фест".

По перших преценьованьох орґанизаторох зоз младежскей орґанизациї "Пакт Рутенорум" за два днї го нащивели коло 5 000 особи цо вецей як влонї кед були предати 4 500 уходнїци.

Нащивительох було зоз цалей Войводини, поготов зоз околних местох, а окрем домашнїх найвецей було Новосадянох, Зомборцох, а евидентовани аж и нащивитель зоз Нишу.

Другого вечара "Водова фесту" главни гвизди була горватска ґрупа "КУД Идийоти" зоз Пули, а удатно наступели и женски бенд "Фрайли" зоз Нового Саду, "Самостални референти" зоз Беоґраду и ґрупа "Свар".

Всоботу ше представела и керестурска ґрупа "Брейнловс", а як наявене нєсподзиванє бул наступ керестурских ґрупох "Маринер", та ґрупи младих музичарох "Пицикато бенд".

Цикаве же ше ґрупа "Маринер" специялно за "Водова фест" позберала знова грац о точно 20 роки, и зоз своїм наступом одушевели публику.

Нащивени були и други два бини, Реґе-бина и Бина-ладя дзе зоз техно звуком публику забавяли числени ди-джейове.

У рамикох "Водова фесту" бул отримани и мото-камп, а всоботу пополадню отримали и обовязни дефиле през улїчки Руского Керестура, а у орґанизациї домашнього мото-клуба "Шаркань".

Як уж традиция и на тогорочним "Водова фесту" на штандох ше представели и числени нєвладово и други младежски орґанизациї як цо "Пакт Рутенорум", Зєдинєна младеж Беоґраду, Младеж кулскей општини, Младеж ЯЗАС, Каритас, Форум младих Рускей матки, МАК-у и други.

(конєц) маф

РУСКИ КЕРЕСТУР – АКЦИЇ

Нєшка з роботу предлужує младежски Волонтерски камп

РУСКИ КЕРЕСТУР, 26. юлий 2010. (Рутенпрес) – Нєшка зоз роботу предлужує младежски Волонтерски камп, котри у Руским Керестуре тирва од 21. по 29. юлий, а волонтере мали павзу за викенд пре “Водова фест”.

Коло 40 волонтере нєшка предлужую ушорйованє обсяжней библиотеки на керестурскей парохиї, дзе ше вельке число кнїжкох и часописох премесца до наменских просторийох и витринох.

У пополадньових годзинох волонтере буду мац и другу роботню, котру им пририхта Караван "Пис месинджер" (Поручителє мира) котри свою мисию промоциї мира, толеранциї и диялоґа окончую у путуюцим каравану праве по младежских волонтерских кампох.

(конєц) маф

НОВИ САД – МЕДИЇ

Швидко откриц нападачох на Панчича

НОВИ САД, 26. юлий 2010. (Рутенпрес) – Новинара тижньовнїка "Време" Теофила Панчича вчера покалїчели двоме хлопи у автобусу у Земуну, а новинар ма контузиї глави и руки.

Нєзависне дружтво новинарох Войводини апеловало на державни орґани же би швидко пренашли нападачох на того новинара.

Тото новинарске здруженє здогадло же анї єден напад на новинарох у Сербиї нє ришени и виновнїки нє пренайдзени.

Напад на Панчича осудзел и покраїнски премиєр Боян Пайтич хтори гварел же у Сербиї шлєбода явного слова, интеґритет и достоїнство интелектуалцох муши буц почитоване и нє шме буц загрожене.

(конєц) ад

НОВИ САД – ИНФРАСТРУКТУРА

Нови паркинґи за бициґли

НОВИ САД, 26. юлий 2010. (Рутенпрес) – Явне подприємство "Паркинґ сервис" у Новим Садзе поставело ище 4 паркинґи за бициґли и то на Петроварадинскей твердинї, при Електротехнїцкей школи, у улїци Модене у центру и на Булевару ошлєбодзеня при шалтер сали полицийней управи.

Шицки паркинґи означени и маю видео надпатрунок, а исти таки паркинґи пошвидко буду вибудовани и на Лиманским и Рибовим пияцу, у универзитетским городу и на площи при Железнїчней станїци.

(конєц) ад

НОВИ САД – ОРҐАНИЗАЦИЇ-ЛЄТНЯ ШКОЛА

Поволанка за Лєтню школу

НОВИ САД, 26. юлий 2010. (Рутенпрес) – Лєтня школа у орґанизациї Союзу Руснацох Українцох Сербиї будзе отримана од 7. по 14. авґуст у Еко-кампу у Суботици.

Заинтересовани дзеци рускей и українскей националней меншини ше можу приявиц по 4. авґуст Александри Дудаш на число телефона 021/518-904, або 063/77-07-639, або Миколови Сеґедийови на телефон 065/64-78-527.

(конєц) ад