СУБОТИЦА - ПОЛИТИКА- МЕНШИНИ

Преславена 20-рочнїца снованя ДСГВ

СУБОТИЦА, 19. юлий 2010. (Рутенпрес) - З присуством предсидателя Сербиї Бориса Тадича и предсидателя Горватскей Иви Йосиповича, вчера у Суботици отримана Шветочна академия з нагоди 20-рочнїци постояня Демократского Союзу Горватох у Войводини.

Високих госцох и шицких присутних у Спортскей сали у Суботици привитал Петар Кунтич, предсидатель ДСГВ, бешедуюци о снованю, роботи и планох тей, спрам словох Кунтича, єдиней релевантней странки горватского народу у Войводини, наглашуюци добре сотруднїцтво з Демократску странку и потримовку од Републики Горватскей.

Предсидатель Сербиї Борис Тадич винчовал ДСГВ ювилей и бешедовал о значносци добрих одношеньох медзи двома державами, о витворйованю шицких заґарантованих меншинских правох гражданом горватскей националней меншини у Сербиї, як цо то Сербия обчекує и од Републики Горватскей, за гражданох сербскей националносци хтори там жию.

Тадич наглашел же вон, и як предсидатель и особнє, вше будзе давац потримовку розвиваню добрих медзидержавних одношеньох медзи Сербию и Горватску, а тиж и Демократскому Союзу Горватох у Войводини.

Предсидатель Републики Горватскей Иво Йосипович тиж повинчовал домашнїм тот значни ювилей. Вше лєпше сотруднїцтво медзи Сербию и Горватску, за котре ше вон и надалєй будзе закладац, дава векши можлївосци за лєпши стан Сербох у Горватскей и Горватох у Сербиї.

Горватска на прагу Европскей униї, гварел предсидатель Йосипович, и жада помогнуц Сербиї же би ше цо скорей придружела, наглашуюци же добри одношеня медзи тима двома державами барз важни за стабилносц у цалей Европи.

На Шветочней академиї присутни були представителє Републичней и Покраїнскей власци, локалней самоуправи, католїцкей церкви, Конзулату Републики Горватскей у Сербиї, члени и симпатизере Демократского союзу Горватох у Войводини и други госци. На шветочносци виведзена и кратша културно-уметнїцка програма.

(конєц) кпа

НОВИ САД - СКУПШТИНА

Городски омбудсман ище нє почал робиц

НОВИ САД, 19. юлий 2010. (Рутенпрес) - Анї три тижнї од кеди є вибрани на схадзки Скупштини городу, городски омбудсман нє почал з роботу, бо нє ма свойо просториї.

О додзельованю просторийох будзе бешеди на идуцей схадзки, хтора заказана за 30. юлий.

Омбудсман Александар Ґруїч прето нє може почац з роботу, ище нє познати анї состав його кабинету, систематизация роботних местох, анї орґанизация роботи, на основи чого би мали буц предвидзени и средства з городского буджету.

КОЦУР - ПОЛЬОПРИВРЕДА-ЖАТВА

Диждж знова претаргнул косидбу

КОЦУР, 19. юлий 2010. (Рутенпрес) - Моцни диждж, хтори вчера предвечаром и на вецей заводи предпрешлей ноци падал у Коцуре, предлужел жатву жита.

НОВИ САД - ПОЛЬОПРИВРЕДА-ЖИТО

На берзи по 14,20 динари

НОВИ САД, 19. юлий 2010. (Рутенпрес) - На Продуктней берзи у Новим Садзе прешлого тижня почала тарґовина з тогорочним родом жита, по цени од 14,20 динари за килограм, а обток бул 2 248 тони роби.

Склопени 21 контракт, а финансийна вредносц цалого обтоку була 51,4 милиони динари.

З кукурицу ше тарґовало по цени од 19,55 динари за килограм, цо вецейрочни минимум, а остатнього дня, цена кукурици поросла на 17, 28 динари за килограм.

РУСКИ КЕРЕСТУР - ПОЛЬОПРИВРЕДА-ЖИТО

"Керестурстеп” по 13 динари

РУСКИ КЕРЕСТУР, 19. юлий 2010. (Рутенпрес) - Од вовторку, у дїловней єдинки "Керестурстеп" у Руским Керестуре, почнє виплацованє за тогорочне придате жито, дознава Рутенпрес од Велимира Хому з “Керестурстепу”.

Як гварел Хома, "Керестурстеп" жито будзе виплацовац по 13 динари за килограм, цо цена вєдно з ПДВ, а спрам його спознаньох, тота цена найвироятнєйше будзе и конєчна.

"Керестурстеп” ма виплациц скоро 300 кооперантох за там придате жито, так же виплацованє од початку того тижня будзе по таким шоре як жито придаване.

И у керестурским Подприємстве "Юарбис" найвироятнєйше початком того тижня почнє виплацованє за придате жито до того Подриємства, а як гварели у "Юарбису", буду провадзиц цену яка будзе одредзена з "Войводина-аґрару", односно спрам догварки о цени жита на уровню цалей Войводини, дознава Рутенпрес.

ВЕРБАС - ПОЛЬОПРИВРЕДА-ЖИТО

Виплацованє жита после стабилизованя цени

ВЕРБАС, 19. юлий 2010. (Рутенпрес) - У Вербаше вчера покошени остатнї поля под житом, а виплацованє одкупеного жита у вербаских задруґох почнє наступних дньох, накадзи одкупна цена будзе стабилизована.

Дюра Аврамов зоз Землєдїлскей задруґи "Бачо", гварел же тота задруґа прияла 1 500 тони зарна и же штреднї урожай виноши коло 4 тони по гектаре.

Тота задруґа провадзи рушаня цени жита на тарґовищу, як и понуканя найвекших одкупйовачох, як цо то "Виктория ґруп", "МК комерц" и други, и своїм кооперантом жада обезпечиц цо лєпшу цену за жито, гварел Аврамов.

Сава Шуваков зоз ЗЗ "Аґромикс" гварел же тота задруґа превжала 2 000 тони жита, по гольту штреднє зродзело коло 2,3 тони и же им остатнїх дньох, одкупйоваче понукали 13 динари за кґ жита, плус ПДВ.

И кооперанти тей задруґи ше наздаваю же жито годни предац по 15 динари, як то наявел и министер польопривреди, так же и тота задруґа причека формованє єдинственей и стабилней одкупней цена жита.

РУСКИ КЕРЕСТУР - МЛАДИ-ВОЛОНТЕРСКИ КАМП

Нєшка приход волонтерох

РУСКИ КЕРЕСТУР, 19. юлий 2010. (Рутенпрес) - Нєшка до Руского Керестура приходза млади з иножемства и нашей жеми на Штварти Медзинародни волонтерски камп, котри, як и скорейших рокох, орґанизує Младежска орґанизация Керестура “Пакт Рутенорум”, у сотруднїцтве з Волонтерским центром Войводини.

На добродзечну роботу до Руского Керестура приходза млади зоз Шпаниї, Французкей, Нємецкей, Мадярскей, Ческей, Македониї, наявени и приход єдного бувшого учашнїка з Италиї, котри придзе на “Водова фест”, а понеже волонтерски камп у Кули одказани, на Камп до Керестура приду и двойо волонтере з Польскей.

Зоз Сербиї, на Волонтерским кампу у Руским Керестуре буду робиц млади зоз Старих Лединцох, Кикинди, Нового Саду, Крушевцу, Яґодини, пецеро зоз Кули, так же на тогорочним Волонтерским кампу у Руским Керестуре буду робиц тринацецеро млади з иножемства, дзешецеро зоз Сербиї, та млади з Руского Керестура.

Роботи на Штвартим медзинародним волонтерским кампу починаю на ютре, а главна будзе ушорйованє обсяжней библиотеки на рускокерестурскей парохиї. Пред тим, волонтере буду робиц на пририхтованю терену на базену за популарни "Водова фест".

Лидерки Штвартого волонтерского кампу Сенка Надь и Светлана Няради з Руского Керестура, а як и до тераз, за волонтерох буду орґанизовани и провадзаци змисти, вязани за упознаванє з Руснацами и Руским Керестуром.

Волонтере буду змесцени у интернату керстурскей Школи "Петро Кузмяк", а як и скорейших рокох, потребна им помоц Керестурцох у пожички бициґлох, пре каждодньови одход на роботу.

Пре жичанє бициґлох, котри буду врацени после отримованя Кампу, треба ше обявиц лидерком Волонтерского кампу - Сенки Надьовей и Светлани Нярадийовей, на тел. 065/76-83-777 и 064/423-13-17.

Ґу тому, як то було и до тераз, волонтере од Керестурцох очекую и добродзечну помоц у поживи, насампредз у дарованю желєняви и овоци.

НОВИ САД - ИНВЕСТИЦИЇ

Почина преширенє Булевару Европи

РУСКИ КЕРЕСТУР - КУЛТУРА-МЛАДИ

Того викенду "Водова фест"

РУСКИ КЕРЕСТУР, 19. юлий 2010. (Рутенпрес) - Того викенду, 23. и 24. юлия, у Руским Керестуре будзе отримани Штварти музични фестивал "Водова фест", котри орґанизяє Младежска орґанизация Руского Керестура "Пакт Рутенорум".

Перши "Водова фест" отримани 2007. року и од теди прероснул до барз популарного фестивала у тей часци Войводини, аж го наволую и "Мали Еґзит".

Попри учасци популарних менох з нашей и иножемней естради, "Водова фест" провадзи и удатна орґанизация, други атрактивни змисти, алє и баз добра обдумана промоция Фестивалу прейґ отримованя "Промотивних журкох" по местох ширцом Войводини, а остатня така була всоботу, 17. юлия у Вербаше.

Прешлого року, "Водова фест" през два днї отримованя мал коло 4 500 нащивительох, а з оглядом на учашнїкох тогорочного, орґанизаторе очекую нє лєм повторенє, алє аж и звекшанє нащиви.

На трох бинох, хтори буду поставени на отвореним, на керестурским базену - на Главней бини, Реґе-бини и Бини-ладї, хтора и того року на базен доплїва з Нового Саду, 23. и 24. юлия наступя 10 познати и менєй афирмовани музични ґрупи и 11 ди-джейове.

Главна гвизда тогорочного "Водова фесту" популарни Рамбо Амадеус, алє и ґрупи як цо то "КУД Идийоти" з Пули, з Горватскей, "Страх од летеня", "Д Фрайле", "Самостални рефернти" и други.

Спомедзи руских ґрупох, на "Водова фесту" наступя популарни млади керестурски состави "Крейзо казанс" и "Брейнловс", а орґанизаторе за публику у тим поглядзе пририхтую и дзепоєдни нєсподзиваня.

У рамикох "Водова фесту" будзе отримани и мото-камп, буду орґанизовани штанди вецей нєвладових орґанизацийох и здруженьох, а як и скорейших, и того року орґанизаторе пририхтую места за ошвиженє и костиранє.

СУБОТИЦА - КУЛТУРА

Почал Фестивал европского филму на Паличу

КОЦУР - ВИРСКИ ЖИВОТ

За священїка рукоположени Владимир Седлак

КОЦУР, 19. юлий 2010. (Рутенпрес) - Всоботу, 17. юлия, за священїка рукоположени диякон Владимир Седлак зоз Суботици, а рукопжоложенє окончене у коцурскей грекокатолїцкей церкви Успения Пресвятей Богородици,

Швяточни чин пошвецаня окончел крижевски владика кир Никола Кекич, хторому то була перша урядова нащива нашому Еґзархату од кеди є на чолє Крижевского владичества.

Владика Кекич визначел же найвекши дарунок хтори чловек може достац од Бога то поволанє на Исусову драгу, ласка же би чловек почувствовал потребу служиц Богу, на хасен людзом.

Владика Кекич здогаднул же зме по 2003. рок були єдно владичество, алє гоч грекокатолїки Сербиї и Чарней гори тераз маю свой Еґзархат, Крижевске владичество и грекокатолїцки парохиї на тих просторох духовно и на далєй блїзки.

Окрем владики Кекича, хтори предводзел Архиєрейну Службу Божу, у Богослуженю и чину пошвецаня участвовали 22 паноцове з нашого Еґзархату и з Крижевского владичества, як и нашо богослове и семинаристи.

После пошвецаня, неоєрей о. Владимир Седлак, унук познатого коцурского священїка Кирила Мудрия, подзековал своїзам найблїзшим и фамелиї ту и у Канади, же го виховали у християнским духу и унапрямели на праву драгу. Тиж так, подзековал и коцурскей парохиї, парохови, одборнїком и часним шестром, же у Коцуре орґанизовали тоту шветочносц.

Окрем числених Коцурцох, на Служби Божей присуствовала и числена фамелия паноца Седлака и його панїматки, приятелє зоз Суботици як и часни шестри зоз шицких манастирох нашого Еґзархату.

КОЦУР - ВИРСКИ ЖИВОТ

Неоєрей о. Седлак служел першу Службу Божу

КОЦУР, 19. юлий 2010. (Рутенпрес) - Вчера, неоєрей о. Владимир Седлак, хтори всоботу у коцурскей церкви пошвецени за священїка, у Коцуре служел свою першу Службу Божу, а у шицких службох, вирним дзелєл свой неоєрейски благослов.

Неоєрей о. Седлак ище раз визначел же му окреме мило же є за паноца рукоположени у церкви дзе його дїдо, о. Кирил Мудри, длуго роки службовал и до хторей и сам ходзел у дзецинстве.

Коцурци крашнє прияли пошвецанє младого паноца у своєй церкви, так же и соботова Архиєрейна служба Божа, на хторей о. Седлак рукоположени и нєдзельово Служби були барз нащивени.

РУСКИ КЕРЕСТУР - ВИРСКИ ЖИВОТ

На ютре швето св. Илиї

ВЕРБАС - ВИРСКИ ЖИВОТ

Кирбай у Новим Вербаше будзе 25. юлия

НОВИ ВЕРБАС, 19. юлий 2010. (Рутенпрес) - Кирбай у Новим Вербаше, хтори ше слави на швето Святого Владимира, 28. юлия, од снованя тей парохиї преноши ше на останю нєдзелю у мешацу, так же тогорочни Кирбай будзе на нєдзелю, 25. юлия.

Спрам словох пароха о. Ярослава Вовка, у Церкви Святого Владимира у Новим Вербаше, на Кирбай буду два служби.

На 7 годзин рано будзе Мала Служба Божа, а на 10 годзин будзе Шветочна Служба Божа. На Шветочну Вельку Службу очекує ше приход священїкох и з велїх наших парохийох, под час Служби будзе можлївосц за споведз, а после Служби мированє.