НОВИ САД - ОСТАТНЇ ПОЗДРАВ

Поховани Ярослав Сабол

НОВИ САД, 1. марец 2010. (Рутенпрес) - Всоботу, 27. фебруара, на новосадским теметове поховани Ярослав Сабол , подпредсидатель Националного совиту Руснацох у Сербиї котри умар штварток, 25. фебруара.

Ярослав Сабол бул окреме визначни дружтвени, културни и явни роботнїк Руснацох у Сербиї, за подпредсидателя Националного совиту вибрани є 2004. року, а од 2002. року окончовал и функцию подпредсидателя Рускей матки.

Ярослав Сабол народзени 29. юлия 1951. року у Шидзе, дзе закончел основну школу и ґимназию, же би, после дипломованя на беоґрадским Факултету политичних наукох - Оддзелєня за журналистику, 1975. року постал перши школовани новинар при Руснацох у тедишнєй Югославиї .

Першу новинарску роботу достал як стипендиста Радио телевизиї Нови Сад, у Редакциї програми на руским язику, од 1980. року робел у Новинско-видавательним подприємстве "Роботнїцка преса" ("Радничка штампа") у Беоґрадзе - у дописовательстве за Войводину, одкаль одходзи до пензиї 1998. року.

Як новинар, Ярослав Сабол за свою роботу достал велї награди и припознаня, медзи нїма и награди Союзу синдикатох Войводини, Сербиї и Югославиї, а його активносц була замеркована и у новинарских орґанизацийох, дзе бул член Предсидательства Дружтва аґрарних новинарох Войводини.

Ярослава Сабола будземе паметац по вельким, и нєсебичним позарядовим анґажованю у руским явним, културним и дружтвеним живоце на уровню цалей нашей заєднїци у Сербиї, а окреме при и за Руснацох у Новим Садзе и Шидзе.

Свой шлєбодни час, знанє и схопносци Ярослав Сабол барз вельо укладал на анґажованє у роботи Рускей матки Сербиї, бул член єй орґанох, делґат и учашнїк Шветових Конґресох РРЛ, а попри длужносци подпредсидателя Рускей матки, од 2002. року бул и предсидатель Городского одбору Рускей матки Нови Сад.

Ярослав Сабол бул снователь Фестивала монодрамох и дуодрамох у Новим Садзе, єден є спомедзи сновательох Дружтва Руснацох - Матка Нового Саду-Войводини, як и Фестивала тамбуровей музики "Мелодиї руского двору" у Шидзе, орґанизатор рижних програмох и проєктох у нашей заєднїци.

У Националним совиту Руснацох, як подпредсидатель бул задлужени за обласц информованя и тоту функцию окйончовал до конца живота.

Попри велїх своїх активносцох, дзе у каждей давал цалого себе, Ярослав Сабол бул и барз активни член городского новосадского Каритасу, дзе ше нєсебично старал о старих особох, а як у одпитуюциом слове наглашел о. Владислав Варґа, бул активни вирнїк и вше на помоци у тей парохиї.

На остатню драгу на новосадским теметове, попри супруги, дзивки и брата, Ярослава Сабола випровадзели його числени приятелє и колеґове з Нового Саду и велїх наших руских местох.

Од покойного Ярослава Сабола ше у мено Националного совиту одпитал предсидатель Националного совиту Руснацох Славко Орос, а у мено Городского одбору Рускей матки и Дружтва Руснацох - Матка Нового Саду-Войводини, предсидатель Городского одбору РМ Владимир Гаргаї.

(конєц) зам

РУСКИ КЕРЕСТУР-ДРУЖТВО

Отримани прадки женох Еколоґийного руху

РУСКИ КЕРЕСТУР, 1. марец 2010. (Рутенпрес) – Традицийни прадки женох керестурского Еколоґийного руху "Желєни персцень" отримани прешлого пиятку у будинку керестурскей Школи.

З нагоди Прадкох пририхтана вистава "Красота лапена з поцагом малярскей щеточки" на котрей свойо малюнки виложели штверо уметнїки, єдна госциньска и тройо домашнї.

Тиж так Мария Шилинґ зоз Купусинох публики понукла свойо акварели войводянских пейзажох, керестурци Биляна Романова, професорка у керестурскей Школи участвовала зоз своїма олєями на платну, Янко Бики зоз пейзажами зоз керестурского хотара, а Любомир Бабинчак виложел платна мертвей природи у бависку зоз шветлосцу.

За тогорочни Прадки у куцику народней традициї пририхтана и вистава стародавних предметох вязаних за млєко и його преробок хтори зачувала Ана Рацова.

Пририхтана тиж и предавацка вистава рижнородних ручних роботох котри вирябяю членїци Дружтва за борбу процив рака зоз Зомбора, на чолє зоз його предсидательку онколоґом др Дєрдї Шаричову, а и предмети зоз древа котри вирабя керестурец Елемир Колошняї.

Вистави зоз свою екипу пририхтала отворела, привитуюци присутних госцох и уметнїкох Любица Нярадийова, котра визначела же мото котри ю водзел и у тим подняцу бул красота малюнка, поезиї, квеца, та и красота одношеньох медзи людзми.

Красни стихи присутним подаровали двойо школяре керестурскей Школи, а свойо задовольство же пришла на тоту подїю висловела и др Лїляна Соколова, начальнїца Заходно-бачкого округу котра уж велї роки блїзко сотрудзує зоз керестурским Еколоґийним рухом.

Прадки керестурских женох возвеличали и госциньски зоз Коцура и Лалитю, а после урядовей часци шлїдзело їх друженє.

(конєц) маф

НОВИ САД – ПОЛИТИКА

Потримовка Новому Саду як домашнього дунайского самиту

НОВИ САД, 1. марец 2010. (Рутенпрес) – Предсидатель мадярского парламенту Бела Катона потримал предклад предсидателя Скупштини Войводини Шандора Еґерешия же би ше самит предсидательох парламентох дунайского реґиону отримал у Новим Садзе у октобру.

Циль самиту будзе даванє политичней потримовки у виробку и реализациї дунайскей стратеґиї.

(конєц) ад

СУБОТИЦА – ПРОЄКТИ

Авторе ґрафитох у Италиї

СУБОТИЦА, 1. марец 2010. (Рутенпрес) – Стедентски културни центер зоз Новог Саду и Фондация за младежску културу и творительство зоз Суботици наявели сотруднїцтво зоз Италию хторе почнє зоз одходом уметнїкох-ґрафитерох на фестивал до Ливорна.

Одход уметнїкох хтори рисую ґрафити на мурох промовованє тей уметносци у Суботици и Новим Садзе, а ґрафитере буду участвовац на фестивалу "Звонка марґинох". Слово о проєкту розменьованя уметнїкох-ґрафитерох зоз Суботици, Нового Саду и Ливорна.

Фестивал будзе отримани од 1-6. марец, а орґанизує го мрежа нєвладових орґанизацийох зоз Италиї, хтори робя на социялней инклузиї марґинализованих людзох.

(конєц) ад

РУСКИ КЕРЕСТУР - СПОРТ

Отримана Скупштина СД "Русин"

РУСКИ КЕРЕСТУР, 1. марец 2010. (Рутенпрес) - Вчера, 28. фебруара, у просторийох керестурскей ОШиҐ "Петро Кузмяк" отримана порядна Рочна скупштина Спортского дружтва "Русин".

На Рочней скупштини поднєшени и анализовани звити о роботи цалого керестурского Спортского дружтва, алє и його клубох поєдинєчно - фодбалского, рукометних, карате-клубу, атлетского, шах-клубу, конїцкого клубу, столнотениского и боди-билдинґ Клубу.

На вчерайшей Скупштини, до фамелиї клубох рускокерстурского Русина прияти и спортски риболовци, односно Здруженє спортких рибарох "Коляк".

Рочна скупштина керестурских спортистох вше и нагода за преглашованє найлєпших у єдним року, та так за спортистку рока преглашена рукометашка и ґолґетерка першей женскей рукометней екипи Русина Николина Зорич, а за найперспективнєйшого младого спортисту Русина преглашени млади атлетичар Ваньо Хома.

(конєц) зам